هما المصرية للسيارات معندهمش تليفون ؟

**Terrible_DaRsH** · 11-05-2009 01:19 AM

فى اعلان معمول فى جرنال الوسيط يا جماعة فى اخر صفحة .

المصريه للسيارات عاملة عروض تقسيط و اسعار ..

قرات الورقة 100 مرة و ملقتش لهم تليفون . كاتبين العناوين بس .

هما معندهمش خدمة عملاء عن طريق التليفون ولا ايه ..!

لو حد يعرف رقمهم يا جماعة يا ريت يكتبه .

اصل انا مش هروح المعادى علشان اسال كام سؤال و ارجع تانى ..

شكرا

**medo60** · 11-05-2009 02:11 AM

هما ليهم بس مش عارف أجيبه
فيه حل سهل أوي
اتصل ب 140وأسأل الدليل عن رقمهم
وأنا ححاول أدور تاني

**medo60** · 11-05-2009 02:25 AM

طيب قول اسئلتك وأعضاء المنتدي يفتوك فيها

**Terrible_DaRsH** · 11-05-2009 02:33 AM

انا كنت عايز اسال عن اقساط كام عربية كدا ..

و كمان طريقة التقسيط و الفوائد و الاجرائات و اللازم .

**volcano12** · 11-05-2009 02:38 AM

مره فى اسكندريه هنا كلمتهم عن طريق 140 و واحده ردت عليا و قلتلها لو سمحت عايز أسأل على العربيه الفلانيه النترا 2009 ...الكلام ده من 3-4 شهور كده
راحت رده عليا قالتلى موجوده
قلتلها لو سمحت عايز أعرف تفاصيل عنها
راحت قالتلى حاضر ححولك على حد و راحت حطانى على الوايتنج

و اعدت استنى استنى استنى لحد ما صوت الويتنج قطع و بعدين السكه قطعت.....

... رحت متكلم تانى بقت بترفع السماعه و تحطها .... كذا مره ... طبعا أخوكم اتنرفز قوى منهم فضلت وراها بس عشان أكلمها أهزأها و تولع المصريه هى و سننها....

راحت رده عليا أيوه
و و هزأتها شويه
راحت بقى قالت أتهرب... قالت ان مش هى اللى ردت عليا (و أنا ميزت صوتها طبعا) و قالتلى بعديها عشان تخلص منى مافيش اسفسار بالتليفون
بس بقى سمعت الكلمه ده و فتحت :) و سيبانى و بتاع و بعد كده ارزع السكه ف وشها....

نصيحه بلاش تكلمهم.. و على فكره أنا كنت جاد فى الشراء!!!!

**Terrible_DaRsH** · 11-05-2009 02:41 AM

ما هو علشان كده عايز اكلمهم .

لانهم بيبقوا كاتبين ارقام فى الجرايد و بمجرد انك تروح تزورهم فى معارضهم تسمع كلام تانى خــــــالص ..

فحرام اروح اهزق حد هناك وانا عارف انهم كدابين .

علشان كده بسال على رقم التليفون اتاكد قبل ما اروح .

**A.Saad** · 11-05-2009 05:46 AM

اتاكد انهم كدابين
مرة عماوا اعلان تقسيط 4 %
انا كن هناك بتفرج - دى الميزة الللى عندهم اتفرج براحتك - وسالت
ده نظام على بعض موديلات 2008 زى السيتروين - بيكاسو والرينو - سينك
تدجفع 60 % والباقى على سنة او سنتين - مش فاكر -

**kingtefa** · 11-05-2009 08:27 AM

على فكرة المصرية دول اكبر نصابين

**aliabutaleb** · 11-05-2009 08:51 AM

يا درش إذا كان فيه ناس بتروح لغاية عندهم في معارضهم ومش بتاخد منهم ولا حق ولا باطل يبقى هايفيدوك في التليفون؟
مظنش
انا مش ناسي لما رحت لهم أسأل على عربية زيرو أشتريها كاش قعدوا يقنعوني أشتري تقسيط أحسن :)