قدامى تيمبرا 1991

**mikology** · 31-05-2009 12:34 AM

انصحونى
قدامى تيمبرا 1991
فول اوبشن فابريكه بره و جوه
تعمل كام يا جماعه
حالتها كويسه جدا

**mikology** · 31-05-2009 01:48 AM

رجاله التمبرا فين يا جدعان
قولولى عيوبها و مميزتها عشان لو كده اخلص مع الراجل
مستنى ردكو ضرورى

**mikology** · 31-05-2009 03:48 AM

التكمله
العربيه موديل 1991 زى ما بيقول (انا قاعد ادور فى النتدى على الموديل ده ومش لاقيه )
1400 سى سى - ماخدتش بالى عامله كام - هاسال و اقولكو بردو
رشه رفرفين ورا وباب -الباقى فابريقه و شكلها نضيف قوى - ولا الهوا يعنى
هى فول اوبشن و كل اللى فيها بتاعها
تكييف تاتش
مفتاحها الاصلى بالريموت
4 زجاج كهربا
عدادات ديجيتال
فتحه سقف كهربا
باور

بس فى حاجات لاحظتها ..
انا دورت العربيه كده عشان ابص على صوت الموتور وطلع صوته واطى و هادى بس محتاج سيير - السير شكله عاوز يتغير او يتشد
اول ما دورت استنيت دقيقه كده و بصيت على الحراره لا قيتها شارطه واحده
شغلت التكييف لاقيتها هاتبطل - زودت بنزين - لاقيت الموتور رجع تانى
شيلت رجلى من على البدال لاقيتها بتستهبل كده وراحت مبطله
سبتها شويه تانى لحد ما وصل العداد لحد 3 او 4 شرطات
وشغلت التكييف اشتغل تمام بس التكييف بردو فيه حاجة
بدوس على + عشان اعليه - درجه .... درجتين .... افضل دايس لحد قبل الاخر بشرطه وهو مش معبرنى و مش عاوز يشتغل
ييجى عند الشرطه الاخيره و يحن عليا و يشتغل و كمان ساعات بيعلق خالص افضل ادوس ادوس لحد ما ينطق
سألت الراجل قالى العيب فى الزرار بيعلق فعلا
حاجة تانى
الباور و انا واقف احرك الطاره يمين شمال اسمه زنه
قالى اصل الباور كان بيخر زيت وانا سبته كده فتره و نتيجه لكده عمل الصوت ده من علبه الباور عاوزه تتغير - وكمل وقالى: على فكره وهى ماشيه زى الفل مابتسمعش حاجة بس لما بتقف بتسمع الصوت ده!
انا بصراحه لسه مامشتش بيها - لسه هاجربها الصبح فى النور وكمان عشان افليها

عاوز رأيكو بقا يا تيمبراويه ولا انتو مش عاوزنى فى ابقى تمبراوى زيكو؟
الراجل عارضها عليا ب 37 الف
ايه النظام دلونى..

**galilio_mad** · 31-05-2009 09:51 AM

عادى يا باشا , فى تمبرا 91
و ساعات فى عربيات احدث بتدخل بنظام المعاقين و ورقها بيكون متغير من بره و بتترخص عادى جدا لان المرور ليه الورق

المهم ,
التكييف تقريبا مشكلة ضبط ممكن برضو تخلى ميكانيكى يبصلك على حالة الموتور عامة و يضبط الموتور و تجرب التكييف
المفاتيح ساعات بتعلق فعلا , عند والدى فى التمبرا النص الاولانى من المؤشر تقريبا ما بيغيرش دفع الهوا

صالصوت اللى فى الطرمبة عادى جدا و فعلا من نقص الزيت , انا ماشى بيه من ييجى سنتين , طالما تم علاج التسريب و العلبة دايما فيها زيت مش حيحصل حاجة ان شاء الله

عامة , العربيات دى جميلة , متوازنة جدا و بتوفر الراحة و الاداء المعقول و التوفير فى المصاريف
قطع غيارها موجودة و باكتر من منشأ و لو كربراتير اى ميكانيكى ممكن يظبطها

السعر تقريبا كويس بس اهم حاجة فحص العربية كويس جدا ميكانيكا و عفشة و سمكرة عشان لو فى بارومة و لا تكون عاملة حادثة لا قدر الله

