بسم الله الرحمن الرحيم

الحمد لله ربنا وفقني واستقريت بعد عناء اني اجيب الهوندا سيتي 2009
وده تقرير كامل عن العربية من أول الشراء لحد أول 1000 كم في الصيانه :

(في البداية انا كان عندي بيجو 305 اعذروني بقى في بعض الملاحظات)

معليش انا مصوتهاش فخليكم مع اللينك ده لو محتاجين أي صور

http://paultan.org/archives/2009/02/...ssions-review/

انا لفيت كتير جدا وفي الآخر ملقيتش اللون الرصاصي الغامق (الفيراني)
والعفش الغامق غير عند السبع الي في ميدان الساعة مدينة نصر ..

جبتها ب 127 ألف .. والاجراءات في الشراء كانت أكنك بتشتري موبيل ..
التسجيل كان في مرور مصر الجديده واخد ساعتين تقريبا .. بعد كده العربية
جاهوة ..

أولا :
انا استلمت العربية ومعاها مفتاحين ورقم كمبيوتر ..
وكيس جلد فيه الخطافين بتوع كرسي الأطفال و مفتاح العجل ..
و شماسة للزجاج الأمامي و دواسات من السبع ..

* تنك البنزين كان مديني 0 بس انا مشيت بيها 15 كيلو كده ولما مونت اكتشفت
انه كان لسه فيها 2.5 لتر ..

ملاحظاتي :

الإيجابيات :

من بره :

طبعا معظمكم شافها قبل كده بس المعرض الي عند التجمع فيه كل الألوان ..
- الصاج تخين بس مش عارف قد ايه والدهان كويس جدا ..
- المرايات عريضة عرض تشوف الأرض و الشباك الي وراك كله ..
- فتحت الباب احساس راقي اوي
- شنطة العربية تاخد 4 جثث مستريحين :)
- علو الإضائة الأمامية ممتاز ( طبعا 4 درجات ) ..
- أداء النور العالي كويس جدا .
- الإشارات الجانبية واضحة من جميع الجوانب ..
-
من جوه :
- العزل الحراري فوق المتوسط عشان لونها عامق
- العزل الصوتي رائع ..
- الكراسي فرشها ضد المية وعليه نقشة نجنن ..
- الكنبة مريحة جدا لـ3 أشخاص ..
- أماكن تخزين في البابين الأماميين
- مكان تخزين كبير جدا تحت الكنبة الخلفية
- 5 أماكن للكبيات
- طفاية منفصلة على شكل Mug
- مساند الرأس مناسبة جدا للجلسة القياسية
- نور التابلوه اساسي شغال وواضح جدا في جميع الظروف
- الشاشة الصغيرة 4 اختيارات (اجمالي المسافة - العداد المؤقت - معدل
الاستهلاك - و المسافة التقديرية لتنك البنزين)

الكاسيت :

-سي دي و وصله USB و ِAUX وبيقراء MP3 & WMA .. الصوت رائع جدا مع وجود
زنه خفيفة جدا لما عليت كل حاجة على الآخر .. بس كان عالي زياده عن اللزوم ..
- المنيو بتاعت الكاسيت رائعة وسريعة جدا .. و كل الإعدادات منفصلة يعني
بتفتكر كل الأوبشين في السي دي لوحده وال USB لوحده والراديو وكده ..

استهلاك البنزين :
- اقتصادي جدا اقل حاجة جبتها 7.2 لتر لكل 100 كم
- بس انا كنت بختبرها في وسط البلد في الزحمة عملت 8.4 ..
- على الدائري المؤشر مش بيزيد عن 5 .. LOOOL

السحب :
بحس العربية وحش متحضر .. عمرها ما ترفضلك طلب .. يعني في المدينة
هادية في الشارع الهادي وبتجري جدا لما تحب تجري بس فيها زي وقت بسيط
كده لما تدوس متوسط عشان لو حبيت ترجع في كلامك .. و دي احسن حاجة
وخاصة لو لسه مش متعود على الأوتوماتيك زيي ..

