الموضوع: جوليتاوي جديد

السلام عليكم

بادءا ذى بدء أحب أشكر من كل قلبى جميع المشرفين و الأعضاء بالموقع بشكل عام و بمنتدى الدايو بشكل خاص و أحسن سلام و تحية لللأسكندرانية:k32: و كان نفسى أكون معاهم فى الكينج بس أخوكو لسه مبتدئ سواقة و المشوار ده طويل عليه شوية

ثم اما بعد
ربنا كرمنى و أشتريت جولييت زيتى 2001 كاملة 1500 رشة نضافة و عاملة 65000 كم و صالونها بحالة الزيرو و من أول يد و بالكتالوج:k4:
للأسف أخدت على إيدى خبطة فى الرفرف اليمين تم ردها على الساخن و معجنتها و سبتها على حالها كده لما الواحد يتمكن من السواقة و يقدر على الأقل يحافظ عليها من أخطاءه و ربنا يستر من أخطاء الآخرين
العربية بالطبع نسخة من اللانوس ماعدا الشنطة و بصراحة شنتطها تعتبر واسعة بالنسبة لفئة الهاتشباك بالإضافة إلى أن الكراسى بتطوى لمزيد من المساحة

طبعا بعد مصاريف علاج الخبطة أخدت العربية على ورشة من أفضل الورش بالأسكندرية بشهادة الأصدقاء و الجيران وزملاء العمل و قمنا بالتالى:
1-تغيير طقم دبرياج (بلية و أسطوانة و ديسك و قاعدة فتيس و زيت) 400 جنية + 200 مصناعية
2-فحص التيل و الطنابير و تنضيف الصدأ
3-تغيير قاعدة الماتور
و فضل حاجة كمان أجلتها و هى تغيير الرشاشات لأن العربية الصبح لما بادورها بتتأخر و تطلع دخنة سودة و بالفحص تبين أن الرشاشات بتسيل و غير قابلة للتنضيف أو الإصلاح و تمنها تقريبا 300 جندى مصرى

الحمد لله العربية مشيها فرق جدا بعد دور الصيانة ده ثم أما بعد أتجهت بالعروسة لتوكيل كلاريون بسموحة و ب950 جنية تم شراء و تركيب الآتى:
1-كاسيت كينوود شرايط
2-سماعتان كينوود أماميتان مقاس 10
3-سماعتان بلوبانكيت خلفيتان-دى المركة الوحيدة اللى ممكن تركب مكان سماعات الفبريقة- عشان ماكنتش عايز أغير ضهر العربية و عايز أمشى بالفبريقة بتاعها
4-سنتر و إنذار سيمفونى بأتنين ريموت
و كله طبعا بالضمان

إن شاء الله الويك إند القادم حاروح على بنزينة نضيفة فى المعمورة برده بنفس التوصيات السابقة عشان عايز:
1-أغير زيت (مع إن صاحبها مأكدلى أنه لسه مغير لها زيت)
2-أغير ماء التبريد بماء أخضر بدلا من الماء المقطر
3-أشحم العربية و أغسلها
بس مش عارف التكلفة التقديرية كام؟؟؟

أخيرا عشان ماطولش عاليكوا -قولوا طول- التكييف مرة واحدة بقى بيجيب هوا سخن مع إنى قبل ما أشتريها رحنا على الزرانى و كشفنا على العربية و شحناها فريون و التكييف فضل شغال زى الفل لمدة شهر تقريبا. أى نعم أنا ماكنتش بشغله بأستمرار نتيجة لأنى مقل فى قيادة السيارة نتيجة الرهبة و القلق و الشتيمة و الكلاكسات و الترعيش و اللذى منه

فى النهاية أتقدم بجزيل الشكر و خالص الأحترام لكل أعضاء المنتدى و بيب بربب بييب لسائقى الجوليت

و السلام عليكم

ربنا يباركلك فيها, ويكفيك شرها, و برده ياريت تدور على الموضوعات المهمه في الصيانه الدوريه و الإهتمام بالعربية من الخارج و الداخل لأن بجد في موضوعات جامده جدا هنا على المنتدي و أي حاجه هتحتاجها الرجاله هنا مش هتتأخر عنك ربنا يسترها معانا جميعا