الموضوع: الأسترا السيدان 2009- ملاحظات سريعة بعد يومين من الشراء

طبعا معظم أعضاء عصابة أوبل عارفين أخوكم في الله عاشق الأوبل رقم واحد في المنتدى و بمناسبة شرائي الأسترا السيدان الجديدة - لزوجتي طبعا مش ليه -فحبيت أشرك حضراتكم ببعض المعلومات المؤكدة عن السيارة الى جانب الانطباعات الأولى عنها قدر الاستطاعة:-

1- الأسترا السيدان 2009 من مصنع أوبل في مدينة جلويتش Gliwice - بولندا و تقفيلها نضيف جدا زي البلجيكي و نفس هذا المصنع يقوم بتقفيل الزافيرا و الأسترا الكلاسيك (الهاتشباك).

2- سعر الأسترا السيدان فعلا 150000 جنيه للكاش و منصور عنده تقسيط داخلي بشيكات بنكية و لكن تصحيحا لكلام خالد الفائدة الفعلية بتوصل 10% ثابتة سنويا بسبب ضريبة المبيعات لأن الدولة بتعتبر خدمة التقسيط الداخلي يستحق عنها ضريبة مبيعات .

3- بداية الانتاج الفعلي للأسترا السيدان يوم 23-8-2007 و السيارة تستهدف أساسا أسواق شرق و وسط أوروبا المعجبة جدا بالأسترا كمويل متوسط الحجم و لكن لا تحب الموديل الهاتشباك.

4- الموديل الوحيد المشترى من منصور للسوق المصري هو موديل الكوزمو و يشمل محرك ايكوتيك 115 حصان - الجيل الأحدث من موتور الفيكترا لأن الفيكترا 105 حصان فقط - و كل الكماليات الأساسية طبعا من 4 زجاج كهربي و فتيس ايزي ترونيك و باور كهربي و ABS و شاشة معلومات و تكييف بكر و سنترلوك باضافة الى مثبت سرعة و دركسيون متعدد الوظائف و كاسيت سي دي MP3 .

ملاحظاتي الشخصية على السيارة منذ الأمس فقط و طبعا انتوا عارفيني بأموت في حاجة اسمها أوبل شيء الهي كده و الله هي الآتي سريعا :

1- طلعة العربية تقيلة جدا و تحس انك لازم تدي بنزين زيادة عن الطبيعي علشان العربية تتحرك من مكانها. طبعا الكلام ده مرتبط بوضع الأوتو في الفتيس.

2- الفتيس الايزي ترونيك حبيبي طبعا أبو نتشة جربته جوه البلد و على الطريق السريع ، فعلا التعامل معاه على انه أوتوماتيك عادي هايخليك تحس بنتشة عند النقلات . فيه تأخير في تعشيق المحرك على الفتيس بين النقلات ده أكيد و أتمنى ان ده يختفي مع التعود عليه و سمعت انه فيه SOFTWARE جديد نازل للايزي ترونيك بيقلل التأخير الزمني ده هاشوق اخباره ايه في صيانة الألف بمشيئة الله تعالى. طبعا أنا كل ده علشان المدام أما بالنسبة ليا فمازلت بحاول افكر ازاي الشيطان غلبني و خلاني وافقت على أوبل - حبيبة الجماهير

3- طبعا عيب أتكلم على الثبات و العفشة لأني بحترم أوبل تحديدا في النقطتين دول بمعنى أنك تحصل على ثبات و عفشة متوقعة من اسم أويل.

4- المدام رفضت فكرتي طبعا بزيادة 5000 جنيه و شراء الفيكترا الاليجانس لسببين هما ان شكلها مش شبابي و ثانيا موديل 2008 وليس 2009 كالأسترا و من جانبي الشخصي أنا شايف السببين منطقيين تماما - الطيب أحسن - و يضاف اليهم سبب ثالث هو ان الأسترا السيدان تعتبر نسخة مصغرة من الفيكترا تماما في التابلوه و الدركسيون و المقدمة ذات الفوانيس المسحوبة للخلف.

5- العزل الصوتي للهواء من النوافذ الجانبية رائع جدا و عزل صوت الموتور أكثر من رائع و دي شهادة لوجه الله يا جماعة لأن الجيتا عندي صوت الموتور عالي و مسوع في مقصورة الركاب بنسبة كبيرة. أحترم أوبل أيضا في جزئية العزل دي.

6- التكييف تحت التجربة و لا أستطيع اعطاء حكم موضوعي في هذه اللحظة.

7- الملاحظة الغريبة بالنسبة لي هي عدم وجود عداد حرارة من ضمن مؤشرات القياس في التابلوه . مافيش حد عارف السبب هل هو محاولة من أوبل للهروب من موضوع الحرارة العالية لسياراتها باخفاء مؤشر الحرارة تماما و الاكتفاء طبعا بلمبة الحرارة في المؤشرات للتنبيه بايقاف السيارة فورا عند اضائتها ؟. هل السبب اتجاه عام في التصميم؟. اللي يعرف السبب يقولي أو يتصل بيا في منتدى الفولكس جنبكم أول شارع يمين بعد منتدى الاسكودا.

أخيرا أتمنى ان أكون اعطيت بعض معلومات مفيدة و أدعو الله أن يغفر لي و يسامحني و يزيد من ميزان حسناتي و طبعا عارفين السبب

خالص احترامي للجميع.

محمد حمدي

ألف شكر لجميع المهنئين و اوعدكم بمزيد من التقييم لاحقا بمشيئة الله.