اســــطوانة الدبرياج

**sherif_84** · 05-10-2007 01:31 AM

دلوقتى انا عندى فالشاهين خلاص داخل على 50000 كم العربية موديل 2003
ولما كنت مرة فالشركة عشان كنت بربط العربية سألتهم عليها فقالوا لازم تتغير عند الخمسين ألف بس انا مش شايف أى مشكلة فى الدبرياج وحالتة كويسة مافيش مشاكل فهل الأفضل أغيرها زى ماقالو ولا أستنى لغاية ما تنتهى خالص هى مش غالية تقريبا بـ 80 جنيه التركى
شكرا

**hazem_khidr** · 05-10-2007 06:31 AM

ما تغيرهاش طالما العربيه بتسحب معاك و ماشيه كويس و لما بتبوظ بيبقي ليها علامات قبلها يعني مش بتعطل فجأه لا دي العلامات بتظهر زي ضعف السحب و صعوبه علي المطالع و الحاجات دي و ممكن تقعد سنه كمان بعد ما العلامات تظهر.
يعني من الاخر بلاش تفتح علي نفسك باب و تحل الموتور و لما تغير الاسطزانه علي الاقل حتضطر تغير البليه كمان دا غير المصنعيه ف يستحسن تسيبها لما تجيب اخرها

**أبو عبدالله** · 05-10-2007 06:57 AM

متهيألي اللي يفيدك في الموضوع ده هو المهندس سبعاوي

ولكن هو عموما بيبقى في فترات امان لمثل هذا وكمان بالذات ان سعرها رخيص

**sherif_84** · 05-10-2007 03:14 PM

والله يا أبو عبدالله هو الأستاذ سبعاوى مشغول جدا الأيام دى دا حتى انا بعتله رسالة عالخاص بخصوص المساعدين ولسه ماردش عليا الكلام ده من أسبوع تقريبا
وشكرا يا أستاذ حازم على ردك والاهتمام بالسؤال خلاص عموما أنا هستنى عليها مادام هى كويسة وعلى رأيك عشان مافتحش عليا فتحة

**hazem_khidr** · 05-10-2007 05:12 PM

والله يا أبو عبدالله هو الأستاذ سبعاوى مشغول جدا الأيام دى دا حتى انا بعتله رسالة عالخاص بخصوص المساعدين ولسه ماردش عليا الكلام ده من أسبوع تقريبا

الباشمهندس سبعاوي طبعا محدش يقدر يقول كلمه فوق كلامه.

وشكرا يا أستاذ حازم على ردك والاهتمام بالسؤال خلاص عموما أنا هستنى عليها مادام هى كويسة وعلى رأيك عشان مافتحش عليا فتحة

العفو عليه ايه يا شريف بيه انا لو مش متاكد من اجابه السؤال مكنتش جاوبت علشان دي مسئوليه و مستحيل اني اقولك معلومه من وحي الخيال

**yahyanaabil** · 06-10-2007 01:10 PM

لا طبعا متغيرهاش لسه بدرى اوى غليها الا اذا كنت انته بقى يتحب تخمس وتفرك بالعربيه
انا فاكر كنا غيرناها عند ال120000 تقريبا(الاسطوانه والدسيك والبليه)

**ahmed1981** · 06-10-2007 11:56 PM

الإسطوانة متغيرهاش إلا لما تبدأ تظهر عليها أعراض البوظان زي:
*تدوس بنزين العربية متسحبش كويس والموتور صوته يعلى كإنه بيفلت لفات على الفاضي
*يحدث تصفير من الإسطوانة
*تحدث هزة عند الحركة من الثبات (خشونة في الإسطوانة)

**tutankhamoun** · 08-10-2007 01:44 PM

في رآيي المتواضع أنك متغرش اسطوانة الدبرياج إلا لما يبان حاجة ....... زيما الأخوة الأفاضل تفضلوا بالشرح سابقا
بس ما شاء الله ....... ما شاء الله
اسطوانة الدبرياج ب 80 جنيه !!!!!!!!!!!!!!!!!!!!!!!!!!
ده أنا مغير بتاعتي ب 450 جنيه مع بلية ب 60 جنيه + 150 جنيه مصنعية
ربنا يباركلك فيها يارب ........... و عيد سعيد عليك و على كل أعضاء المنتدى و كل من شارك في الموضوع