هام لاصحاب النيو اكسنت اوتوماتيك

**Prince30** · 01-05-2009 12:25 AM

ارجو الافادة وجزاكم الله كل خير. انا استلمت من 4 ايام نيو اكسنت اوتوماتيك 2009 من سمير ريان. العربية ماكانش على زجاجها الامامي ورقة الاستيراد المعتادة والاستيكر اللي على زجاج الباب الخلفي كان متقطع، قالولي اصل عندنا مشاكل مع غبور. هل كل ده عادي ولا فيه حاجة تقلق؟ وممكن تكون فرز تاني زي ما البعض قالولي؟
بالذات اني اكتشفت فيها بعض العيوب زي حدفة شمال جامدة شوية.
2- بسمع صوت تزييق او طقطقة عالية من الفرامل لما بشيل رجلي من عليها والعربية على D. هل ده عادي على اساس ان العربية عايزة تتحرك زي مانتو فاهمين؟
3- كمان بحس بالعربية تنتش بوضوح عند غيارات الاوتوماتيك، عند سرعات 20 و 40 بالذات.
4- لمبة ال check هي الوحيدة اللي مش بتنور عند تشغيل العربية. ده عادي؟ مع اني بشوف انها بتنور في العربيات التانية زي الفيرنا
5- لما بكون واقف في شارع هادي بسمع صوت الموتور عالي، ناس قالولي دي زنة المروحة او السيور وهي بتلف. مع ان وهي ماشية ناعمة.
6- هل الانذار بيضرب عندكو برضو من ساعة ما تفتح العربية بالريموت لغاية ما تدور الموتور؟ واحيانا بلاقي الاربع لمبات بتوع تغيير الاتجاه باللون الاصفر بينورو وانا ماشي لوحدهم. بعر ف كده من السهمين اللي في التابلوه. ده ليه؟

ارجو افادة اخيكم ولكم جزيل الشكر

**ezzatfox** · 01-05-2009 03:01 AM

لا كدة فى حاجات غريبة انا مانيوال بس فى حاجات مش هتفرق بين المانيوال و الاتوماتيك ، موضوع الحدفة مش طبيعى طبعا فى اى عربية
التزييق بردة دة صعب جدا تسمعة فى النيو اكسنت حتى لو اية ، انا العربية عندى ممكن تتشال و تتهبد و متسمع صوت تزييق و لا حاجة.
صوت العربية و هى واقفة ملوش صوت الا اول ما تدورها بس بعد كدة الصوت بيهدى مش بيهدى بس دة بيختفى خالص
موضوع الانذار دة غريب و فى حاجة غلط .. مش طبيعى .
انا مش قصدى اضايقك و لا اقلقك بس انت سألت و لازم ارد عليك بأمانة عشان تلحق تتصرف .
عشان كدة اللى بيسألنى بقولة هات من التوكيل حتى لو اغلى بس تبقى مطمن
و حاول تسأل فى التوكيل على موضوع الاستيكرات اللى متشالة دى او يحاولوا يكشفوا على العربية برقم الشاسية دخلت امتى احسن تكون قديمة مش انتاج جديد عشان كدة شال الاستيكر .

**akram2010** · 01-05-2009 07:36 PM

عربيات التجار مش كلها سيئه ولكن عندهم الفرز التانى وحظك السيىء وقعت فى واخدة منهم ودة مكسبهم لانه بياخدها من الوكيل بسعر اقل وتلبسها سعادتك بسعر الفرز الاول حق الوكيل وعلشان كدة يا اخوان روحوا للوكيل اضمن

**حماده المصري** · 02-05-2009 02:38 AM

مش فاهم انا يعنى ايه عربيه فرز تانى

هو في الغالب يكون سائق من المعرض خبطها واتصلحت

واكشف كده كده في التوكيل العربيه ليها ضمان وتتصلح على حسابهم

ومتسكتش نهائي الا لما العربيه تبقى على سنجه 10

**akram2010** · 02-05-2009 11:54 AM

مش كل حاجه الضمان الضمان يا اخونا . السيارة لما تكون خارجه من التوكيل لايمكن تكون بها اى مشكله لانها تفحص قبل خروجها من المخازن للمعرض والزبون او التاجر ماضى على الاستلام يعنى مافيش مشكله . التجار ولعلمكم يجروا للتوكيلات للبحث عن السيارات المعيوبه بيكون لط من كذا عربيه بياخدها بسعر كويس ويصلحها برة على حسابه ويلبسها للزبون بسعرها المعلن وانا معاك مش كل العربيات للمرة المليون بس ال حظه سيىء يقع فيهم ودة بتكون مع التجار فى السوق وليس الوكيل وعلشان كدة ننصح بشراء السيارة من الوكيل مباشرآ وسعرها زى برة وفلوسنا وفلوسك مش جايه بالسهل . يعنى انسى تاخد عربيه من تاجر وترجع للوكيل بها عيب وتقوله من عندك لآن التاجر ال باع لك استلمها وراضى على كدة وكله بثمنه وسعادتك لبستها من الاخر

**حماده المصري** · 03-05-2009 02:15 AM

المشاركة الأصلية كتبت بواسطة akram2010

مش كل حاجه الضمان الضمان يا اخونا . السيارة لما تكون خارجه من التوكيل لايمكن تكون بها اى مشكله لانها تفحص قبل خروجها من المخازن للمعرض والزبون او التاجر ماضى على الاستلام يعنى مافيش مشكله . التجار ولعلمكم يجروا للتوكيلات للبحث عن السيارات المعيوبه بيكون لط من كذا عربيه بياخدها بسعر كويس ويصلحها برة على حسابه ويلبسها للزبون بسعرها المعلن وانا معاك مش كل العربيات للمرة المليون بس ال حظه سيىء يقع فيهم ودة بتكون مع التجار فى السوق وليس الوكيل وعلشان كدة ننصح بشراء السيارة من الوكيل مباشرآ وسعرها زى برة وفلوسنا وفلوسك مش جايه بالسهل . يعنى انسى تاخد عربيه من تاجر وترجع للوكيل بها عيب وتقوله من عندك لآن التاجر ال باع لك استلمها وراضى على كدة وكله بثمنه وسعادتك لبستها من الاخر

والله كلام حضرتك زي الفل معليهوش غبار

بس برضو مدام العربيه جديده اي عيوب صناعه على التوكيل والضمان فورا
غير كده اسمه نصب

انا شاري عربيتي من معرض التكييف كان ضعيف الضمان زبطه

بعد 30 الف دراع النور باز اتغير على الضمان

حتى الولاعه بازت من كتر السجاير اتغيرت على الضمان