الفيس بوك....اروع اختراع على الإطلاق

**kemo0o** · 07-06-2009 07:23 PM

المشاركة الأصلية كتبت بواسطة nadernabil

+1
يكفي إنك بترجع تقابل أصدقائك القدامي تاني...و تعرف عنهم أخبارهم...اللي إتجوز و اللي عمل حادثة و اللي إتخرج....و بسببه مابقتش أتحط في مواقف وحشة عشان نسيت عيد ميلاد أو مناسبة مهمة المفروض أفتكرها...
بس بأحاول أخليه فقط وسيلة للتذكير و ماستخدموش عشان أرسل التهاني...علشان مايتحولش لشئ روتيني و قضاء و اجب و خلاص...و عشان مايبقاش الكومبيوتر و الإنترنت هما كل حياتي الإجتماعية

انا معاكم إن فيه ناس بتدمنه و إن الإدمان ده بيوصل لحاجات مش ظريفة...بس في النهاية أهم حاجة الإستخدام المعتدل لأي حاجة في عصرنا...لأن كل شئ و له أضراره و ممكن جداً تكون الأضرار أكثر من المنافع

+999999

**Terrible_DaRsH** · 07-06-2009 07:29 PM

عن نفسي .

الفيس بوك اتعلمت منه حاجات كتــــــــــــــــير جدا جدا ..

مش ذنب الفيس بوك ان واحد يدخل يدور على بنات وواحد يعمل جروب يشتم فيها اللى عايزه وواحد بيدور على حاجات تانية بمزاجه !

الرك على المستخدم و ليس الموقع .

و على راى الشيخ الشعراوى . الواحد ممكن يستخدم الميكروفون فى عمل ندوات دينية و لكنه فى نفس الوقت ممكن يقلق واحد بيذاكر , و ده بياكد الرك على المستخدم .

**نور القمر** · 07-06-2009 08:23 PM

المشاركة الأصلية كتبت بواسطة aboelnagah

لانى لقيت ان الفيس بوك واخد كل وقتها ومسلمه نفسها للفيس بوك وبتقضى عليها ساعات كتير زى ناس كتير

واكتر حاجة بتخنقنى فى الفيس بوك الكومينت اللى بيقوله الشباب للبنات فى لو كويز ولا حاجة
(( انتى جامدة يابت _ انتى جميلة يا عسل _ وحاجات تانية غريبة ))

يعنى ايه الجمال فى كده هو ده الفيس بوك ونشر الوعى والفكر والثقافة

فى مواقع كتير احسن منالفيس بوك وبرده تقضى عليها وقت لذيذ وهتستفاد

والفيس بوك ده عامل زى الشات , كله بيحور على كله

ده من وجهة نظرى الشخصية

ممكن فى ناس تقول ايه الرخم ده ولا اللى عامل نفسه مثالى مثلا , وانا مش كده والله بالعكس انا شاب عادى جدا وبحب الضحك وكل حاجة وكنت بدخل اعمل شات من اول ما قالوا ياهو وهوت ميل من حوالى 8 سنين واكتر فعرفت فى النت ايه الحلو وايه الوحش

انا كدة فهمت قصدك ولك حق طبعا
سامحني انا في الاول كنت فاهمة ان انت اللي بتدخل الفيس بوك مش هي وانه تسبب في الغاء مشروع الخطوبة
على فكرة انا كمان بسترخم جدا الاسلوب اللي بيستخدموه الشباب في الكلام مع البنات عسل وقمر وجميل وبحاول ديما اخلي في حدود للكلام معايا
وبحاول افهم اننا ممكن نكون اصدقاء في حدود النت لكن بدون استخدام التعبيرات اللي ملهاش لازمة دي
اللي بستغربله بجد البنات اللي بيكون عاجبهم الكلام ده وفاكرة مدام شاب قالها ياعسل يا قمر بقت عسل وقمر خلاص
معرفش ازاي بياخدوا بكلام الاونطة والبكش ده
ربنا يصلح حالنا اجمعين

**aboelnagah** · 07-06-2009 09:38 PM

لا عادى يا نور القمر ,, انا فهمت وجهة نظر حضرتك

ايه الشئ الممتع لما الاقى بنت داخلة واحطه مجموعة صور ليها طيب ما هى بسهولة جدا ان حد يعمل ليها كوبى وتبقى عنده على الجهاز

هل دى الخدمة اللى بيقدمها لينا الفيس بوك ,

وفى حاجة انا متأكد منها وبالذات فى الشات , وبالذات فى الشات

(( مفيش شاب بيكلم بنت على الشات الا وقصده حاجة وحشه وعمره ما هيكون من جواه يحترمها لان كل الشباب بيدخل الشات علشان يحور ويعمل علاقة وموبيلات وحوارات وهو يعيش حياته وهى تعيش حياتها ))

طبعا محدش يفهمنى غلط ويقول انى بعمم كلامى لكن بسنة كبيرة

وممكن حد يقول عليا انى رخم وعامل نفسى واد مثالى وعمرى ما غلط ولا يعنى عاوز اعدل الكون , لكن انا بقول كده من وجه نظرى ومن بعد معرفه كبيرة جدااااااا بخبايا الشات والنت

**نور القمر** · 07-06-2009 09:59 PM

يعني اعتقد كلنا في فترة من الفترات مر علينا موضوع الشات ده وفي مننا اللي لسه مستمر فيه وفي ناس عقلت ولله الحمد زيي كدة

عايزة اقولك ان الشات فيه الحلو والوحش والغالبية من النوع الوحش
وفي ناس وخصوصا الشباب بيبقوا داخلين الشات علشان حوارات البنات والكلام ده لكن لما بيقابلوا شخصيات محترمة مفهومهم بيتغير تجاه الشات

الشات زيه زي اي مكان استخدمناه كويس هايبقه كويس .. استخدمنا غلط هايبقه زقت وطين
انا فاكرة من مدة كان قريبي عامل شات وكان مانع دخول الزوار له واللي عايز يدخل لازم يسجل عضوية وكان عامل ادمنية من معارف شخصيين له على مدار ال 24 ساعة وكدة هو متحكم في الشات لاقصى درجة
كان اي عضو يثبت انه غير جدير بوجوده في الشات او انه غير محترم تتلغي عضويته فورا
وكدة الشات بصراحة مبقاش فيه غير صفوة الناس وفعلا بالرغم ان الشات اتقفل من حوالي 3 سنين لكن عمري ما هنسى الناس الجميلة اللي اتعرفت عليهم فيه

**aboelnagah** · 07-06-2009 10:11 PM

كلامك صح يا نور القمر

انا اللى قابلتهم فى الشات ناس كويسة يتعدوا على الصوابع مش ياما وفى منهم اللى خدمنى بجد وفى منهم اللى مالهوش اى لازمة

وفى ناس محترفة فى موضوع يعمل ايميل باسم مثلا (( نسمة ))

تدخل تكلمه وكانه بنت وبتاع وتلاقى فى الحقيقة اسمه عبدالعال ولا عويس

يعنى حاجة تجيب شلل وقراع وصراع وكل حاجة اخرها اااع

انا عن نفسى لا شات ولا بتاع اخرى اكلم الناس صحابى من ايام الكلية والمنتدى ده وفقط لا غير وشكرا وده كل استخدامى للنت رغم انى عندى شركة والنت معايا 24 ساعه