الموضوع: اعمل ايه مع التوكيل

السلام عليكم اخواني

انا مش عارف الصراحة اعمل ايه مع التوكيل واللي فعلا كان من اول مقابلة حسيت انهم مستغلين بكل النواحي واللي كنت خايف منه حصل.

الموضوع من اوله انا اختي معاها سيريون 2009 شارينها في شهر 2 اللي فات، العربية لما استلمتها بعد فترة لقيت الفرامل ضعيفة جدا جدا وبتحك في الطنابير وكان ربنا قدر ان اختي خبطها سواق نص نقل فوديت العربية التوكيل عشان تتصلح وقولتله على مشكلة الفرامل وعلى ان الدركسيون مايل للجنب.

اخويا راح يستلم العربية قالوله الفرامل مفهاش حاجة وانهم نسيو يعدلو الدركسيون وهيعملوه على صيانة 5000 كم، اخدنا العربية والفرامل اللي قالو مفهاش حاجة ربنا ستر مع اختي مرة ومع اخويا مرة وهما سايقنها لان الفرامل ما مسكتش.

المهم اختي راحت بالعربية من اسبوع للتوكيل عشان تعمل صيانة 5000 وقولنا تاني على مشكلة الدركسيون والفرامل وكان الرد حاضر هنشوفها

بعد ما اختي جت تستلم العربية قالها عندي ليكي خبر مش كويس خير

المساعد اليمين قدام ضارب من مطب جامد.

طبعا انا مش عايز اقولكم انا لو كنت واقف قدامه كان ممكن اعمل ايه كلمته في التليفون قالي حضرتك العربية واخده مطب جامد وده خلى المساعد يضرب وده باين في الجنوط الحديد، حضراتكم انا مفيش مطب ولا حفرة في مصر ما خبطش فيهم ده بعربيتي الميجان والجنوط عندي استعدلتها مرتين من قوة الخبطات والعربية ماشية 100 الف ويا دوب هفكر دلوقتي اغير المساعدين ده اولا، ثانيا انا لما شوفت العربية افتكرت انه من وصفه هشوف الجنوط دي مخلعه من مكانها فعلا الجنوط مفهاش غير تنة بسيطة لا تذكر ده غير ان لو الجنط متني بالبشاعة اللي بيتكلم عليها دي على الاقل خالص هحس برجة في الدركسيون او ضغط الهوا بتاع الكاوتش هيقل او هيكون في بلونه هوا في الكاوتش وده كله مكنش حاصل، ثالثا انا اختي طريقها يوميا من مكرم عبيد لحد الشروق وبعدين العاشر من رمضان بالله عليكم لو حد فيكم مشي الطريق ده يقولي فين الحفرة الجامدة او المطب الجامد اللي ممكن العربية تعمل فيه كده ده غير ان اختي اكدتلي انها ما اخدتش اي مطب جامد وانا مصدقها لان اختي اساسا بتشلني وهيا سايقه لان حتى عيون القط بتفرمل عندها عشان تعديها بالراحة اللي انا اساسا وانا سايق بنط عليها فده اول كارثه.

تاني كارثه قالولها الفرامل بقت فل خلاص ولما سالت عملتو ايه قالولها ظبطناها، واول امبارح وانا سايق عربيتها لقيت برضه الفرامل بتحك في الطنابير واللي طبعا انا متخيله انه يا دوب فك الفرامل نضفها وركبها تاني.

انا فعلا مش عارف اعمل معاهم ايه بس اللي انا متاكد منه اني يوم ما هروح مش هيبقى يوم ظريف ابدا ليهم واللي انا بقيت حسه انه يوم ما العربية دي هتوصل ل 20 الف كيلو هبوس ايدي وش وضهر

واضح انه قرار كان خاطىء من الاول واسف على الاطالة

المشاركة الأصلية كتبت بواسطة معاذ الشرباصى

محمد باشا

حضرتك الحمد لله بقى معانا فى المنتدى مديرة خدمة العملاء فى دايهاتسو مصر, الاستاذة مى عبدالحميد

هى لسه منضمة للموقع اخر الاسبوع اللى فات, و المفترض انها تبدأ تشارك معانا هنا فى قسم الدايهاتسو

ده العضوية الخاصة بها:

maimahmoudcrm

أنا بعت لها على الميل الخاص بها اللينك الخاص بموضوعك, و إن شاء الله هى تدخل تشوفه قريب جدا.

بس يا ريت حضرتك تذكر تفاصيل اكتر لو تقدر, و بطريقة مرتبة اكتر

يعنى تواريخ زياراتك للتوكيل بتفاصيلهم, المهندسين اللى استلموا منك, الخ...

إن شاء الله الموضوع يتحل على خير.

انا متشكر ليك يا استاذ معاذ وانا الفواتير معايا ممكن اطلع منها التواريخ بالظبط اتمنى انها ترد عليا ونشوف ايه الحل