للشباب المحتاج شقة سعرها قليل

**momo100010** · 22-05-2009 11:37 AM

السلام عليكم ورحمة الله وبركاته

الاخوة الكرام
اعضاء النايل موتورز
مبدئيا
انا كنت نفذت فكره عمل موضوع لشباب اللى زي حالاتي
يكون فيه كل المشروعات الجديدة اللى احنا رحناها ونساعد بعض
الموضوع ف الموقع التانى لاقيته فيه اقبال كبير جدااااا
انا فكرت انى اعمل الموضوع دا هنا
ودا لانى عايز اخدم اعضاء الموقعين ( نظرا لان حياتي ف الموقعين دول )

يريت اللى عايز عرف
العبد لله بقاله 3 سنين بيدور على شقة
ولفيت ف كل حته تتخيلها ولا تتخيلها
ولكن ف حدود اسعار الشباب
انا هبدا بمشروع دجلة جاردنز
هو اول مشروع ببدا بيه
ويرب يكون فتحة خير
ويبقى بيساعد اخوانى ف المنتدى

[;]

السلام عليكم ورحمة الله وبركاته
الاخوة الكرام
احنا كلنا سمعنا عن المشروع اللى ف كل جرنال(معارضة او جمهوري)

مشروع دجلة جاردنز
وانا كنت في فرع مصر الجديدة (67 تقاطع شارع الحرية مع شارع عمر ابن الخطاب)
مبدئيا
اللى مكتوب ف الجرنال عن الاستلام اللى بعد 6 شهور وبالتحديد ف 8 / 2009
الكلام دا مش مظبوط
انا لما اعدت مع مندوبة المبيعات بتاعة الشركة قالت لى ان المرحلة اللى هتتسلم ف 8/2009 خلصت ف اول يوم
(وطبعا انا مصدقتهاش لان اللى متوقعه ان المرحلة الاولى كلها للناس المعارف)بس برده دا توقع وليس اكيد
المهم نيجي للمكان
مكان المشروع اللى بيقولوا عند 6 اكتوبر
هو على طريق مصر الفيوم وبالتحديد عند جامع هناك عالطريق قبل منطقة دهشور العسكرية
تدخل يمين وحوالى 15 دقيقة وتبقى داخل الموقع
وبرده المكان انا هقوله لكم بالتفصيل لانى رايح ان شاء الله يوم الجمعة ف الموقع
وبالمناسبة
في اوتوبيس كل يوم بيطلع من قدام الفرع اللى كتبت لكم عنوانه فوق
كل يوم الساعة 11 صباحا
يوم الجمعة الساعة 2 مساء
ودي صورة للخريطة
معلش انا مش عندى كاميرا كويسه اصورهالكم بيها
بس هتصرف ان شاء الله واطبعها عالاسكنر واحطهالكم
نيجي لطريقة السداد والكلام اللى كنا نسمعة ونقراه ف الجرنال
وتيجي تكلم الشركة على الخط الساخن
يقولوا لك (حضرتك تشرفنا بزيارتك وتفهم كل حاجة)
نظام السداد
ولو مش باين ف الصورة انا بكتبه دلوقتى ف جدول وورد
وهحطه برده
بس دي الورقة اللى ادوهالى ف الشركة بتاعة الاسعار

نيجي لمساحة الشقة
مساحة الشقة 80 متر
وبتبقى صافي 67 متر(دا اللى بيقولوه) لكن لما اروح اتفرج على الشقق هناك هشوفها واقول لكم)
وبرده
انا بكتب دلوقتى المقاسات (اللى هم كاتبينها )
مع الاسعار وهنزلها اول لما تكتمل

هكتب الحااجات اللى قلت لكم عليها واحطها لكم هنا برده
ولو في اى حد عايز يستفسر عن اى حاجه
انا تحت امره

محمد جودة
0183004609

]

ودي بعض الصور لانظمة التقسيط
والموقع

الصورة الاولى :
جدول نظام تقسيط دجلة جاردنز
انا اللى كاتبة
التناى مش واضح من التصوير
الصورة اهه

