الموضوع: مشاكل و ياريت نقدر نحدد مع بعض

صباح الفل يا باشوات - محمد الطنانى وصل
نبدأ بالصلاة على النبى عيب عيب عشان مانتوهش من بعض
1. العفشة اللى عندك يا باشا كذا حاجة مش حاجة واحدة و نبدأ من الأول
- البيض بتاع العربية ياأما خف يا اما باظ خالص لو خف هيتكبس و يرجع زى الفل
- كاوتشات الميزان و المقصات و البارات ما عدا بارة الدركسيون دى ليها قصة حلوة معايا
- بارة الدركسيون و العلبة لو العربية عندك و انت ماشى و مهما ضبطت عفشة و اتزان و ترصيص و بتعوم و عايز تتأكد منها على فواصل اى كوبرى معدنى زى كوبرى العباسية او احمد سعيد او الجيزة تلاقى الدركسيون بيلعب فى ايدك فى الحالة دى لو جبت كاوتش من بلادها برضو مش هتضبط و ليها لعبة حلوة و مش مكلفة يمكن تمن نص كاوتشة بارة اصلى و تنسى الموضوع ده لغاية ما تبيع العربية
- المساعدين فى الفيكترا ليس متن السهل على الأطلاق ان المساعدين و السوست يحصلها حاجة ممكن الطاحة البلى بتاعها يشخلل و ده برضو يعوم العربية و ينشفها جامد
كل اللى فات ده لو اتعمل صح و بحق ربنا و عند واحد فاهم مش حتة ترزى يخيط و يربط و يلحم و خلاص هتلاقى العربية حاجة تانى خالص غير قبل كدة بس برضو انت مركب كاوتش بقاله اد ايه و مقاسه كام و ان كنت انصح بالكاوتش الجى تى اسبورت 195/60/14 ممتاز و هو ده المقاس الصلى للفيكترا ايه
2. الفتيس غير الزيت ده مهم جداً و اكشف على الأسطوانة و الدسك مع العلم انى للأسف مش هأقدر افيدك فيه لأن عربيتى سبورت فيرجن 2000 سى سى بفتيس مانيوال
3. السروجى و ده بقى امرة اسهل ما يمكن بس خليك فى واحد معرفة عشان دول دباحين
- السقف عندك لو عايز يتشد كله سلوتكس و تقويات و كسوة فى حدود 170/180 جنية
- الكراسى لو مقطعة تتلم و تتحشى و تجيب كسوة جلد ب 350 جنية من التوفيقية و انساها خالص او قماش نضيف ب 200 - 225 جنيه
- الأرضيه ممكن تتكسى جلد او موكيت و دى حسب طلبك و ترجع فابريكة
- الأبواب و دى محدش يقدر يجى ناحية الجلد اللى صنايعى صح سيبك من القماش امرة سهل بس كبس الجلد بتاعها غاية فى الرذالة انك ممكن حد يلصقوا و بعد شهر بكبيرة يبقى كل جزء مستقل بذاتة
العربية تتشد من الألف للياء من جوه - الصالون يعنى بحوالى 1000-1300 جنية بالمصنعية بالمشتريات و حسب الخامات اللى هتحتاجها
3. تكييف اوبل العنيد و اسوأ ما بها بص يا باشا لو متأكد ان الكباس تعيش انت و مالوش لازمة اشترى كباس ساندن يابانى ب 1000 جنيه و تعمله قاعدة عند الخراط و وشوية تعديلات فى اخراطيم بس انسى و لو مش عايز تعديلات ممكن تجيبة استيراد لأنه جديد فوق 3000 جنية - عندك تسريب و لا لأ - الكويل حالته ايه ممكن تكشف فى التوكيل و تصلح برة مع العلم و كل ملاك الفيكترا عارفين الكلام ده ان تكييفها بارد و ليس ثلج زى اليابانى يعنى يادوب ميخليكش تعرق و و لو عايز تكشف عليه ممكن اجيبلك حد فى شبرا و جامد قوى بس هو صاحب واحد صحبى اجيبلك عنوانة و تليفونة و يعمل معاك واجب بس انا لم اعامله و صاحبى بيقول عليه جامد و محترم بس تكييف الفيكترا فيه ما يسمى هاى برشر ريلس فلف - او بلف تفريغ الضغط العالى و ده مأساة الفيكترا اللى ممكن يخلى واحد بتاع تكييفات حمار يرمى الكباس بسببه لأنة الكباس بيبقى بينفخ فى اربة مقطوعة ينفخ من ناحية يدور الفريون قبل ما يخش الكويل عند السسبنشن و هو الموجود فى السوق نوعين
- نوع لو هتشحن فريون امريكى و ده مش موجود غير فى التوكيل و النوع ده ب 125 جنيه
- نوع لو هتشحن اى نوع فريون - بولندى - اسبانى - هندى - ده ب 250 جنيه و ده معامل الضغوط بتاعه اعلى لأن الفريون الموجود فى السوق كثافة ضغوطه عالية
التكييف موال كبير لازم تتأكد من الخراطيم و الكبس و المراوح الأمامية و الخلفة و كفائة السرنتينة و مدى تثبيتها - وده مهم جداً لأنها فى اغلب الفيكترا هتلاقيها واقعة عشان راكبه على برشام و اى تريحه بتفك البرشام - و انا ضبط القصة دى كلها من شهر و لغاية اخر حاجة امبارح
شوف طلبات حضرتك اية بس المفاجأة بقى انا برضوا ساكن فى الجيزة و مشوار من شبرا لغاية عندنا عارفه كويس و اى خدمة ممكن ابعت لحضرتك تليفونى تكلمنى ليل او نهار
اسف على الأطالة