الموضوع: قدامى تيمبرا 1991

العربيه اللى كنت بتكلم عنها الاول -تفاصيلها كلها
موديل 1991
1400 سى سى
ماشيه 148 الف كيلو
فابريكه بره و جوه
ايطالى
فرش جلد طبيعى اسود
4 زجاج كهربا
سنتر و انذار و وحده رفع لاربع ابواب
فتحه سقف
مرايا كهربا
تكييف
باور
عدادات ديجيتال
كاوتش عريض
جنوط اسبور
-تم الاتفاق انه يصلح التكييف و فعلا اتصلح
وحكايه التابلوه.هايغير الفيبره المكسوره على حسابى فى حدود 100 جنيه بالرش و التركيب
حكايه الباور - هادفع زى ماقال 120 ولو زاد هو اللى هايشيل - على كلامكو 350 - وهو كده كده شغال اصلا وزى الحلاوه - بس هى الزنه اللى مقلقانى
حكايه الدبدبه - ناوى اغير سوست ورا (لانها كانت راكب فيها انبوبه غاز ورا و المساعدين ناشفه قوى حاليا) و هو قالى هاجيبهوملك انا و نركبهم هايعملو 100 وبردو لو اى حاجة ازيد من اللى بيقولها هو هايدفعها
وتم الاتفاق على مبلغ 33 الف - غير شامل الكلام ده يعنى كله ممكن يدخله فى 33.350 مثلا وبصراحه مش لاقى عربيه بالنضافه دى ولا حتى فى ال 98

ايه رأيكو ؟؟

كتير جدا

ممكن اسباب ؟؟

لا هو مش كتير على فكرة عشان الأوبشنز اللي في العربيه واحنا يعني كنا بنتكلم في 31 او 32 مش فارقه في الف ولا الفين لو العربيه حالتها حلوه زي ما انت بتقول بس برده خلي متخصص يبصلك على العربيه تحسبا للمفاجآت اللي ممكن تطلع في العربية
لو عايز انا ممكن اقولك على ميكانيكي يكشفلك عليها
طبعا هاتشيكك على الصاج والموتور وعلبة الدركسيون والمقصات والمساعدين والباور دول هم حاجات واكتر حاجات ممكن تكلف بعد كده لو تمام استخير كويس جدا وتوكل على الله ومش فارقه لو هاتدفع الف زياده في حاله كويسه بس نظرة الصنايعي ممكن تبقى مختلفة عن نظرتك انا بس كنت عايزك تجيب حاجه 1600 عشان السحب افضل والتكييف طبعا بس لو حالة العربية كويسه توكل على الله على فكره هي العربيه تستاهل اكتر من كده وفقا لامكانياتها بس للاسف في المستعمل انت بتشتري للي بعدك عشان كده ما ينفعش تاخدها بسعر اعلى من سعرها في السوق وربنا يوفقك

انا رايى من رأيك بردو - ثم انا يا زلبانى جبت ميكانيكى غربلها - وقالى انها تمام و ميكانيكى خبره و راجل كبير فى السن و له صولات و جولات فى المكانيكا
حكايه ال 1600 دى كده كده مش محتاجها قوى - انا ماليش فى الجرى كده كده -ثم 1400 هتبقى موفره فى البنزين وده المطلوب
ياريت يا زلبانى تقولى بقا حبه نصايح بالنسبه للعربيه دى و كده - وكمان الزيت - احوطلها زيت ايه و كل اد ايه - وبنزينها 80 ولا 90 و كده يعنى
وده ايميلى لو حبيت ندردش mikology@msn.com
وشكرا يا رجاله و ادعولى ربنا يباركلى فيها

ألف ألف مبروك عليك يا أخي وربنا يديك خيرها ويكفيك شرها ولو احتجت أي حاجه أنا موجود وتحت أمرك لو اي حاجه انا عملتها بنزين 90 ياباشا انا احيانا بحطلها 92 كمان
الزيت انا حطيت فيها امارات مصر 5 الاف وما طلعش كويس ودلوقتي حاططلها موبيل بس في الغالب هاحطلها شيل المره اللي جايه ان شاء الله شيك بأه عندك على البوجيهات هاتلاها البوجيهات الأصلي بتاعتها عند الكيلاني ماركه فرنساوي كده ب 40 جنيه مش فاكر اسمها ايه بس لما تقله بوجيهات التمبرا هايديهالك وهاتغير سير الكاتينه وشيك على الطنابير والتيل قدام وورا لو احتجت اي حاجه استيراد قلي هابعتك لواحد في الوكاله حاجته كويسه جدا أهم حاجه يا باشا دورة التبريد اتأكد ان المروحة بتشتغل عند 90 او بعدها بشرطه لو اكتر من كده اتأكد من الخراطيم ان دورة التبريد محكمه وخلي حد ياخدلك الهوا من دورة التبريد لأن التمبرا دورة تبريدها مغلقه مافيش فتحه في الرادياتير ولو المروحه بتشتغل على درجه اعلى من كده اتأكد ان الرادياتير تمام ومافيهوش تسريب لأن ده السبب في رفع درجه الحرارة
بالنسبه للتكييف : العربية دي فيها مروحه واحده بتشتغل مع التكييف لما تشغله على السرعه البطيئة وإدا العربيه سخنت ووصلت ل 90 بتشتغل على السرعه السريعه يبقى لازم تتأكد ان المروحه بتشتغل مع تشغيل التكييف عشان لو مش شغاله يبقى تراجع على مجموعة فيوزات المروحه اللي قدام ورا الفانوس ممكن يكون فيها مشكله على فكرة المروحه فيها من فوق مقاومة هي اللي بتخلي المروحة تشتغل مع التكييف على السرعة البطيئة لو باظت بتتباع بحوالي 50 جنيه
لو عندك اي أسئله تحت أمرك

الله يبارك فيك يا زلبانى و متشكر خالص على مساعدتك ليا
انا حاطيطلها زيت شل 3000
انا مالقتش البوجيهات فجبتلها nkg على ما اعتقد ده اسمها ب 30 جنيه وهى يابانى
ياريت تدينى كام واحد فى عزبه شلبى يكونو كويسين و حاجتهم نضيفه عشان انا ناوى اجيب كام حاجة نقصانى جوه الصالون و تكون نضيفه و فلتر هوا كده و حبه حجات روافع

بس فى مشكله عندى - وانا قاعد و لما العربيه بتسخن بحس بصهد فظيع طالع من تحت رجلى و كمان جايلى من تحت الهاند بريك
رحت لواحد سروجى شاطر قوى قالى بص مش هاشتغلك - انت عندك اساسا العزل الفابريكه وهو كويس من جوه اهو و لو حطيتلك عزل تانى مش هاتلاقى الدبرياج - هاموتهولك - عشان هايتحشر مع الحشو اللى هايركب - فانت روح لبتاع التكييف وقوله اقفلى الهوا السخن اللى داخل للكبينه
رحت لبتاع التكييف و قفلى السخن اللى داخل وقالى بردو فى كذا حته كده فى العزل من جوه الحوض هاقفلهوملك و قفلهم - ولسه بردو فى سخونيه - حد قبلته الحكايه دى قبل كده و ايه حلها يا رجاله ؟