الصورة الثانية :
جدول لبيان مساحات الشقة الداخلية ( حمام مطبخ ريسيبششن الخ )
انا اللى كاتبها لان التصوير بتاع البلان شيت مكنش موضح الارقام

الصورة الثالثة :---
خريطة دجلة جاردنز

الصورة الرابعة :-----
جدول نظام التقسيط ( مصور )

**HeMa_LanCeR** · 22-05-2009 11:43 AM

جزاك الله كل خير

**MoOoD** · 22-05-2009 04:30 PM

جزاك الله خيرا على المعلومات ومنتظريين باقى التفاصيل

**bishoy02010** · 22-05-2009 04:57 PM

شكرا على المعلومات وفى انتظار تفاصيل أكتر

**أحمد فاروق سيد** · 22-05-2009 05:47 PM

" ِيبقى أنت أكيد أكيد فى مصر "
نصيحة دور فى طريق سقارة السياحى
ِالحرانية
حتلاقى شقق بأسعار خيالية
و فيه قانون قِديم
أبسط يا عم

**إبراهيم.صادق** · 22-05-2009 07:34 PM

بص فيه مشروع تبع إسكان الشباب برضه بتنفذه مجموعة شركات درة في مدينة الشيخ زايد وده موقع المشروع:
http://www.wikimapia.org/#lat=30.043...16&l=0&m=a&v=2

انا كنت اتصلت بيهم من فترة "حوالي 3 شهور" بتدفع مقدم 25000 وقسط شهري 700 لمدة سنتين بعدهم بتستلم "كاملة التشطيب" وتدفع دفعة استلام 15000 وقسط شهري 1500 تقريباً لمدة خمس سنوات بعد الاستلام
الحجز في مقر المشروع

نصيحة سيبك من دجلة انا شخصيا مش برتاح لهم صحيح ماعنديش دليل بس كفاية انه بيقولك مساحتها 67 متر مع انها 63 "ده من شروط الوزارة اللي مايقدرش يخالفها"

فيه مشروع تاني في أكتوبر كنت سألت فيه بتاع شركة ERA اسمه حي المنتزة ده كان عامل حاجة ظريفة انه قاسم الشقة الــ63متر على دورين ومعاها حديقة خاصة 40متر "عاملها تاون هاوس يعني" طبعا هي مساحتها صغيرة بس الميزة فيها الخصوصية يعني لا جار فوق منك ولا تحت منك وكمان طبعا هاتستفيد من الحديقة الخاصة،،، دي كان سعرها 195000 "كاملة التشطيب" تدفع 30% مقدم والباقي على 5سنوات

بالنسبة لمشروع أوراسكوم، رحت اتفرجت عليها في الموقع سعر الكاش كان92000 و98000 حسب الدور بس بصراحة ماعجبتنيش خالص شكلها مش ظريف تصميمها مش حلو والسلالم ضيقة جدا لانه عامل سلم منفصل لكل دور

فيه مشروع تاني في أكتوبر اسمه تاون فيو،،، بصراحة ماتصلتش بيهم ولا روحتلهم بس من اعلاناتهم في الوسيط باحس انهم ممكن يكونوا كويسين، و ده موقع الشركة على الانترنت:
http://www.townviewcairo.com/

خد بالك ان شرط الوزارة ان المرتب لا يزيد عن 1750 للأعزب أو 2500 للأسرة

**momo100010** · 22-05-2009 08:11 PM

[;1057701149]