الماتور :

-العربية متلينه جاهز .
-وهي واقفة ملهاش صوت نهائي .. متعرفش شغاله ولا لأ
-انا مشغل التكييف على الآخر والعربية واقفة والRPM 800 تقريبا ..
- طبعا العربية مواصفات سعودي يعني مروحتين تبريد و فراغات بالهبل حوالين الماتور..
- الماتور متنظم جدا جدا جدا نصيحة الكل يروح المعرض يتفرج عليه .. أساسي ..
- كل حاجة تخصك موجوده قريب منك الزيت والرادياتير والبطارية و سائل الغسيل ..

التحكم والثبات :

العفشة بتاعت العربية ناشفة شويتين وعالية شوية وواضح اول لما تركبها .. بس ميزة رهيبة في المطبات ..
- حجم العربية بيديك الثقة تدخل في أي مكان .
- اخدت ملف واسع على ال 80 من غير ما اسمع صوت الكاوتشات نهائي
- الدريكسيون بيطلع وينزل ويقرب ويبعد
- الدركسيون الكهرباء خفيف خرافي على السرعات البطيئة ..
-الدريكسيون بيتقل اوي عند ال 120 كم و الثبات يخليك عاوز تجري بس مش انا ..
-احساسك بأبعاد العربية جميل جدا دايما حجمها اقل من الي انا عامل حسابه ..

مميزات جانبية :

-المساحات رائعة و سائل الغسيل فكرة جديدة بالنسبة لي ..
-تنبيهات مختلفة على حسب الستخدام ( المفتاح - الفرامل - الكشافات )
-يوجد درج تخزين صغير يسار السائق جنب الدريكسيون للرخص . رائع ..
-مصباح الداخلي لا ينطفي حتى تغلق السنتر لوك من الخارج ..
- السيارة لاتعمل إلا على ال N or P .. ولا يخرج المفتاح إلا على ال P
-يمكن وضع السيارة على الN عن طريق وضع المفتاح في مكان جنب الجير ..

السلبيات :

- درج التخزين الأمامي ضيق جدا ..
- الأبواب منخفضة شوية بالنسبة للأرصفة العالية الي في مصر
- تانك البنزين تحت الكرسيين الي قدام فكرة مش حلوة خالص
- مجال الرؤية من الزجاج الخلفي ضيقة قليلا
- المكان الي قدام الكرسي الي جنب السائق ضيق شوية
- أكتر عربية في مصر عملت 5000 كم فمفيش أكسيسوري خالص و قطع الغيار غالية سنه ..
- التكييف بياخد وقت لحد أما يبرد بس لما يبر بيبقى تلج ..
-طبعا العربية مش فل أوبشن قوي ..يعني :
* لا يوجد كشافات ضباب
* لايوجد كراسي خلفيو قابلة للطي
* لايوجد جنوط سبور
* لايوجد في المراية الوسطية زرار أوسط لتجنب النور العالي
* لايوجد زراير في الدركسيون
* لايوجد ريموت وانذار ولا حتى في التوكيل ولو حبيت تركب بتاع السيفيك ب 2000 جنيه و بدون الصوت يعني سنتر لوك و فلاش فقط ...
* لايوجد مساند أمامية أو خلفية
* لايوجد مراية في الشماسة الأمامية

كلمة ختامية :

أنا اخترت العربية دي عشان هي تنفع أسرة وسهله ومريحة في الاستخدام
عشان اخواتي هيسوقوها .. و سعرها غالي صحيح بس هي الأحسن من
فئتها السعرية ( لحد السيراتو الجديدة الي بعتبرها المنافس الوحيد في السعر) ...

اذا كنت ناوي تجيبها هتنبسط جدا بيها و مش هندم أبدا بس خد بالك من كل السلبيات الي انا كتبتها ..

العربية ممكن ما تكونش احسن عربية في الجري بس عاقلة جدا .. يعني
بتغطي استخداماتك كلها ( في مصر بالذات) و تعدي اجدع مطب وهي مليانه ناس ..

أتمنى أي تكونوا قد استمتعتم بالتقرير
والسلام عليكم ورحة الله وبركاته .

أخوكم
عبدالملك