تجربتى فى بورسعيد

**khaled_rafea** · 12-05-2009 10:31 AM

طبعا انا كنت لسة شارى العربية بقالى شهر, وبما انها موديل 93 فكانت محتاجة حاجات كتير تتغير و تتظبط, المهم نزلت بورسعيد, قولت بقى ابضع و اظبط العربية, وكان اللى كان
طبعا جبت الحاجة غالية اوى, وضحكو عليا فى درج التابلوة( ادونى درج تابلوة شمال-right hand steering) وبردة لقيت فروق اسعار رهيبة( بتوصل ل 250 جنية فى القطعة) المهم اللى معندوش خبرة زى حالاتى فى المعاملة مع التجار يخلى بالو و هو بيشترى, و ربنا يوفقكم جميعا

**mshamy** · 12-05-2009 12:08 PM

طبعا قدر الله و ماشاء فعل....
بس انا باعتب على حضرتك انك ما قولتش على سفرية بورسعيد ...كان ممكن نفيدك او ندلك تروح لمين بالظبط يساعدك في موضوع الشراء و بأسعار أقل من القاهرة....
حصل خير و إن شاء الله المرة الجاية تتعوض

**khaled_rafea** · 12-05-2009 12:14 PM

يا باشا ربنا يخليك و ميحرمناش منك, بس احنا حنتعبك فى كل حاجة كدة, عموما انا مضطر اروح تانى قريب ان شاء الله ابدل الدرج و اشترى حاجات تانية , و مستنى منك النصيحة , تسلم وتشكر

**mshamy** · 12-05-2009 12:22 PM

أنا إن شاء الله نازل أجازة قصيرة في بورسعيد لمدة 3-4 ايام من بكرة...لو عايز تشرفني انا تحت أمرك

**khaled_rafea** · 12-05-2009 02:02 PM

ربنا يخليك يا استاذى, اجازة سعيدة ان شاء الله, بس انا مش حلحق اسافر بورسعيد تانى اليومين دول, هو حضرتك مش مقيم اصلا فى بورسعيد؟ , ولا حضرتك منين ؟

**Khalid Shalabi** · 13-05-2009 06:12 AM

انا حصل معايا العكس

رحت مركز صيانة في القاهرة عشان اظبط الموتور بالكمبيوتر و اظبط تاكيهات و كان لازم اغير تيل امامي و طنابير امامية و طنبورة كرنك و سير كاتينة و شوية رفايع تانية

المهم سالت على اسعار الحاجات دي لقتها غالية اوي عن بورسعيد و فعلا اللي ب 650 جنية في القاهرة ب 400 في بورسعيد

كلمت صديقي الحاج مجدي الدسوقي الجدع جدا (موزع قطع غيار هوندا اصلي) و كان بالصدفة جاي القاهرة بليل و جابلي كل حاجة معاه و ووفرت اكتر من 500 جنية
دي بورسعيد يا باشا... مامت الهوندا في مصر :)

**khaled_rafea** · 13-05-2009 12:10 PM

سبحان الله, اول محل دخلته فى بورسعيد كان اسمة مجدى الدسوقى, هما ناس محترمين جدا والمعامله فوق الممتازة و كل حاجة عندهم متوفرة, بس للأسف الاسعار كانت اغلى من كل المحلات التانية بفرق كبير, وللأسف بعد ما اشتريت معظم الحاجة اللى انا عاوزها لقيت محل ارخص وافضل من كل المحلات اللى دخلتها وصاحبة شاب محترم و مش منتظر منك فصال, بيديك سعر من الاخر

**Khalid Shalabi** · 13-05-2009 01:38 PM

انا معاك ان مجدي الدسوقي اغلى بس حاجتة مضمونة و اصلي و خصوصا مع انتشار قطع الغيار المجهولة المصدر و بتدخل مصر عن طريق دبي و عليها نفس علامة الهوندا الحمرا و كل حاجة و دا اللي بيقولوا علية مغلف

ممكن نعرف اسم المحل الرخيص دا؟

**khaled_rafea** · 13-05-2009 04:21 PM

باشا انا بتكلم عن المستعمل (الاستيراد يعنى) وبالنسبة للمحل هو مش رخيص اوى يعنى بس هو اقلهم سعرا, صاحبه اسمة كريم و معاه سيفيك مشفتش زيها فى مصر ما شاء الله, حجيب الكارت من البيت و ارد عليك ان شاء الله