ودا موضوع عن مدينة دي دجلة جاردنز
بس للامانة هو منقول

سلام الله عليكم

فيه عرض عاملاه راية سيتى

الموضوع كله انى رحت بنك الاسكان و التعمير اسال لو فيه اى مصلحة قدامهم

فلقيت المشروع ده بس

اسم المشروع راية سيتى بالسادس من اكتوبر

المساحات 63 متر مربع .. صافى

80 % م المشروع مساحات خضراء

مصعد لكل عمارة

جراج خاص لكل وحدة

سوق تجارى

مناطق خدمات

اسعار الشقة ( 108 الف - 114 الف - 119 الف ) حسب درجة التميز

جدولة السداد كالتالى

3600 دفعة حجز

8300 دفعة تخصيص

17954 دفعة تعاقد

648 قسط شهري لمدة 24 شهر

3591 قسط نصف سنوي لمدة 4 اقساط

و وقت ما تخلص من الكلام ده يكون فات سنتين و اندفع نصف تمن الشقة

و يفضل النص التانى اللى من حقك تقسطه مع البنك لو عايز او تدفعه كاش

الموقع بقى على بعد 10 كم من مدينة الانتاج الاعلامى

ايه رايكم ف الموضع ده

يعتبر مصلحة لا بلاش منه احسن[/]

**momo100010** · 22-05-2009 08:12 PM

[;1057701283]

مشروع المستقبل

فى قلب الشيخ زايد ضمن المشروع القمرى للاسكان مكانة الحى الثانى عشر المجاورة الاولى مدينة الشيخ زايد على بعد 800 متر من حدايق المنهدسين

تقسيط على 7 سنين دفعة مقدم 25 الف قسط شهرى 692 وحدات سكنية 63 متر دى بقى (((((((((شاملة التشطيبات))))))))

15 دقيقة فعليا من ميدان لبنان خدمات و مرافق النسبة البنائية 20% من اجمالى المشروع
مسجد و مطاعم و سينما و مول و غيرة دى مجموعة شركات درة

2---- حى المنتزة

حى سكنى متكامل بحدايق اكتوبر وحدات 63 متر ايضا حجز و تعاقد 10 % يبدا من 12500 و قسط شهرى 660 فى الشهر

تسليم مفتاح و فية فيلات تاون هاوس 63 و المشروع على مساحة 50 فدان طبعا حدايق و جراجات و غرة و فية زيارت مديانية لمشروع

3- مصر ايطاليا الحى الايطالى

دة فية منة فى 6 اكتوبر و فية منة فى مدينة بدر و طبعا نفس الافلام الىل فاتت دى بالضبط

على فكرة انا عندى كل ارقام تليفونات الشركات دى و نزلت بيها اعلانات فى الجرايد الرسمية

دى عينة من المشاريع اللى تقريبا فى نفس المساحة و نفس الشروط

راى انا بقى ياباش مهندس بعد ما شوفت الافلام دى كلها و نصيحتى ليك انا مش باحب الكلام على ورق
انت روح بنفسك و شوف على الطبيعة

مع انى ليا وجهة نظر فى حاجتين الاول مساحة الشقة ضغيرة جدااا

ثانيا موضوع الشركات لو بتعمل الشقق دى بدون تشطيب دى مشكلة كبيرة جدااا

ثالثا مش باحب اشترى سمك فى مية ياترى شكل المشروع دة هيبقى اية الله اعلم يبقى

لازم تروح بنفسك و شوف و بعدها قرر
وربنا يقدم ليكى الى فية الخير باذن الله

منقوووووووووووول

[/]

**momo100010** · 22-05-2009 08:18 PM

[;1057792609]

السلام عليكم ورحمة الله وبركاته

الاخوة الكرام
اولا اعتذر انى اتاخرت ف الموضوع دا ولكن والله ماكان بايدي انا مجهز الموضوع قبل دلوقتى باسبوع
ولكن للاسف الكومبيوتر باظ ولسه مصلحه امبارح
والنهارده هنتكلم عن موضوع

زهراء مدينة نصر

دا وبالاخص الاعلانات الكتير اللي بتقول لك( ارقى اماكن زهراء مدينة نصر) وعلى الرئيسي
وتلاقي سعر الشقة ال 80 متر مثلا عامل 75000 جنيه
فتقوم تقول دي فرصة
ودا طبعا لما تعرف ان الشقة ف زهراء مدينة نصر(الاصلسة)
اللى هي مشاكن الظباط غالبا
سعر الشقة ال 80 متر برده يصل الى 130 و 140 الف جنيه

