الموضوع: انت من النوع اللي بيفتري علي العربيه ؟؟؟

المشاركة الأصلية كتبت بواسطة drift_lover

ده انت بتوقعني بقي.

ال 128 :
اول ما جبتها اتشدت شده محترمه. (عافشه + موتور )
وكانت أول عربيه.
عملت بيها كل حاجه. ومشي بيها علي كل الطرق (ولأول مره ). وبعد شهر كنت كل حاجه فيها باعملها بايدي.
ماكنتش باعمل دريفتات في زفه او فرح. لكن بطبيعة الحال كنا بنتجمع انا وزمايلي وبنعمل دريفتات في ساحات الانتظار في راس البر وجمصه والمنصوره. من باب الاستعراض... وكانت النتيجه انه دايمآ العافشه كانت سايبه وكل اسبوع اعمل فيها شغل.
لكن أتذكر في شهر غيرت شداد الموتور 3 مرات.
وبعتها لسببن (1: الرغبه في التغيير لدفع خلفي وسياره أكبر "132"
2: كان كل يومين يظهر فيها مشاكل في العافشه واللي كانت عاوزه تتغير بالكامل )
ومع ذلك ال 128 استحملت البهدله عن ال 132
وخللوا بالكم انا بقول بهدله... لاني فعلا ماحافظتش عليها وكانت مسيطره عليا نشوة الدريفتات.

ال 132:
العربيه اشتريتها فيها حدفه شمال. ودي كانت من فردة شاسيه. غيرتها هي والركبه. بس كان ليها موتور جباااااااار. مالوش حل في السحب.
بس طبعآ المشكله انه مابستحملش دريفتات لا هو ولا العافشه زي البيجو 504 او العربيات الحديثه.

اول مره عملت فيها شغل كنت راجع من القاهره وقرصت عليها وفضلت ماشي 180/185 لمدة 1/4 ساعه ( وكانت اول وآخر مره ومانصحش حد بكده طبعآ )... والنتيجه انها قبل كفر شكر بشويه جابت سبيكه ساحت ولفت علي عمود الكرنك... وكان قدامي حل من اتنين. يأما العربيه تتشد لحد المنصوره يإما نسايسها لحد ما نوصل.
وبالفعل اخدناها لحد المنصوره في 8 ساعات بسرعه اقصاها 20 كم/س. وكانت النتيجة نصف عامره. خرطة كرانك + طقم سبيكه. (والمشكله كانت نتيجة ان العربيه مسكت حراره ).

المره التانيه:
كان عيد ميلاد واحد صاحبنا. وقعدت اعمل بيها دريفتات لحد ما الماكينه بطلت وحلفت ماهي دايره.
وزقيناها لحد الورشه... وهناك الميكانيكي ذهل لما لقي ( بي إل ) معووج... المفروض يتقطم ويكسر الفارغه. لكن نادر جدآ انه بتعوج.
ودي كانت تاني عامره.

المره التالته في فرحي:
كان جاي اصحابي واصحاب اخويا كتير من بورسعيد يجاملوا وما ادراك. ويومها هو قاللي بلاش اسوق العربيه. بس انا ماسمعتش الكلام وخليته يسوقها...
ويومها فعلا كانت مهزله... (العربيه كانت معمره قبل الزفاف بشهر تقريبآ )..
الرجاله دخلت وسخنوا...
وكانت النتيجه عامره تالته...

وبعتها لسببين برده:
1 : الرغبه في التغيير لموديل أحدث ومستوي رفاهيه أعلي في القياده.
2 : العربيه كانت وصلت لمرحله عاوزه مصاريف. وانا مش فاضي لها.

اللانوس :
طبعآ مافيش حاجه من الكلام ده خالص.
وعلشان كده والحمد لله من اول ماجبتها مافيش غير غيار الزيت والبنزين. ووقت ماعاوز تسافر بتسافر.

عربيات زمايلي :

Bmw 320i : كنا راجعين من بورسعيد . وكانت سرعه جنونيه (لا داعي لذكرها ) العربيه طارت في مطلع ومنزل كوبري وطارت من علي الارض حوالي 1/2 متر...
والنتيجه تغيير عافشه أماميه كامله اتكلفت حوالي 12 الف جنيه... والحمد لله ربنا ستر وماكانش في خسائر أكثر من العافشه.

فيات 132 : 1800
كنا مره في اوتو كروس ومغيرين ليها فواني (بيكات). وفلاتر رياضيه...
والنتيجه (بي إل ) إتكسر وكسر فارغة الموتور. وتغيير موتور بالكامل...

وافتكر من سنتين كنت باسوق عربيه شاهين بتاعة واحد صاحبي لأول مره باجربها. وكانت آخر مره لما لاقاني قرصت عليها.

برده مره واحد صاحبنا كان بيتعلم الدريفتات في راس البر. وكان معاه بيجو 504 ماعرفش يلم العربيه دخل في صف عربيات كامل حوالي 6 عربيات (العربيات كلها بتبقي واقفه وشها للساحه ) وهو لطشهم بالجنب... ومن ضمنهم عربيه اوكتافيا ماكانتش لسه علقت نمر...

ده اللي ممكن اتذكره دلوقتي.


واللي طلعت بيه من الليله دي.
انا باعشق الدريفتات لكن استحاله باللانوس (ماحصلش حتي وطلعت بيها امريكاني ولا مره ) لسببين :
1- ماعنديش استعداد لوقفة الورش.
2- مافيش امكانيات اني اصرف آلاف عليها او اجيب عربيه تانيه للاستعمال الشخصي.

وياريت مانبصلهاش علي انها حاجه غلط او وحشه. دي رياضه زيها زي اي رياضه... بس تكون في المكان والتوقيت المناسب...

بسم الله ما شاء الله
دا انت تاريخ يا ررراجل

انا بفترى على العربية دايما بس على الطرق المفتوحة
وعلطول امريكانى وتخميس وكل الى يخطر على بالك
بس بحبها اوى ومبرضاش اجرى على طرق مكسرة او اكل بيها مطبات

أنا بحترم العربية جدا وبطلع بيها حبة حبة لدرجة إن اللى راكب جمبى بيقولى إنت ماشى على قشر بيض بس بسحب ببطء لحد ما أوصل للسرعة اللى أنا عايزها مش بحب أسمع صوت زنة الموتور أبدا وكمان عربيتى أوتو لكن أحيانا بقرص جامد فيها من غير أى ظروف

قليل وقت الزحمة وده مع الفيات
وعموما معرفش الجري يتقصد بيه فالموضوع افتري ولا لا