و ربنا يوفقك

**ZALABANY** · 31-05-2009 11:04 AM

المشاركة الأصلية كتبت بواسطة mikology

التكمله
العربيه موديل 1991 زى ما بيقول (انا قاعد ادور فى النتدى على الموديل ده ومش لاقيه )
1400 سى سى - ماخدتش بالى عامله كام - هاسال و اقولكو بردو
رشه رفرفين ورا وباب -الباقى فابريقه و شكلها نضيف قوى - ولا الهوا يعنى
هى فول اوبشن و كل اللى فيها بتاعها
تكييف تاتش
مفتاحها الاصلى بالريموت
4 زجاج كهربا
عدادات ديجيتال
فتحه سقف كهربا
باور

بس فى حاجات لاحظتها ..
انا دورت العربيه كده عشان ابص على صوت الموتور وطلع صوته واطى و هادى بس محتاج سيير - السير شكله عاوز يتغير او يتشد
اول ما دورت استنيت دقيقه كده و بصيت على الحراره لا قيتها شارطه واحده
شغلت التكييف لاقيتها هاتبطل - زودت بنزين - لاقيت الموتور رجع تانى
شيلت رجلى من على البدال لاقيتها بتستهبل كده وراحت مبطله
سبتها شويه تانى لحد ما وصل العداد لحد 3 او 4 شرطات
وشغلت التكييف اشتغل تمام بس التكييف بردو فيه حاجة
بدوس على + عشان اعليه - درجه .... درجتين .... افضل دايس لحد قبل الاخر بشرطه وهو مش معبرنى و مش عاوز يشتغل
ييجى عند الشرطه الاخيره و يحن عليا و يشتغل و كمان ساعات بيعلق خالص افضل ادوس ادوس لحد ما ينطق
سألت الراجل قالى العيب فى الزرار بيعلق فعلا
حاجة تانى
الباور و انا واقف احرك الطاره يمين شمال اسمه زنه
قالى اصل الباور كان بيخر زيت وانا سبته كده فتره و نتيجه لكده عمل الصوت ده من علبه الباور عاوزه تتغير - وكمل وقالى: على فكره وهى ماشيه زى الفل مابتسمعش حاجة بس لما بتقف بتسمع الصوت ده!
انا بصراحه لسه مامشتش بيها - لسه هاجربها الصبح فى النور وكمان عشان افليها

عاوز رأيكو بقا يا تيمبراويه ولا انتو مش عاوزنى فى ابقى تمبراوى زيكو؟
الراجل عارضها عليا ب 37 الف
ايه النظام دلونى..

بص ياباشا هي العربيه كويسه بس غاليه السعر ده كده كتير على موديل 94 موضوع التكييف ده انه يبطل في حاجه ايمها جفرنر في الكاربيراتير في الغالب فيه مشكله وهو ده اللي بيعلي الموتور لما تشغل التكييف وده باظ عندي ولقيته بطلوع الروح ب 100 جنيه استيراد وكنت هاشتري كاربيراتير كامل
الحاجه التانيه العربيه دي فول اوبشن فتحة شقف كهربا و4 زجاج كهربا فتحة السقف الكهربا قطع غيارها مش موجوده وكذلك مكن الزجاج الخلفي وده اللي خلاني اشتريت العادة 37 ممكن تجيبلك 1600 وحالة العربية برده تفرق ولو احتجت اي حاجه انا موجود

**galilio_mad** · 31-05-2009 11:30 AM

المشاركة الأصلية كتبت بواسطة zalabany2007

الحاجه التانيه العربيه دي فول اوبشن فتحة شقف كهربا و4 زجاج كهربا فتحة السقف الكهربا قطع غيارها مش موجوده وكذلك مكن الزجاج الخلفي

مكن الزجاج الخلفى هو هو بتاع اللنشيا الديدرا و ده موجود فى الاستيراد
فتحة السقف مفتكرش انها صعبة فى الصيانة لو حاجة باظت

و الف مبروك على الجفرنر يا معلم :)

**ZALABANY** · 31-05-2009 12:15 PM

الله يبارك فيك يا جاليليوا بس والله يافرحة ما كملت عشان الجفرنر اللي لقيته بتاع التمبرا اللي مش مكيفه ماسوره واحده للتكييف والسخان الاوتوماتيك كده مش شغال لحد ما الاقي الاتنين ماسورة

كويس ان مكن الزجاج هو هو مكن اللانشيا عشان سألت على بتاع التمبرا عند الكيلاني ويوسف ما لقيتهوش
بس انا بتكلم على السعر شايفه كتير على الموديل ده

