الموضوع: I30 / الميجان

لأ طبعا ...إللى ب 130 ألف جنيه مش آخر فئة و لا حاجة
ثم إنه مش حاجة الواحد يفخر بيها إن عربيات هيونداى سعرها بقى غالى لدرجة إنه يناطح الأوروبى و اليابانى...
حتى و إن كانت الهيونداى بنفس الجودة ( فرضا جدلا )....إيه إللى يخلى الزبون يفضلها عن ماركات يابانى و أوروبى عريقة و لها سمعة طيبة...
ثم إن حضرتك كل تعليقك على مسألة نظرة الناس فى الغرب ( سوق مفتوح و المنافسة شديدة جدا ) لماركة هيونداى و لم تعلق على أى من الجوانب العديدة فى ال Post الطويل العريض...

أنا هسألك سؤال بسيط جدا جدا يوضح لك إن لسه هيونداى أمامها شوط طويل لتقطعه لكى تسمو للمقارنة الندية بحق و حقيقى مع الشركات العملاقة و القديمة من أوروبا...
عمرك شفت واحد بيحلم إنه يبقى عنده عربية هيونداى فى يوم من الأيام ؟؟؟....جايز يكون بيحوش علشان يجيبها نظرا لإنها المتاحة...لكنها ليست بسيارة الأحلام أبدا....
إيه العربية إللى هيونداى عملتها سوف تبقى فى ذاكرة التاريخ ؟؟؟
و هو فى إيه أصلا شديد التميز علشان يعلق فى الأذهان ؟؟؟
الناس دايما تفتكر الكورولا علشان مبيعاتها المكتسحة و البيتل و فى مصر ال 504 و المينى...لكن دلوقتى الإلانترا الشكل قبل الحالى مافيش حد بيبص لها حتى....

الناس دى بتكسب يمكن أحسن من رينو و باقى الصانعين...لكن ده مش علشان هما بيقدموا منتج أفضل...دول بيقدموا سلعة ناجحة تجاريا و فيها هامش ربح كويس و بس.... على عكس المذهب الآخر فى الصناعة الذى يعتمد على مخاطبة ذوق و شريحة زبائن أقل فى العدد و بالتالى ينتج و يبيع وحدات أقل و بالتالى يضطر إلى رفع سعر الوحدة المباعة...لكنه فى ظل تلك الصعوبات يستمر و يقدم الجديد و الابتكارات و يصرف فلوس كتير على أبحاث التطوير فتجد هناك تقدم حقيقى للبشرية

مش غلط أبدا إن الواحد يركب هيونداى....لكن الغلط إنه يصدر أحكام و يعتبرها مؤكدة و يصر عليها و كمان يجبر الآخرين على الاستماع إليها أكثر من مرة بالرغم من إعلان الآخرين أكثر من مرة عن عدم رغبتهم ....

لكن إلا قول لى....إنت داخل المنتدى مخصوص علشان ترد عليا و لا إيه ؟؟؟...أصل أنا شايف إن دى أول مشاركة لك يعنى و بسم الله ماشاء الله ثقتك عالية أوى...
و على فكرة ممكن تنادينى بإسمى الأول " هانى " من غير تكليف و أنا حاطه فى التوقيع مخصوص علشان كده...

المشاركة الأصلية كتبت بواسطة super3_11

شكرا يا هانى على ردك وطريقتك المحترمة فى الحوار بس انا بدور على عربية عايز اشتريها ومش محدد سعر ومع ذلك بصراحة انا مش شايف اى عربية تشد النظر زى الi30 مع انى شوفت الجيتا وهى المانى لكن معجبتنيش زى الi30 وفعلن بقى حلمى انى اجبها ولو دخلت قسم الهيونداى حتلاقى كتير نفسهم فى عربية هيونداى ومحددين عربيات اسعارها عالية ممكن بيها يوصلوا للعربيات الالمانى ومع ذلك بيفضلوا الهيونداى وعلى فكرة هيونداى حاصلة على جائزة سيارة العام لعام 2009 فى امريكا الجانوبية عن سيارة هيونداى جينسيس وانا اسف طولت عليك يارب متكنش زهقت منى .

معلش اسمحلي حضرتك اوضحلك نقطة صغيرة بس ان الهيونداي جينسيس مش معمولة عشان تقارن بالجيتا او باي عربية احنا بنتكلم عليها دي معمولة عشان تنافس البي ام والمرسيدس وده على لسان احد التقارير اللي شوفتها للمعارض

ما تحيرش نفسك بجوائز لعربية مش موجودة فى مصر و حصدتها فى أمريكا الجنوبية....

لازم تراعى الظروف إللى إنت عايش فيها

أنا مثلا كان نفسى أركب سيتروين أو ألفاروميو...ينفع الكلام ده ؟؟
ألفاروميو دلوقتى بقى مالهاش توكيلو يا عالم قطع غيارها موجودة عند محلات شكلها و سمعتها إيه و علشان أصلا أجيبها مافيش حد بيبعها و لا ليها صالات عرض
سيتروين....منه لله إللى كان و لا يزال السبب فى هضم حق عربية محترمة جدا زيها فى مصر....

يا باشا لو ال I30 عاجباك و إنت مستريح لها نفسيا عن أى حاجة...أنا أول المهنئين مقدما لك على العربية.....
بس أنا مش مؤيد فى مسألة أنا مش راصد ميزانية دى
لازم ز لابد تكون حاطط حد أقصى لمبلغ معين...لإن حقيقى يعنى...كل فلوس زيادة بتجيب عربية أحسن و الفرق لو مش ظاهر فى الأول هيبان بعد سنة من الاستعمال....
و كمان كل بلد و كل ماركة له فلسفة و وجهة نظر فى تصنيع منتجه...فبالتالى دماغ الزبون إللى بتتوافق مع ما يقدمه الصانع من منتج هى إللى بتخلى العميل يختار المنتج ده عن غيره...
إنت محتاج لفة فى المعارض تشوف عربيات كتير..و ما تكسلش...دى فلوس كتير إللى بتدفع..لازم تكون متأكد
و لازم تعتبر المنتدى كأداة مساعدة على معرفة وجهات النظر أو حالة التوكيل و ليس معيار مباشر للاستقرار على عربية بعينها
إللى أقصده ..مثلا مش علشان الناس إللى بتشكر أوى فى الميجان كتيير يبقى بالتصويت كده تروح تجيب الميجان...وهكذا
محتاج برضه تقضى وقت فى المنتدى فى قراءة المواضيع خصوصا المثبتة فى كل الأقسام....
و الناس فى المنتدى كلها أخوة و لو عندك سؤال هايجاوبوك إن شاء الله
و بالتوفيق إن شاء الله