الموضوع: نصائح و أرشادات الحاج سيد لملوم فى محاولات اصلاح التكييف الملعون

المشاركة الأصلية كتبت بواسطة tananybasha

السلام عليكم
كما يعرف بعض الأعضاء الكرام مشكلتى الخاصة و بعض مشاكل الأخرين مع تكييف الأوبل فيكترا الملعون صاحبة افضل موتور و أسوأ تكييف
النهارده كان عندى شغل فى عماد الدين و انا نازل كان احد الزملاء الكرم تكلم عن عزل مواسير التكييف بالصوف الحرارى و انه بيتباع فى منطقة كلوت بك نزلت اتمشى لقيت 99% من المحلات قافله قعدت الف عشان اوصل للمترو عشان اروح لعربيتى لقيت كام محل مكتوب عليهم مستلزمات تبريد و تكييف افتكرت انى كده فى شارع نجيب الريحانى و كان احد الزملاء اتكلم برضوا عنه دخلت اول محل اسأله على الفريون الأمريكى 134 قللى مافيش و التانى و التالت و الرابع لغاية ما اخر محل و هو محل كبير قللى فيه فريون مصرى اسمه rb و ده ممتاز جداً و الخرطوشة بتاعته ب 50 جنيه زنة 1 كجم سيبة و مشيت لغاية الناصية لقيت محل كله حاجات زى الفريون و الزيوت و قاعد واحد جوه المحل و هو اسمة اخوان رزق او بمعنى اخر rb و مكتوب على المحل للغازات و لوزام التبريد دخلت اسأل لقيت راجل جوه غاية فى الأحترام و كنت عطشان و سألته على ميه جابلى حاجة ساقعة و قللى ما تقعد يا عم انت مدينا و لا ايه
قعدت و حكيت المشكله اللى عندى فى التكييف و انا قاعد دخل علينا الحاج سيد لملوم بتاع المطرية و هو راجل مشهور جداً فى موضوع التكييف على ما سمعت لقيت الراجل اللى انا كنت عنده بيقله يا حاج سي الراجل ده قريبى و عايزين نستشيرك فى تكييف عربيته - الراجل قاللى عربية ايه - قلتله فيكترا - قللى يا ساتر ما برضاش ادخلها عندى المركز تكييف غريب تعمل فيه حاجة تطلعلك مشكله تانيه و تبوظ الدنيا و حد بتوع التوكيل مش فاهمينه و بيستسهلوا التغيير - قلتله كان الفريون عندى فضى بسبب كسر فى السربنتينه و لحته و كبسته هوا و شحنت و ما فيش تنفيس و بعد كده شحنته فريون بولندى و التكييف زى الزفت - و على فكرة الراجل كان بيجهزله طلبية كبيرة فاضطر يقوم -
قللى بص يابنى انا هاكلمك بصراحة شغلتنا شغلة نصب على الزبون الأفندى اللى مش فاهم حاجة و نصيحة قبل ما نبدأ مافيش فى مصر فريون امريكى خالص نهائى لأنه غالى جداً و شحنته لا تقل عن 500 جنيه ان وجد و الهندى زبالة و الصينى زبالتين و الأسبانى اسوأ من الصينى و مافيش بولندى كل ده فريون مخلوط و ضغوطة زى الزفت و درجة غليانه زى الطين
اسمع بقى نصيحة واحد مش هايشتغل فى عربيتك و بيفهم و حتى مش هيخليك تخش المركز عنده بالأوبل دى نبدأ بالصلاة على النبى
1. فضى الشحنة بتاعت العربية و فك الكباس و غير البلف حتى لو فى نسبة شك انه سليم مع العلم بأن الأصلى كورى و حاول تلاقى الأصلى عشان ترتاح
2. و الكباس به يتغسل كويس و يتسد الفتحات بتاعته الأول
3. يتقلب الكباس على وشه و تفضى الزيت اللى فيه و تكون فاكك البلف و تركبش البلف غير لما تتأكد ان مافيهاش زيت خالص بعد كدة تركب البلف و متغسلش بأى شئ أى كان حتى لو ايه جوه الكباس
4. عند واحد بتاع كاوتش او قبل ما تفك الكباس لأن العربية مش هتمشى من غير تفك البلفين اللى فى الكباس و تخليه يدخل خرطوم الهوا فى الخط الداخل عشان ينضف الدايرة من اى زيوت او شوائب علقت بها نتيجة تلف البلف لغاية ما تلاقى صوت الهوا سالك و زى ما بيدخل و يخرج و ادى بتاع الكاوتش 5 جنيه و امشى روح فك الكباس الخطوه السابقة
5. ركبت البلف و نضفت الدايرة و ميت فل و خمسه عشر هات زيت فريون 134 تركيز 68 عشان ده الصح بتع كباس الملاكى و العربية بتاخد حوالى 250 جرام إلى 300 جرام و تحطه من فتحتة الكباس مكان الخراطيم مش شفط و دى سأل عليها لقيت 1/2 كيلو ب 50 جنيه
6. اكبس الدايره هواء لغاية ضغط 250-300 و اكشف عن اى تسريب و ياريت تسيبها يوم ان امكن عشان تبقى مطمن و خللى بالك من البلوف بتاعها بنت ...... و اطمن لغاية ما تتأكد انه مافيش تسريب
7. دور عربيتك بعد ما تركب الخرطوم و العدادات بتاعت الشحن و اشحن بفريون ار بى المصرى و ده اللى انا باستعمله و زى الفل و ضغوطه مضبوطة - علىفكره الراجل اللى معانا لسه ما جاش - قلتله بس انا بخاف من المصرى ده - قللى اى حد يشحن من انبوبه كبيرعه اعرف انه نصاب لأنه بيحاسبك على الشحنة برقم خيالى و هى العربية واخده حقها من 500 إلى 700 جرام من خرطوشة تكفى 15 عربية ب 600 جنيه على اقصى تقدير يعنى الخرطوشة مكسبها لا يقل عن 2000 جنيه - اسمع كلامى خد الفريون ده ب 38 جنيه و اكيد قريبك قلك السعر ده قلتله اه اه - قللى دور و اشحن و ادعيلى و هتلاقى العربية تلاجة ان لم يكن هناك عيب اخر :ta_clap[1]:
الراجل ده كلام كلامه صح قوى من مراجعة المواضيع المشابهة بالخارج على النت المهم بقى يا عم الحاج التكلفة و لا انا غلطان
1. فريون ار بى زنة واحد كيلو 38 جنيه
2. 1/2 كبلو زيت فريون 134 تركيز كثافة 68 ب 50 جنيه
3. بلف سعره يتراوح من 125 إلى 175 جنيه
4. تنظيف الدايرة بالهواء من 5 إلى 10 جنيه
5. مصنعيةييف فك و تغيير و اعادة تركيب و اختبار و عملية الشحن - على كلام الحاج سيد - انت و شطارتك من 100 لغاية اقصى حد ليها 250 جنيه
و مبروك التكييف الجديد

مادام هو واثق من كلامة اوى للدرجة دى لية ميعملكش هو الشغل دة!!