السلام عليكم ورحمة الله وبركاته
ااحقيقة يا جماعة انا محتار جدا في موضوع شراء سيارة جديدة. وقريت كتير على المنتدى وسمعت من ناس كتير ومش قادر ارسى على بر. باختصار انا عاوز اشتري عربية لايزيد سعرها باي حال من الاحوال عن 100000 جنيه مصري. انا قدامي اختيارات كتير بس مش متأكد ايه الافضل
كيا نيو سيراتو مانيوال بس حاسس انها اقل بكتير من الاوتوماتيك وكمان خفيفه ولسة جديدة في السوق
ميتسوبيشي لانسر لو كان قدامي ال 1600 كنت اجيبها وانا مطمن بس للاسف سعرها يعدي والمتاح قدامي هو ال 1300 وفيه ناس بتشككني فيها
النيسان صني ناس كتير بتعيب فيها خصوصا اتها تقفيل مصري بالرغم انها عربية ياباني
هيونداي الانترا بالرغم من ان شكلها شيك جدا وفي كماليات اكتر من سيراتو اعتقد وكمان سعرها ارخص بالرغم من انها كوري زي كيا بس ثباتها على الطريق وقوة تحملها محل شك
اخيرا بقه البريليانس سبلندور انا شوفتها في اتوماك وشوفت كتالوج ليها شكلها وهمي وفيها كل الكماليات وموتور ميتسوبيشي كمان بس في النهاية عربية صيني وديه حاجة مش تطمن اوي
انا يهمني العربية تكون بتستحمل وفيها كماليات كويسة تناسب سعرها وقطع غيار متوفرة بسع معقول مش عاوزها عشان اجري بيها على الطرق او اشغلها لحساب شغل يعني استخدام شخصي عادي. اتمنى اني اجد في المنتدى المشورة اللي تساعدني على الاختيار السليم. وشكرا