اربع اطراف وهي بترتيب الشرح
القسم الاول : على طريق مصر السويس واسمها الحقيقي 4.5 او عزبة الهجانة
القسم الثاني : اخر شارع الورشة سابقا ( شارع الزهور حاليا ) وتسمى ب مساكن الشروق
القسم الثالث : الناحية الثالثة وملهاش اسم اسمها 4.5 (ولكن طبعا اتغير اسمها الى اخر مترو مصطفى النحاس شمااااال )
القسم الرابع وبرده 4.5 من ناحية رابعة (واسمها الكودي دلوقتى خلف مخازن السلاب )

طيب نتكلم بقى عن زهراء مدينة نصر اللي قصدهم عليها
قبل ما نتعرف على هذه الزهراء مدينة نصر الجديدة
لازم نبقى عارفين بعض المناطق الهامة واهمها

عــــــزبــــــة الـــــهـــــجـــــــــــ ــانــــة

او 4.5
وهى دي المقصود بها زهراء مدينة نصر
نشرح بالبلدي بقى
اولا عزبة الهجانة دي ماسكة اربع اطراف
هي كبيرة جدااااااا
ومنطقة عشوائية طبعاااا
جانب على طريق ( مصر - السويس )
ودا اللى ماقدرتش تغير اسمه لانه وااااااااااقع للاسف ولا يصلح انه يكون منطقة ابراج ويتغير اسسمه كما تغيرت باقي اركان الل (4.5) ودا لعدة اسباب اهمها
الموقف بتاعها
طيب
والطرف التانى هنلاقيه برده على طريق مصر السويس وهو امتداد 4.5 ناحية مساكن الشروق
او شروق النادي الاهلى
ودا كان مدخل يسمى بشارع الورشة
بتدخل يمين بعد نهاية الشارع تلاقى مساكن الشروق ( بتاعة الظباط )
وفي الشمال تلاقي امتداد 4.5 مع نهاية شارع الورشة سابقا (شارع الزهور حاليا)

ومش عارف ايه علاقة الورشة بالزهور

المهم ودي مجموعة المباني اللي بتتبني خلف الشروق (بدون ترخيص - اغلب الشقق ف حواري وعلى مناور يعنى مسجون طول عمرك )
ودي اللى الاخ الكريم اتكلم عن ال 1500 جنيه شهريا ودفعة الاستلام بتاعتها ( مع ان هي كده غالية جدا بالنسبة للاسعار اللي هناك)
لو لفيت اكتر هتلاقي احسن من الاسعر دا بكتير
وفي عربيات ربع نقل بتروح من موقف 4.5 لهناك ب 15 قرش او ربع جنيه

المهم
احنا كده مسكنا الطرفين اللى على طريق مصر السويس

وندخل بقى كده على الطرف الثالث والرابع وهما ناحية زهراء مدينة نصر الرئيسية

الطرف الثالث

وهو نهاية عزبة الهجانة من الطرف الثالث
والمنطقة المزعومة ب اخر مترو مصطفى النهاس شمااااااااال
ارقى اماكن زهراء مدين نصر
مع انك لو مشيت بالظبط ف المنطقة دي اللي هي رخيصة طبعا
ودا لان هناك في جامع وبعده في مساكن (ماعرفش صراحة بتاعة ايه بس غالبا حاجة زي مشروعات الشروق)
وبعدها ابراج عفيفى
وبعدها تبتدي تدخل بقى على الوكر الثالث او المكان الثالث
وهو جنب التبة او قريب منها
المهم ان وانت رايح المنطقة دي
لازم هتعدي عالتبة
ومع العلم برده ان في عربيات ربع نقل بتروح (زي مواصلات داخلية كده) هناك ب 1/4 جنيه
ارقى مناطق ف زهراء مدينة نصر
وبرده دي سعر الشقة فيها قريب من سعر الشقة ف الطرف بتاع مساكن الشروق ( مالم يزيد سعر الشقة ف الركن اللى ناحية الشروةق شوية لقربها من ( المنطقة النظيفة اللى( بتتلزق ) فيها

