الموضوع: -- الحمــد لله إمبــارح برابــريــز و إنهـــاردة حـــادثـــة

السلام عليكم ورحمه الله وبركاته
قدر الله وما شاء فعل
طبعا انا بعد الحمد لله مش قادر اوصفلكم قد ايه انى اتبسطت بعد ما اتغميت من الخبطة
يا جماعة انا مش متخيل ان ليا اخوة في الله احبهم ويحبوني في الله بالمنظر ده
كمية التليفونات اللي ما بطلتش على الموبايل لدرجة اني قفلت الويتنج عشان محدش يزعل لان كان اكتر من مرة اتنين يكلموني في وقت واحد
وكتير قوي يكلموني على الموبايل ومعايا حد من احبابي منكم على تليفون البيت
اجي النهاردة ادخل على المنتدي الاقي عشرات الرسايل من الناس بتسال عني وعن العربية
بجد كان احلى هدية من ربنا في رمضان ليا اني اعرف ان كل الناس دي بتحبنى لله في لله بدون قصد ولا مصلحة
والاحلى واجمل انى الاقي ناس يمكن ما شوفتهمش او شوفتهم مرة واحدة بيعرضوا عليا فلوس (على استحياء) او يجوا يقفوا معايا او يدلوني على صنايعي كويس يعرفوة
فعلا شاكر جدا جدا جدا جدا ومش هاتكفى الاحرف ولا الكلمات انى اوفيكم حقكم في وقوفكم جنبي لحظة بلحظة
--------------------------
نيجي بقى للي حصل
صليت الضهر في الشغل وخارج الساعة 12 من قدام المبنى في النزهة ولسه بلف لقيت بوم طااااااااااااااخ
بوم مش فيا لكن طاخ هيا اللي جت فيا
عربية شيفرولية نص نقل دخلت في تاكسي لادا من القوة لبس في شنطة عربيتي لقيت دماغي لبس في الازاز (اللي لسه مركبة)
عشان ماكنتش لسه ربطت الحزام
الخساير عندي فانوسين وفانوسين مارشيدير والشنطة التعوجت بالقفل بتاعها والاكصدام انبعج لجوة وظهرت البوزين الشاهيرين بتوه اكصدام الكرولا لبرة

الادا شنطتة اتعجنت وقدام رفرف وفانوس اللي دخل بيهم فيا
الدبابة اكصدام وفانوس ورفرف وشبكة بصدر(الادا روقتها)
سواق الدبابة سوداني عندة حوالي 50 سنة ولو شوفتة في الشارع تطلع اللي فيه النصيب وتديهولوة
محدش رضي يمشيها ودي بلغت النجدة وجم عملو معاينة وروحنا على القسم صاحب الشركة بتاعت سواق النقل جه وعلامات الايمان ظاهرة على وشة وزبية الصلاة في وشة قد كدة وملتحي تفائلت خير وقولت هاخد حقي خاصة انها شركة نقل سريع كبيرة ومعروفة واكيد متامن على عربياتها
لسه بقولة اللي عندي لقيت علامات الايمان اتمسحت وقلع اللحية والنور اطفي والزبيبة حطوها في كوباية خشاف واتحول لبني ادم تاني وانا مش مامن والسواق الغلبان ده هو اللي هايدفع وانا مش دافع وحاجات من دي كتير
اطرف ما في الموضوع ان الامين خدني على جنب وقاللي ان لو اتعمل محضر هايجيلك مخالفة سير وتدفع 58 جنية للدولة

ابقي متضرر وادفع
كلمت والدي فهمني اني لازم اعمل محضر بس الحق المدني هايجي على الشركة وموت يا حمار (لا مؤاخذة) والحق الجنائي هايجي على السواق واخرها حبس 3 شهور لو التلفيات معدية معرفش كام وكله بياخد وقف تنفيذ على ايد اقل محامي درجة عاشرة(محدش بيتحبس عشان خبط عربية)

نظرا لظروف السائق سبتة لحال سبيلة وقلت لصاحب الشركة اني مش مسامحك ليوم الدين ضحك ضحكة صفرا والسواق كرامتة نقحت علية وقاللي انا اقدر ادفعلك 200 بس سيبني يومين عقبال ماكون قبضت قولتلة المعوض هو الله مش هاتيجي على ال 200 جنية اللي هاتروح تستلفهوملي لان عرفت ان مرتبة اقل من 400
يعني واكلينة لحم وعضم اصحاب الشركة

روحت الحرفيين وربنا كرمني بسمكري من تلامذة حسن دبوس عملي الشنطة كلها على البارد وظبطلي الكصدام واطمنت ان حوض الشنطة ماحصلوش حاجة والحمد لله
وغيرت الفوانيس وجيت

الحمد لله على ما اصابني ولله ما اعطى ولله ما اخذ بس هيا خبطتين جامدين عشان ورا بعض يوم ازاز ويوم خبطة

يقول المولى عز وجل
{ ما أصابك من حسنة فمن الله وما أصابك من سيئة فمن نفسك } (النساء:79)

فالواحد لازم يدور كويس على اعمالة لان اكيد في حاجة مش مظبوطة والحمد لله انه بيعجل لينا بيها في الدنيا

شكرا مرة تانية على اهتمامك وسؤالكم
والقاككم على خير غدا في المقابلة عشان ماتكلوش فول وطعمية (ده لو لقيتهوم ساعة الفطار )
:P :P

اخوكم في الله
كريم منير

متشكر قوي يا جماعة على سؤالكم عليا وربنا يديم المعروف اللي بيننا