اضرار التربو و الفلتر و الديفل

**nitron** · 09-07-2009 03:58 AM

بص يا سيدى عشان تعرف التربو هيضر العربيه ولا لا انت لازم تعرف ان اتربو هوه نظام شحن هواء جبرى داخل المتور بتاع العربيه المتعدله و الهوا ده بيعلى قدره احتراق الوقود اى انكان نوعه وعشان كده اول مشكله هتابلك هى ارتفاع الحراره داخل المحرك يبقى هضطر انك تحسن نظام التبريد و ان حسنت نظام التبريد فى مشكله ممكن تابلك لكن نادره شويه هى ان علبه التروس متستحملش الباور الشديد الى دخل عليها بس دى نادره جدا

**Mr_MoMo** · 18-07-2009 09:52 AM

لو اتكلم بصفه عامه الضرر محدش سلاحظو بس انا حكلمك اكاديمي , او تفكير هندسي , بص يا سيدي , بالنسبه للفلتر او التربو , او النوز او اي حاجه تزود من الهورس بور بتاع العربيه , تزودو يعني , معنا ان الهورس بور زاد يعني فيه حرق, زيادة نتيجه لهوا زيادة داخل عالموتو , سخن من التربو او بارد من فلتر رياضي , المهم كدا كدا العربيه حتحرق معاك و حتشد تمام , الحرق دا عالمدى الطويل بيأكل عمر الموتور , بيفرهدو يعني , و لو انت حريييق اوي و بتشد كتير و فرامل كتير يبقا حتجيب منك كبالن كتير لو هيا كبالن , و طبعا قواعد موتور, فا خلي بالك , خلي العربيه مظبوطه ظبط المصنع علشان تعيش معاك , لان المصمم فلتر العربيه بحجمه دا و بالطريقه دي مش خروف يعني , دا مهندس قد الدنيا كلها , و حاسب كل حاجه بالنانو تكنولوجي كمان , ياريت اكون افدت , شكرا ..

**midomasry** · 18-07-2009 01:34 PM

اللي بيزود استهلاك العربية مش التعديلات و انما طريقة استخدامها
و طبعا طالما انت معدل يبقى حاتحرق و حاتشد و بالتالي حاتهلك الموتور اكتر

يبقى اللي بيهلك العربية الحرق و القرص مش التعديل نفسة, بس التعديل بيساعدك على انك تحرق اكتر و بالتالي تستهلك اكتر

فرض نظري انك معدل العربية بس ما بتشدش و لا بتحرق و انما بتستعملها عادي خالص, فرضاً يعني
تفكتروا العربية حاتستهلك ؟؟ ماعتقدش!!

**NFS** · 25-08-2009 06:08 AM

ليه كل المواضيع للناس الى بتسال عن تزويد قدره العربيه سوا عن طريق تربو ولا تسقيط موتور سعته اكبر... كل النصائح بتقول تغيير الفرامل و العفشه علشان تشيل العزم و القدره الاكبر, و محدش بيتكلم عن الكوبلن, هو كوبلن العربيه الاصلى بيستحمل العزم الزياده عادى ولا هو فعلا بيتغير ودى حاجه بديهيه ؟! معلش سوال غريب, اصلى مبتدى حبتين

**Ahmed Samy** · 25-08-2009 06:41 AM

المشاركة الأصلية كتبت بواسطة nfs

ليه كل المواضيع للناس الى بتسال عن تزويد قدره العربيه سوا عن طريق تربو ولا تسقيط موتور سعته اكبر... كل النصائح بتقول تغيير الفرامل و العفشه علشان تشيل العزم و القدره الاكبر, و محدش بيتكلم عن الكوبلن, هو كوبلن العربيه الاصلى بيستحمل العزم الزياده عادى ولا هو فعلا بيتغير ودى حاجه بديهيه ؟! معلش سوال غريب, اصلى مبتدى حبتين

يااااااااااااااااااه

فكرتني بموضوع من زماااان

كان الحوار ان هل الأمركة تكسر عمود الكبالن

فاكر يا محمد يا ممدوح

كانت ايام ..خل

**NFS** · 25-08-2009 07:00 AM

طب و وصلتو لايه هل ممكن تكسرو؟! انا اعتقد لا

**Ahmed Samy** · 25-08-2009 07:05 AM

المشاركة الأصلية كتبت بواسطة NFS

طب و وصلتو لايه هل ممكن تكسرو؟! انا اعتقد لا

وصلنا انه "نظريا" على عدد لفات مرييييييييييييييييييييييي يييييييييع ممكن يتلوي

بس عدد اللفات ده محتاج موتور طيارتين مثلا

لكن عمليا ما بيحصلش

و اللي كان بيدعي انه ممكن عمليا ما أثبتش كده

الله يرحمه بقى

**NFS** · 25-08-2009 07:09 AM

طمنتنى الله يطمنك, بس متعرفش اجابه لسوالى الاولانى, كوبلن العربيه الاصلى يقدر يستحمل عزم التعديلات الكبيره او المواتير الى سعتها اكبر ولا؟!