الطرف الرابع :

وهو الطرف الاخير من 4.5 وعزبة الهجانة
وهو المنطقة برده اللى ( ارقى اماكن ومواقع زهراء مدينة نصر)
خلف مخازن السلاب
ودي نهاية 4.5
بس انا كنت عايز اقول على حاجة مهمه جدا ف المنطقة دي بالزاات
انت وانت داخل ناحية مخازن السلاب اخر الشارع هتلاقي حته هو كده (بيقولوا انه هتبقى نادي الطلائع نادى قوات مسلحة مع العلم ان ليا اصدقاء ف المجال دا ومسمعوش عن النادي دا خالص )
المفروض انهم يبقوا عارفين على الاقل
المهم وانت رايح عالنادي هتلاقي شارعين
شارع يمين ودا بيوديك على اخر 4.5 ودي سعر الشقق فيها رخيص جدا
ويكاد يكون ارخص منطقة
اللى هي شارع حسني مبارك
ودا زي اللى قبله وله برده مواصلات من الموقف بتاع 4.5
ولكن

تحذيييييييييير

من الشارع اللى يمين

انا معرفش حاجة مثبته
ولكن انا كنت هناك واقف مع سسمسار
وقلت له
العمارات اللى ف اليمين
قال لى دي عليها مشاكل ما بين ناس تقيلة ف البلد
وممكن تلاقي الشقة بتاعتك اتباعت لك ولواحد تانى
وتدخل ف سكة المحاكم
انا معؤررفش مدى مصداقية الراجل اللى كنت بتكم معاه دا
بس انا رايي
لو انت قررت انك تاخد هناك
مش شرط يعنى الشارع اللى شمال دا

المنطقة دي كلها طبعا بدون ترخيص بناء

المنطقة دي كلها التسليم عالمحارة او الطوب الاحمر

المنطقة دي كلها الله وحده هو اللى اعلم مستقبلها ايه

نيجي بقى عالى المنطقة اللى انا شايف انها ابعد عن 4.5 شوية
وانا رحتها شخصيا
ونازل بكره الموقع بازن الله
وهصوره لكم
وهو نهاية الزهارء يوجد سنترال مدينة نصر 3
امامه منطقة عاملة زي المناطق اللى اتكلمنا عليها
ولكنه بعيد عن 4.5
انا رحت لاحدى الشركات
واستفسؤت منهم عن النظام
وكالعادة

هعمله ف موضوع تانى
بس كمان شوية
لان ايدي وقفت بصراحة

قبل مانسى
هتلاقوا اسعار شقق قليل
ف كل الاماكن دي
وتيجوا تسالوا
يقولوا لك التسليم ف اخر 2010 او 2011 او 2012
ودول يبيعوا سمك ف ميه
العمارة ممكن جدا تتعمل ف 6 شهور
ولكنه بياخد منك الفلوس
ويستنى لحد ما اسعار الحديد والاسمنت وغيره من مواد البناء ترخص
وبراحته بقى
وانت اللى بتفضل تجري وراه
لان انت اللى عايزه دلوقتى
علما بان الشروط الجزائية غالبا بتبقى لصالحهم
اسف انى طولت

واتمنى ان الموضوع دا يفيد ولو واحد بس

ويريت اللى يلاقي ان الموضوع يستاهل التعب دا

يدعي لي ربنا يكرمني

ويكرم الامة الاسلامية بالكامل

ويدعي ل صديقي ويقرا له الفاتحة

[/]

**momo100010** · 23-05-2009 11:32 PM

[]

