اقتباس المشاركة الأصلية كتبت بواسطة motorizer مشاهدة المشاركة
ان مع إننا نقول سوري و خلاص من غير ما ندخل سياسة و غزة و كلام كدة

لأننا بنتعامل مع أشخاص و منعرفش طبيعة الشركة و ميخصناش الموضوع .. إحنا بنرفض الموضوع خلاص نقول سوري و متشكرين يا عم .. يعني هل يتخيل حد إنه بيسوق لمنتج بيصنعه في مصر و يبعته لشركة أمريكية يقوموا يقولوا لأ يا مسلمين و يبعتولوا صورتين من ضحايا برجين 11 سبتمبر ؟! هيبقي رد في غير محله يعني .

و زي ما قال العضو اللي قبلي مشكوراَ .. إحنا بنغذي إسرائيل إقتصادياَ بطرق مباشرة و غير مباشرة .. بس هي الفكرة في المنتج ده إنه مصرح إنه من إسرائيل مباشرة .

ثم يا جماعة عايز أقول إن معظم الكيانات الإقتصادية في العالم قائمة علي إستعباد و نسف كامل لحقوق الإنسان .. يعني اما تشتري كوتشي أديداس صحيح إنت مدفعتش حاجة لإسرائيل إنما شجعت منتج بيقوم علي مصانع في دول أسيوية الحكومات فيها بتشغل الشعب بقوة الجيش و تخليهم يشتغلوا بالعافية و بأجر يكاد لا يذكر - 30 سنت في الساعة - و بتشتغل لصالح شركات و كيانات إقتصادية و كروش عمالة تكبر في أمريكا و أوروبا اللي مش عاملين المصانع في دولهم عشان العمالة عندهم عالية فا متعاقدين مع "حكومات" أخري تشغل "شعوبها" عندهم .. و إنت بتروح و بكل بساطة تشتري المنتج و تمشي و بتزود المأساة دي.

ثم إن إحنا شعب مش عارف يدافع عن حقوقه هو نفسه أصلاَ .. و مع إحترامي كل الأعضاء بيشتروا منتجات أمريكية و يهودية من الباطن و منتجات تسئ للإنسانية إن لم تكن أمريكية صهيونية .. لأن هي دي اللعبة في 2009 و من زمان .. مين يقدر يستعبد مين .. و مش مشكلة لو مش عايز يشتري منتجات إحنا عاملنها في إسرائيل .. نخليه يشتري منتجات بنعملها بإستعباد الأطفال في أندونيسيا و إحنا اللي عاملنها برضه .. و نبقي إستعبدناه هو نفسه إقتصادياَ .

و كم من الأعضاء صلح عربيته عند ميكانيكي هنا في مصر مشغل عنده عيل صغير لو غلط صاحب الورشة بيعذبه بمعني الكلمة! أشكال اللإنسانية كتير و إحنا بنغذيها بكل أشكالها سواء ورشة أو مؤسسة عالمية أو حتي دولة كاملة .

انا مش ببرر شراء منتجات صهيون علي العكس انا ضدها تماماَ بس انا مستغرب من حالة الحماس في رفضها في حين إننا بنشتري منتجات أخري تغذي الأشكال الدموية في العالم في منتهي السعادة و بنسكت علي حقوق كتير لينا و لكن فيه مواقف بنتحمس فيها بحماس منقطع النظير ! و برضه بدون فائدة ! و طول ما مفيش صناعة وطنية ملناش صوت ..و طول ما في فساد مفيش صناعة وطنية .. و دوخيني يا لمونة .

معلش يا جماعة أصل الموضوع فكرني بمشهد من فيلم "معلش إحنا بنتكلم" اما واحد أعمي بيلعب دومينوز مع القرموطي فا واحد جي يقوله .. بتلعب دومانا مع أعمي .. قام خده علي جنب و قاله إيه اللي بتقوله ده .. إزاي تقول أدامه كدة .. إحنا مخبيين عليه إنه أعمي !!

صح .... الإزدواجيه فى كل شئ!