زي اللي ممكن يتعمل مع أي موتور تاني ( فيما عدا طبعا تعديل ال computer chip لانها كاربراتير) و دة على حسب مستوى التعديل اللي انت عايزه
المستوى الأول
تقدر تجيبلها فلتر سبور عشان يدخل هوا أكتر ( راعي تجيبه للكاربراتير مش للانجكشن عشان ما تدوخش بعد كدة هاتوصله إزاي )
طقم بوجيهات NGK , أو split fire بالكابلات بتاعتهم
المستوى التاني
كاربراتير 2 كامة 16 صباب
هيدرز بماسورة شكمان 2" عشان يطلع العادم كويس و الموتور ما يبقاش مكتوم
MSD عشان يزودلك كهربا العربية من 12 , لـ 16 فولت
المستوى التالت
تقدر تركبلها تربو أو سوبر تشارجر , و دة يديك تقريبا 30% زيادة من الهورس باور بتاع الموتور
و طبعا لو عليت الهورس باور بتاع الموتور أوي كدة , يبقى هتحتاج تغير تغير اجزاء أساسية تانية عشان تستحمل الاداء دة
يبقى هتحتاج طقم بساتم مضغوط
طقم دبرياج سبور
تغيير فتيس
طلمبة بنزين عشان تقدر توازي سحب البنزين الكتير المطلوب
إحتمال تغيير كرونة
بس لاحظ
أولا
انا جمعنهم في مجموعات عشان أقربلك الفكرة و اديلك من خلالها خلفية على مستوى المصاريف ( طبعا كل ما علي المستوى كل ما هاتصرف أكتر) , لكن مش معنى كدة ان كل مجموعة لازم تكون مع بعض , انت بتختار اللي انت عاوزه
ثانيا
ان اللي انت سألت عليه هوة تعديلات الموتور , و دة اللي انا قلتلك عليه
لكن العربية منظومة متكاملة , يعني لو انك زودت الموتور و بقى قوي و بيجري , يبقى لازم تعدل الفرامل عشان تقدر توقف القوة دي
ولازم تغير العفشة و تجيب عفشة سبور عشان تقدر تتحكم فيها على السرعات العالية و إلا ..
و تجيب طقم جنوط و كاوتش أعرض عشان تزيد مساحة تلامس العربية مع الأرض و تكون ثابت على الارض مع السرعة دي
ثالثا :
أي تعديل بيتعمل على الموتور عشان تطلع منه قوة و سرعة أكتر طبعا بيأثر على عمر الموتور , و معظم التعديلات دي , بتأثر على استهلاك البنزين كمان, يعني ما تسألش بعد كدة البنزين راح فين
اسف ان كنت طولت عليك
و عموما ربنا يوفقك ,و ابقى قوللنا عملت ايه فيها
المفضلات