السلام عليكم ورحمة الله وبركاته

الخوة الكرام
انا هدخل ف الموضوع على طول
اسم المشروع : السبحي جاردنز
موقع المشروع :----
اللي مكتوب : بالنص
( السبحي جاردنز تقع على طريق مصر الإسماعيلية الصحراوي مباشرة قبل مدينة العاشر من رمضان وامام مدينة الشروق واستيلا مصر الجديدة .
10 دقائق من مدينتي وسوق العبور وكارفور العبور وموقف السلام والطريق الدائري .
15 دقيقة من مطار القاهرة ومصر الجديدة . 35 دقيقة من ميدان التحرير ورمسيس والعباسية . و 40 دقيقة من ميدان لبنان ) .
دا اللى مكتوب ف البلان شيت
ودي صورة للكلام دا من البلان شيت

وهتلاقو كليب مرفوع ف المرفقات لو الصورة دي مش واضحة
نيجي بقى لرحلة العذاب تاعتي يوم الخميس اللي فات
واللى ابتدت ب انى
كلمت الشركة واخدت العنوان ف الدقي واخدت رقم تليفون احدى العاملين بخدمة العملاء
علشان انا مش هبقى عارف الطريق ف يوصفلي
وفعلا بعد عناء ( لا يذكر بالنسبة للى حصللي ف الاخر )
المهم اعدت معاه وقال لى على المشروع كموقع
زي مانا كتبته لكم فوق
ونقول :

نظام بيع الوحدات
دي صورة للي هكتبة كله ولكنه علشان مش واضح ف انا هكتبه

أولاالنقدي كاش :-
يبدأ من 79.900 جنيه إلى 84.900 جنيه بالإضافة إلى 10.000 جنيه دعم الدولة عند الإستلام ( على دفعات خلال 12 شهر بدون فوائد ) .
ثانيا التقسيط لمدة تصل إلى 15 عـــــام :

ثالثا الأوراق المطلوبة للحصول على الوحدة :--
1-
أ- شهادة دخل للاعزب اقل من 1750 جنيه شهريا ( على اعتبار ان دا كده محدود الدخل ) .
ب- شهادة دخل للاسرة أقل من 2500 جنيه شهريا .
2- صورة الرقم القومي وألا يقل سن المتقدم عن 20 عاما ولا يزيد عن 50 عام .
3- مفردات مرتب معتمدة للعاملين بالقطاع العام والحكومة .
4- شهادة من التأمينات بالمرتب معتمدة ومختومة للعاملين بالقطاع الخاص .
5- للذي تجاوز سن ال عشرين ولا يستطيع إثبات الدخل ، يجوز ان يتولى أحد الوالدين أو الأقارب السداد وضمان المستفيد .
6- أصحاب العمل ، تقديم السجل التجاري والبطاقة الضريبية .
7- تقديم صور الشهادات الرسمية المثبتة للحالة الإجتماعية ( بيان الحالة الإجتماعية أو صور من وثيقة الزواج وشهادات الميلاد للأبناء ) .

انا كتبت الكلام علشان لما صورته ما ظهرش اوي
وعامة دي صورة لل
اوراق المطلوبة للحصول على الوحدة

انا كده خلصت اللى حصل لى ف الجزء الاول من الرحلة

يتبع الجزء الثاني
[/]

مشاهدة نتائج الإستطلاع: اكمل الموضوع ولا فاكس؟

الموضوع: للشباب المحتاج شقة سعرها قليل

LinkBack

أدوات الموضوع

عرض

للشباب المحتاج شقة سعرها قليل - انشر الموضوع فى :

-

-

-

-

-

زهراء مدينة نصر وخبااايااااااااها -

-

المواضيع المتشابهه

كروز بعد نزول سعرها و لا سيراتو بعد ارتفاع سعرها ؟

اكتر عربيه سعرها قليل ومش موجوده تاكسى

ليه الكورولا عيون 98-99-2000 سعرها قليل

هيا i30 سعرها كام أول فئه و هل سعرها قل هيا كمان

سوال للشباب؟

الكلمات الدلالية لهذا الموضوع

المفضلات

المفضلات

ضوابط المشاركة