**mikology** · 31-05-2009 12:16 PM

شكرا على سرعه استجابتكم يا رجاله
انا مش عارف اذا كانت كارببرتايرولا لأ - عارفه و اقولكو
تانى حاجة نسيت اقولكو ان بردو الفتيس حاسس ان الحارات بتاعته بعيده عن بعض مش زى اى عربيه جديده - حاسس ان فى مشوار من الاول للتانى
ده ايه نظامه ده

**abdelmessih67** · 31-05-2009 01:50 PM

أهلا يا أخ ميكولوجي

أنا لسه شاري تمبرا مو 98 من حوالي شهرين و شوية و بصراحة عربية تحفة و لكن لسه خبرتي في الميكانيكا بتاعتها
مش قوية لكن انا جبتها كاملة مانيوال أول يد ب 36.5 الف جنيه و فابريكة من جوة فقط و من الخارج السقف و رفرف واحد فقط هو اللي فابريكة و الباقي رش .

بصراحة العربية نشكر ربنا حالتها جيدة جدا لانها كلفتني حاجات بسيطة و رجعت كأنها جديدة , 100 جنيه لحام رادياتير
100 جنيه شحن تكييف و بقية أجزاؤه سليمة , 500 جنيه خرطوم ضغط عالي للباور يعني حوالي 700 جنيه و رشيت بعض الحكات و الخربشات و أديتها رشة ورنيش كاملة ب 750 جنيه .

يعني العربية كلها وقفت بعد استكمال كل النواقص ب 38 الف جنيه و لكن ربنا يكفينا شرها بقت كأنها فابريكة .

لهذا فأن 37 الف على مو 1991 كثير جدا حتى لو كانت ايطالي و كاملة لانها كمان 1400 سي سي و ليس 1600 سي سي

ثم كلامك عن علبة الدركسيون يقلق شوية , علبة الدركسيون الجديدة ب 4000 جنيه مرة واحدة و لو استيراد تقف بحوالي
700 جنيه حسب حالتها .

خرطوم الضغط العالي لعلبة الدركسيون ده لوحده ايطالي ب 450 جنيه .

يعني لا قدر الله لو علبة الدركسيون هتتغير بالخراطيم تخش لوحدها في 1500 جنيه و يمكن أكثر فبرجاء مراجعتها جيدا .

بالنسبة للتكييف فلو وحدة رفع السلانسيه محتاجة تغيير فدي لوحدها بتكلف مبلغ كبير , و بعدين راجع المروحة الكهربائية اللي على الرادياتير و سربنتينة التكييف لانها من المفروض ان تعمل أوتوماتيكيا مع التكييف و مع وصول الحرارة ل 90 .

بصراحة موضوع مو 1991 و فابريكة من بره كمان دي غريبة شوية لان صعب عربية بقالها حوالي عشرين سنة و مرشتش من بره فبرجاء فحص الرش في البنزينة لان عندهم جهاز بيحس بالرش عن طريق مجسات معينة .

أنا يهيئ لي لو هي ممتازة زي ما بتوصف تعمل في حدود 32 الف و ابتدي من هنا , يعني أي تكاليف أضافية تخصم من ال 32 الف .

**galilio_mad** · 31-05-2009 02:07 PM

عربية و الدى التمبرا القديمة كانت 91 برضو اشتريناها و بعناها فابريكة , الراجل اللى اشتراها معرفة و لسه ما رشش حاجه
مش مشكلة ان العربية بقالها كام سنة و رشت و لا ما رشتش , القصة فى الحالة و تقييم الحالة دى
فى عربيات موديلات الفينات و رشه بره و جوه

الفيصل بيبقى الكشف الدقيق
السعر , انا باقول تقريبا كويس و السؤال مطلوب برضو
احنا بعنا القديمه 91 و 1400 تكييف و سنتر و زجاج كهربا قدام من 3 سنين بحوالى 41.5 و كانت ال 1600 فى حدود 46-50
دلوقتى معرفش اسعار و عادة بتبقى متقلبة شويه حسب السوق

علبة الدركسيون ملهاش علاقة بالصوت , ده من الطرمبه و تمنها 700 جديده و مرميه عند بتوع الاستيراد
العلبه لو فيها حاجه , اول حاجه حتعملها انها تنقط زيت , طالما مفيش تسريب مفيش مشكلة