الموضوع: حسدت نفسي في الحرارة

انا فكرت في كدة بس انا مش ملاحظ موضوع استهلاك البنزين دا اوي انا اللي باين معايا السحب العربية ميتة شوية بس انا لما اركب الترموستات الحرارة هتعلي مش هتبقا زي دلوقتي ياعني

المشاركة الأصلية كتبت بواسطة opelvectra

انا فكرت في كدة بس انا مش ملاحظ موضوع استهلاك البنزين دا اوي انا اللي باين معايا السحب العربية ميتة شوية بس انا لما اركب الترموستات الحرارة هتعلي مش هتبقا زي دلوقتي ياعني

لا ياباشا لا هاتعلى ولا حاجة. الترموستات ده بيقفل دورة التبريد لغاية ما درجة الحرارة توصل 81 درجة وبعد كدة بيفتحها تاني يعني هو وظيفته انه يمنع درجة الحرارة انها تقل عن حد معين انما مش بيسخن العربية ولا حاجة
وديه مشاركتي في موضوع مشابه

المشاركة الأصلية كتبت بواسطة abdelaziz-waleed

معلش يا صبري باشا في التأخير في الرد

اولا بالنسبة للترموستات:
من المفضل انك تركب الاصلي اللي هو ليه 2 مدى حراري او يشغل المروحة على سرعتين وده بيسموه 3 رجل بكسر الراء. وده المدى بتاعه 95/100 - 100/105 يعني المراوح تشتغل على السرعة الاولى عند 100 والتانية عند 105. الغريبة ان انا راكب عندي الاصلي ده اللي هو الجي ام. وبيشغل المراوح عند 92 ويفصل عند 87 وديه درجة حرارة مثالية للاوبل. ثانية كدة اريح للمراوح خاصة بعد ما بتبطل العربية المراوح هاتفضل شغالة مدة طويلة وتقصف عمر البطارية دا غير ان عمر المراوح هايكون اقل
انا كنت ركبت ترموستات اسباني فترة من الوقت ودرجة حرارة العربية ماكانتشي بتزيد عن 85 ابدا حتى لو واقف في الزحمة وماعجبنيش الوضع ورحت اشتريت الاصلي وركبته

بالنسبة لترموستات الكوعة فا ده مش مسئول عن المراوح. ده مسئول عن تشغيل دورة التبريد وده فائدته
1- في الصباح اثناء تسخين المحرك يعمل على ايقاف دورة التبريد وده بيساعد في تقليل وقت احماء المحرك وتفعيل عملية التزييت لأن الزيت لا يكون فعال في درجات الحرارة المنخفضة مثلما يكون في درجات الحرارة المرتفعة وبالتالي بيجنب المحرك الدوران بدون تزييت جيد فترة طويلة ويحافظ عليه
2- عند وصول درجة الحرارة 81 درجة (ده اللي موجود عندي) هتلاحظ ان درجة الحرارة انخفضت فجأة ل 78 درجة وديه اللحظة اللي بدأت عندها دورة التبريد في التشغيل عن طريق الاشارة اللي وصلتلها من ترموستات الكوعة
3- اثناء السفر بتنخفض درجة الحرار بصورة شديدة خاصة في الشتاء. فبيقوم ترموستات الكوعة بغلق دورة التبريد للحفاظ على درجة الحرارة من الانخفاض.
نستنتج من ذلك ان اهمية ترموستات الكوعة هو الحفاظ على ثبات درجة الحرارة عند المستوى المناسب لعمل المحرك
طبعا معظم الكفتجية بيشيلو الترموستات ده ويقولك انه مخصص لدول اوروبا وانه بيسخن الموتور وده اكبر غلط ياريت تحاول تحافظ على الترموستات ده دايما شغال.
الاوبل عربيات بتشتغل بكفاءة عالية في درجات الحرارة العالية ولغاية 97 درجة ده طبيعي ومافيش مشاكل

اهم حاجة بس كل فترة كدة تكشف على دورة التبريد وتتأكد ان مافيش انسداد وان طلمبة المياه شغالة كويس ومافيش تسريب وحاول تركب قطع غيار اصلية. صدقني لو عملت كدة عمرك ما هاتعاني من اي مشكلة في موضوع الحرارة ابداً

بالتوفيق ان شاء الله ياباشا