**MMamdouh** · 25-08-2009 11:52 AM

بالنسبة لموضوع كسر الكبالن و كدة...

اسال اى مهندس حيقولك ان قوة السلسلة الحديد بتقاس بقوة اضعف حلقة فيها... لان دى اول حلقة حتتكسر لما يبقى فيه حمل و اول ما تتكسر بتبعتبر السلسلة باظت... حلو الكلام؟؟؟

نفس المبداء حنطبقة على العربية... و حنعتبر الحلقات هى قواعد الموتور والفتيس و الدبرياج و الفتيس نفسة و الكبالن و الكاوتش... اللى هى الاجزاء اللى بتنقل الحركة من المكنة الى الارض

فى العربيات المتعدلة اول حلقة بتتكسر فى الساسلة بتاعتنا هى اسطوانة الدبرياج (بفرض انك مركب كاوتش من نوعية محترمة مش نسر يعنى و كدة) و الاسطوانة بتفوت و تتحرق نتيجة العزم الكبير للمكنة و بيتم التغلب على دة بتركيب طقم دبرياج رياضى

تانى حلقة بتتكسر بعد الدبرياج هى الكاوتش... و هنا بتكلم على الكاوتش بتاع الاستخدام اليومى مش مثلا كاوتش بتاع سباقات slick tires او كاوتش دراج و ساعتها العربية بتامرك للصبح و الكاوتش بيتحول الى سحابة من الدخان نتيجة الحرارة الناتجة من الاحتكام بالارض... و حل الموضوع دة هو تركيب كاوتش مخصص للسباقات حسب نوعية السباق

الحلقة التالتة هى الفتيس... لو مركب طقم دبرياج رياضى محترم و فرد كاوتش ماسكة فى الارض صح و المكنة كانت عفية و بتطلع عزم اكبر من ما يتحملة الفتيس حتكسر التروس... و دى حصلت بالفعل مع واحد معاه اوبترا 2000 و عليها تربو و العربية كانت بتطلع 237 حصان... الفتيس مات لما حط تالت... و صور الفتيس لما اتفك كانت تصعب على الكافر

بالنسبة لقواعد الموتور و الفتيس فا دى حسب تصميم القاعدة نفسها و قوة تحملها و ملهاش قاعدة محددة... يعنى ادم كسر قاعدة فتيس بالمكنة ال 2000 من غير تربو فى حين ان الاوبترا ال 2000 التربو و النوبيرا ال 2000 التربو مكسروش قواعد خالص

واضح من الكلام طبعا ان فيه 4 حلقات بيحصل فيها مشاكل مع التعديلات الكبيرة و ولا واحدة منهم ليها علاقة بالكبالن... و بالمنطق كدة لو فيه فرصة ان الكبالن تتكسر يبقى لازم انت مركب دبرياج التنين اللى مبيفوتش ابدا و عندك فتيس مصنوع من التايتنيوم و الموتور و الفتيس متثبت فى الحوض بصبة خرسانة و العجل ملزوق فى الارض بامير... ساعتها ممكن يبقى فيه احتمال ضعيف انك تكسر الكبالن

اعمل بحث على اليوتيوب حتلاقى عربية BMW ُ34 قوتها فوق ال1000 حصان و الراجل كان ممرمط العربية فى مهبط طائرات و مقضيها دريفتات و برنات و الكبالن متكسرتش ولا حاجة

MMamdouh

**MMamdouh** · 25-08-2009 11:54 AM

المشاركة الأصلية كتبت بواسطة Ahmed Samy

يااااااااااااااااااه

فكرتني بموضوع من زماااان

كان الحوار ان هل الأمركة تكسر عمود الكبالن

فاكر يا محمد يا ممدوح

كانت ايام ..خل

فاكر يا باشا فاكر

MMamdouh

الموضوع: اضرار التربو و الفلتر و الديفل

LinkBack

أدوات الموضوع

عرض

-

-

-

-

-

-

-

المواضيع المتشابهه

يجماعه اللي عاوز الفلتر السيموتا الفلتر موجود

سؤال عن الديفل

الديفل

الفق بين الفلتر العادي و الفلتر k&n ؟؟؟

هو ايه الديفل؟

الكلمات الدلالية لهذا الموضوع

المفضلات

المفضلات

ضوابط المشاركة