الموضوع: تقييم سيريون 2009 xl بعد صيانه ال 5000

اولا ربنا يباركلك فيها ويعطيك خيرها ويكفي عنك شرها ان شاء الله

نيجي بقه للتقيم الجميل ده
انا عاوز اوضح اكتر من نقطه أولا
- مسألة الثبات وان العربيه خفيفه فده بيفرق من شخص لأخر
يعني من الواضح من كلامك كله ان حضرتك حساسا للسرعات وحساسا جدا للعربيه فده مؤثر على حجتين
اول حاجه احساسك وانت على سرعة 110 بالخوم فده اكيد هيبقى مزود احساسك ان العربيه مهياش بي ام او مرسيدس اكيد فلازم تبقى فاهم ان عربيتك هاتش باك وزنها 960 كجم لو اتوماتيك
يعني انت مش راكب عربيه ثقيلة
ومع ذلك ان بمشي كتيلا على 140 او 150 وعادي وحاسس ان ده الطبيعي خالص

ثانيا مؤثر على احساسك بسحب العربيه مع التكييف ليه ؟
التكييف لما بيشتغل طبعا بيسحب شويه من قوة الماتور اكيد
وبما ان حضرتك عندك تواصل في الأحساس بالعربيه في كل حاجه فبتحس بان سحب العربيه قل وان قوة الماتور قلت لأن حضرتك مش عاوز تقرص على الماتور لن حضرتك حاسس به فمش قادر تزود على النقلة

وعلى فكره الكلام اللي انا بقوله ده انا بيحصلي كده ولكن انا عرفت خلاص قوة الماتور وقدرته علشان كده حمل العربيه وشغل التكييف واضغط بكل ما فيك وانت هتعرف الماتور هيعمل معاك ايه
خصوصا ان الأتوماتيك بيزود الاحساس ده لأن علشان تشوف قوة الماتور لازم تزود ضغطة البنزين شوية عن الطبيعي

من الأخر انا عاوز تبقى ناشف شوية مع العربيه يعني اتركك احساس بالماتور وانت محمل او مشغل التكييف

امتى نقول ان التكييف مؤثر على الماتور والسحب
لما فعلا تيجي تضغط على الماتور متلاقيش اي استجابة
اما في الضغطة العادية وتشغل التكييف اكيد مش هتبقى زي ما العربيه ماشية ومش مشغلة التكييف

لازم تزود ضغطتك شوية على دواسة البنزين

- نقطة انها واطية فبصراحة مش عارف ليه بتقول كده
العربيه دي من اعلى العربيات اللي ركبتها
وبدخل على مطبات كتير وانا محمل كمان وببقى من داخلي بقول اكيد هحك وبعدي ومش بتحك بجد

بس يمكن حضرتك بتعدي على مطبات عالية بزيادة عن الطبيعي ويمكن بتاخد المطب بزاوية شويه
لن العربيه دي فيها حاجه غريبه شويه
لو اخدت المطب بزاوية فتأكد انك هتحك
ولو اخدته بشكل رأسي على المطب مش هتحك وجرب وقولي
وفي كل الأحوال عاوز اطمنك ان بطن العربيه من تحت عالي جدا ان يحك فيه حاجه والعربيه لما بتحك في المطبات في شفتين حديد على جانبي العربيه بجوار العتب هما اللي بيحكوا في المطبات وليس بطن العربيه لأنهم اقل ارتفاعا عن بطن العربيه بفارق

واخيرا مبارك عليك وربنا يباركلك فيها ان شاء الله

احمد باشا

مبارك عليك الصيانة

ربنا يبارك لك فى العربية و يحفظها لك من كل سوء

بس يا ريت لو تقولنا على تفاصيل الخاصة بالصيانة

يعنى الفاتورة, حاسبت على كام لتر زيت , الخ...

ألف مبروك السيارة مرة أخري و صيانة الخمسة ألاف .

بالنسبة لموضوع السرعة زي ما قال أستاذ شريف فعلاَ الموضوع ده بيحكمه حاجات كتير منها الطريق
يعني انا فيه طرق بمشي فيها 100 و بحس إن انا عمال أتشال و أتحط .. فيه عندك بقي طريق زي وادي النطرون في الشتاء .. الطريق فااااضي و طووووييييل و مستقيم و كويس .. تمشي فيه 100 زي 180 !! انا جربت قبل كدة أمشي عليه 170 و مكنتش حاسس بخطر خالص و كنت قاعد بتكلم مع صحابي و محدش حتي علق علي موضوع إننا ماشيين 170 !

