الموضوع: الحمدلله طلعت رخصتي امبارح ,,, وقصتي مع مرور عين الصيرة

المشاركة الأصلية كتبت بواسطة aboood

السلام عليكم
ازايكو يا احلى اعضاء
عاملين ايه

الحمدلله امبارح طلعت رخصة ... واخيرا حابقى اسوق قانوني بعد سنتين من السواقة بدون رخصة

في الاول انا رحت يوم السبت مرور عين الصيرة عشان الاجانب بيطلعوها من هناك
رحت ومعايا كل ورفي واشتريت الاستمارة 256 ووقفت على الشباك
قعدت اللي كانت قاعدة تبص في الورق وقالتلي فين الوظيفة
قلتلها وظيفة ايه انا طالب ,,,, قالتلي ما هو لازم يبقى مكتوب على بطاقتك او جوازك انت وظيفتك ايه
قلتلها بقى احنا ما بنكتبش الوظيفة
قالتلي يبقى لازم تجيبلي ورقة من مدرستك ان انت طالب فيها
قلتلها ماشي
رحت يوم الحد المدرسة وجبت الورقة بس ما قدرتش اروح يوميها المرور
رحت امبارح بعد ما جبت الورقة وصورت الجواز والبطاقة
رحت انا وواحد صاحبي وقالي هات معاك فلوووس (انا كنت مظبط واسطة بس الواسطة ده طلع اي كلام وفي اخر يومين قالي مسافر والكلام ده ) قلت انا بقى اتوكل على الله واروح

انا رحت بدري الساعة 8 الصبح
دخلت لقيت المرووور كلوو حريم اكتر من 50 وحده واقفين بيذاكرو ( عرفت بعدين انهم مدرسة وجيين يمتحنوا النهارده)
دخلت جوا ملقتش حد من اللي بيشتغلو سالت واحد قالي دولا بيبتدو الساعة 9
قعدنا مستنين قام في واحد جه وفتح شباك بتاع المصريين على طوول الشباك اتملى وعشرينات كلها بقت قدام الراجل
شوية كده فتح شباك الاجانب قدمت ورقي وحطيت معاهم 20 جنيه قالتلي استنى امتحان الشفوي
طبعا الاول طلاب المدرسة امتحنوا وبجد كانت مهزلة بجد يسالها حاجة تقولو حاجة تانية او تقولي هاتلي حاجة اسهل من الكلام ده ,,, شوية جاتلي وحده اللي بتصور عشان تطلع الرخصة قالتلي ايه رايك تدفع وما نخشش الامتحان الشفوي صاحبي قالها ندفع دفعت للراجل وواحد كان معاه 50 جنيه وشوية في ناس دخلت تتمتحن وسقطت
فقلت الحمدلله دفعت احسن ما كنت اسقطت واستنى 3 شهوور كمان
بعد ما خلصنا قالتلي استنى الامتحان العملي ,,,, والظابط ما جاش للساعة 11 يعني تاخر ساعة ونص قلنا ماشي
قال الملاكي يركنوا ورا البوابة التانية ركنت انا و 8 تانين بس ... افتكرت ان احنا حنمتحن الاول ,, فقام واحد قثايلي لا احنا حنمتحن بعد المدرسة عشان هما بتوع المرور وبدفعوا والكلام ده ,, انا قلتلوا احنا 9 على بعض وهما فووق ال 50 قالي يا عم استنى ولا يهمك
استنينا الحريم دول وهما اصلا كانو بيمتحنوا على نص نقل ,,,, :d:d بص على المنظر ناس بتمتحن على نص نقل
وكانت كل واحده بتلف ملف وبتقف وتركب اللي بعدها وعلى كده وما ركنووش ولا دخلو ال s ولا اي حاجة
والظابط كام مديلهم ضهره وسايب الليلة وكل الحريم نجحت ما عدا واحده طلعت فوق الرصيف
بعد ساعة ونص المدرسة خلصت وقالوا للملاكي اركبوا في العربيات وخشوا ورا بعض
انا دخلت تاني عربية وحطوا الورق بتاع كل واحد على المساحة وخلونا نمشي ورا بعض ال s بس !!!!! ولا اركن ولا ارجع بضهوك ولا اي حاجة من الكلام ده واحنا اصلا كلنا ماشين ورا بعض وقبل ما نخلص خد الظابط الورق وقالولنا اركنوا برة عشان تتدفعوا المصاريف وتاخد الرخص
طبعا انا ما كنتش مصدق ان ده هوا الامتحان وقلت الحمدلله
دخلت بعد كده واستنينا نص ساعة على بين ما الورق جي
وبعد كده دفعت المصاريف 45 جنيه وبعد كده دخلت عشان اتصور وكان قدامي ناس كتيير فاديت اللي كانت معايا من الاول 25 جنيه ودخلت اتصورت على طوووول
هي دي قصتي في مرور عين الصيرة
والحمدلله انا اخدت رخصتي
بس بجد انا مدايق على الرشوة اللي بتحصل كده عيني عينك
انا دايما كنت بسمع وبشوف بس لما كنت بطلع الفلوس عشان اديهلهم كنت بحس كده بشعور غريب
ولا الظابط اللي مش شايف حد من اللي بيمتحنوا واكتر من نصهم او كلهم ما بيعرفوش يسوقوا ونجحهم دولا لو عملوا حادثة بعد كده الحق حيبقى على مين عليهم ولا على الظابط الي امتحنهم ....
وهنا في مصر ما تسناش لا واسطة ولا اي حاجة
بفلوسك تجيب ابو الواسطة
بجد حاجة تزعل يا رب حال البلد يتحسن ويبقى احسن من كده يا رب

الف مبروك الرخصة

طب انا دلوقتى فلسطينى لكن معايا اقامة مصرية وساكن فى حلوان برضو اروح عين الصيرة؟

ومطالبوش منك موافقة من امن الدولة انا سمعت انك بتكتب طلب فى المرور وهما برضو عليك بعد 10 ايام