تقييم سيريون 2009 xl بعد صيانه ال 5000
السلام عليكم ازيكم يا اخوانى
وحشنى جدا والله معلش مأئر من ناحيتكم بس كنت مشغول جدا في الشغل بتاعى في الفترة اللى فاتت
انا بفضل الله عملت صيانه للعربية بتاعتى سيريون 2009 xl يوم الاتنين اللى فات
نخوش على التقييم على طول
اولا اتصلت علشان احجز يوم السبت 23-5 الساعه حوالى 10 الصبح بعد ماخد منى البيانات قولتله بس مش عايز احجز معاد بكرة قالى طيب تحب امتى قولتله لو ينفع الاتنين قالى خلاص معادك الاتنين 9:30 وهتصل بيك بكرة اكد على المعاد اتصل فعلا تانى بوم واكدت على المعاد
روحت فعلا الساعه 9:30 بالدقيقة قدعت شوية واستلم منى العربية وقالى هنغير زيت و ونغير الفلتر ونكشف على السوائل ونربط العفشه سالنى على الزيت 5000 و الا 10000 قولت 5000 اتكلفت الصيانه 267 جنيه قالى الاستلام الساعه 12 لاقيتهم الساعه 11:15 بينادوا عليا ومن الحاجات اللى فرحت بيها خدمة الانترنت لانى كنت عايز اتابع شغلى من النت
استلمت العربية مغسولة جوه وبره ده كل اللى حصل في الصيانه
نيجى بقى لتقييمى على حسب خبرتى للعربية
اولا كدهوبدون مقدمات العربية ممتاااااااااااااااااااااا ااااااااازة جدا انا بفضل الله فرحان بيها جدا وحست انه اختيار موفق جدا جدا بالنسبة لى واحب اشكر كل واخوانى هنا اللى ساعدونى في الاختيار
ثانيا العربية عمرها ماكسفتنى في اى موقف ساعات كده كنت بحس انى هخبط او مثلا الحته ديه مش هتعدينى لكن ماشاء الله العربية مرنة كده في المناورات لانها طبعا صغيرة وكمان ماشاء الله الفرامل استجابتها ممتازة والباور بتاع العربية جميل جدا الصالون بحررررررررررررررررررررررر رررررررررررررررررررر بشهادة الناس اللى ركبت معايا وفيهم احجام كبيرة وسحبها جميل وبتجمع سرعات بسرعه ماشاء الله استهلاك البنزين جميل جدا لغاية كده تقريبا اول تلت في الشرطة قبل الاخيرة بتعمل 520 كيلو مش عارف كده حاسب صح والا غلط بس الاستهلاك انا راضى عنه تماما
نيجى بقى للعيوب طبعا من وجهة نظرى ممكن تكون غلط طبعا وياريت حد يصلحلى
اولا العربية مش ثابته بعد 120 وديه بشهادة مراتى مع انها مالهاش في مجال العربيات قالت لى كده بالنص ( العربية بتكون خفيفه لما تكون ماشى سريع) ديه الجملة اللى هيه قالتها بينى وبينكم انا بحس انى خايف بعد ال110 بس على فكرة انا مش من هواة السرعه هيه بس ساعات بعض المواقف بتضطرك تسرع في حته معينه لكن برجع اهدى تانى
ثانيا للاسف الشديد بقيت احس انها 1300 لما اشغل التكييف السحب بيضيييييييييع خالص انا فوجيت بالعيب ده بصراحه ومن ساعتها وانا متعكنن فعلا يا جماعه العربية ماتت وانا مشغل التكييف فين وفين على ما جيبت 90 انا سالت المهندس في الصيانه على الحته ديه قالى استنى لما تجيب اخر الغيار بس انا حسيت انى كده هحمل جامد على الماتور
ثالثا بحس في احيان كتير العربية واطية طبعا بيكون معايا ناس بس مش عارف ليه بحس انها واطية اصلا وكمان المطبات عندنا ما شاء الله كبارى مش مطبات لما بتحوك العربية من تحت بحس ان الحكه جات في قلبى والله وببقى طول اليوم متعكنن وفاكر الحكة فين وفين على ما انسى
انا مش عايز اطول عليكم
الخلاصة انا بتمنى من الله ان ربنا يوفقنى واقدر احافظ عليها وتبقى معايا طول العمر فعلا العربية ديه بحبها جدا
معلش طولت عليكم ارجوا انى قدرت افيدكم باى حاجه في تقييمى البسيط ده لحبيبتى السيريون