إنما فعلاَ السرعة اللي تسمحلك بالتحكم في السيارة .. أكتر حاجة 120 .. متضمنش فيه إيه ممكن يحصل .

موضوع التكييف بقي حضرتك المفروض بقي تعمل أسلوبين للسواقة لأن هتلاقي العربية مختلفة ما بين تكييف شغال و تكييف مش شغال (انا عربيتي 1300 مانيوال برضه) .. لأن هتفرق في حاجات كتير .. حتي هتلاقي و إنت قافل التكييف و بتتحرك بالعربية من الثبات إن ضغطة البنزين لازم تكون أقل و تشيل رجلك من عالدبرياج أسرع .. يعني مش في الجري بس .

و إنت مشغل التكييف متنقلش قبل 3 أر بي إم و ده معدل كويس .. تبقي لا قرصت عالموتور و في نفس الوقت أخدت عزم حلو من العربية .. انا ساعات لو سرحت و ببقي مشغل التكييف بلاقي نفسي وصلت 120 من غير ما أخد بالي .. فا بالعكس انا مبحسش بموضوع التكييف دلوقت بعد فترة كبيرة مع السيارة لأن إتعودت عالفرق بينه و بين و هو مطفي ( و حتي السنة دي مقفلتوش كتير لأن الشتاء كان قصير !)

إستهلاك البنزين تمام :)

و ربنا يباركلك فيها إن شاء الله .

الف شكر ليكم ياجماعه والله انتوا ناس زى العسل وان شاء الله هطبق كلامكم وقولكم على النتيجه

بالنسبة لاستاذ معاذ انا مش عارف قصدك ايه هوا سالنى في الصيانه عايز 5000 والا 10000 بس قولت له 5000
ده اللى حصل كله معلش انا مليش خبرة كتير في عالم السيارات لسه اول عربية ليا فا يعنى ايه حاسيبت على كام لتر؟

كنت عايز اضيف حاجه للتقييم بتاعى نسيت اقولها التكييييييييييييف تلللللللللللللللللللللللج انا شغلته على 2 مراتى قالت لى وطى شوية انا سقعت وكانت العربية ساعتها مليانه ناس روحت مشغله على 1 فعلا التكييف رائع

فيه بقى حاجه يا جماعه عايز رايكم فيها لو تفتكروا انا كنت عملت حادثه كده صغيرة اول ما جبت العربية خبطة كده يجي كده 3سم2 فوق الرفرف اليمين المهم عملتها سمكرة وكمان شوية خرابيش كده مش عارف جات منين ومن ساعتها لسه مرشتهاش الحكاية ديه مضياقنى مابحبش العربية تبقى فيها خبطات او خرابيش باينه اعمل ايه الناس بتقولى خسارة لسه جديدة وترشها مش عارف اعمل ايه مافيش حل كويس ياجماعه وايه رايكم في الكلام ده

المشاركة الأصلية كتبت بواسطة akarem

بالنسبة لاستاذ معاذ انا مش عارف قصدك ايه هوا سالنى في الصيانه عايز 5000 والا 10000 بس قولت له 5000
ده اللى حصل كله معلش انا مليش خبرة كتير في عالم السيارات لسه اول عربية ليا فا يعنى ايه حاسيبت على كام لتر؟

أصل كان فيه خلاف حول عدد لترات الزيت اللي بتاخده العربية .

التوكيل كان بيقول إنها بتاخد 3.6 لتر و اما بيحطوا الكمية دي طبعاَ بتتحاسب علي 4 لترات زيت .
ثم لقينا في الكتالوج إنها المفروض تاخد 3.1 لتر بس و ملهاش لازمة بقية الكمية فا في الحالة دي بتتحاسب علي 3 لترات بس و إحنا إتفقنا مع التوكيل من خلال معاذ و بعض الأعضاء الأخرين اللي تابعوا الموضوع زي أستاذ أحمد مصطفي و أستاذ ياسر و أستاذ علي أبو طالب و ناس كتير إن كل واحد يحط اللي هو عايزه .

فهل حاسبوا حضرتك و حطولك أنهي كمية ؟ تقدر تعرف عربيتك فيها أنهي كمية من خلال الفاتورة و عدد اللترات اللي فيها .

و انا رأيي في الصيانة الجاية هتغير الزيت .. رأيي حط زيت العشرة ألاف لأنه أحسن

زيت الخمسة ألاف زيت معدني
زيت العشرة زيت تخليقي .. الزيت التخليقي زيت معمول بالكامل في المعمل و الشوائب بتاعته شبه معدومة و مناسب أكتر للمحركات الحديثة .. زائد إنه راحة دماغ .. بتغير زيت و فلتر كل عشرة الاف كيلو.