الموضوع: توكيل عز البلح ! - كرهني في العربية ! ازاي الناس ساكتة علي الكلام ده ؟

المشاركة الأصلية كتبت بواسطة CryptonX

شكرا يا جماعة لردودكم .

استاذ مهاب انا مش عايز اظلم التوكيل او اظلم السيارة ..يعني اكيد الموضوع مش بالسوء ده .. بس الفكرة انا واحد من الناس الي فعلا بتفرق معايا طريقة الكلام و الحوار و التعامل اكتر من المنتج نفسه !

يعني البافارية انا عارف انهم حرامية و كاسبين كتييييير جدا في السيارة بس مخليني راضي ؟ بعكس عز العرب الي انا متاكد ان هامش ربحه قليل جدا و سعر منافس فعلا بس مش قادر يتعامل مع ابسط الاشياء و ان كانت اهمها و هي " الحصول " علي عميل او شبه عميل .

عامة دي مش نهاية القصة و مش حضرب بروتون بالنار علشان توكيلهم معاملته وحشة ! ما ياما خدت من اوماترا برده :)

---

ربنا يسهل ! و يهدي !

لا انتا مش بتظلم حد يا باشمهندس , انتا من حقك كعميل بتفكر تشترى العربيه انك لما تتصل بالتوكيل تلاقى موظف بيرد على استفساراتك و فى اسرع وقت ممكن ... مش تقعد تتنقل على التلفونات اكتر من 10 دقايق انتا مش بتكلم مجمع التحرير , " انا نفسى كان بيحصل معايا المواقف ديه زمان لما كنت بتصل علاشان اسأل عن حاجه " و بطلت اكلمهم فى التلفون و لو عاوز حاجه بروح التوكيل مباشرتا و اسأل عليها . " عرفت السكه بمعنى اصح " .
بس زى ماوضحت ياكريم ده حال كتير من التوكيلات و الشركات عموما فى مصر ...... حد سمع عن شركه نايل اون لاين الى اشترتها اتصالات مصر و سرحو نص العماله فيها و النص التانى ونزلو التايتل بتاعهم و خفضو مرتابتهم ....لانهم شغالين بالبركه !!!!

المشاركة الأصلية كتبت بواسطة momenhamdy

حبيبي و اخي الفاضل الاستاذ مهاب و حشني و الله

بص انا عندي وجه نظر في رأي حضرتك ...... الكلام الي حضرتك بتقوله دا يتطبق علي تاجر جديد او رجل اعمال لسه في اول الطريق
لكن يا استاذ مهاب واحد علي مستوي محمد هشام عز العرب لالالالالالالالالالالالال الالالا عيب اوي اوي دا واحد معاه موزع معتمد BMW و اخد احسن مبيعات فيها في 2008 دا غير التوكيلات زي الستروين و الجيب و الدودج و كرايسلر و .........

وخصوصاً انو عندوا كوادر محترمة جداً من المهندسين زي المهندس المحترم امر و انا اتعملت معاه و الراجل دا نزلتله من اسكندرية و قابلته و راجل في منتهي الاحترام
و غيره في فرع الاسكندرية زي المهندس محمد رشدي راجل في منتهي الاحترام

لكن عايز الحق التوكيل بيكسفهم اوي اوي الناس دي و مش مديهم حقهم و انت اكيد عارف الناس دي بتشوف هجوم و مشاكل هما ملهمش يد فيها المشكله في الممول الحقيقي للتوكيل و الهيكل الاداري الي يتميز بالاه مبالاه ....... يعني حضرتك شوف موضوع التيل اتحل بعد اد ايه ؟؟؟ من ظهور المشكله و مشاكل القطع الي مش موجوده في التوكيل و الي يحجز قطعه و يجي يقولوا له حضرتك مفيش حجز بأسمك في القطعه دي ......... و خلي بالك العربيه عليها ضعط حاليا علشان في تجار خارج التوكيل شغلين في قطع الغيار دا غير ان كل الصنيعيه شغلين بره التوكيل في ورش خاصه ....... لكن التوكيل ملوش اي اثر في زياده المبيعات نهائي

يعني دا منظر Call Center محترم يجيلك منين قلب تدافع عن التوكيل ...
و هل حضرتك الكلام الي ناقشه في المشاركه بتاعت حضرتك حاسس انوا ممكن يبرراالي حصل مع اخونا الفاضل في التليفون

انا مش عارف اقول ايه و الله .......

و خالص تحياتي ليك يا استاذ مهاب

باشمهندس مؤمن اهلا بيك يا باشا انتا واحشنى اكتر والله

انا متفق معاك فى كلامك و مشاركتى مكانتش انى بقول الوضع الحالى ممتاز ... او حتى جيد بالعكس , و انا لو مكان باشمهندس كريم مش حشترى بروتون و حشترى ال FRV و حقه الصراحه .

بس انا لما قولت ان التوكيل اتحسن فعلا كان من واقع ملموس و كام تجربه فى الفتره الاخيره .... حد شاف توكيل بروتون 2005 كان ازاى ؟ ... كنا بنقف بره على الطريق الصحراوى من الساعه 6 الصبح " و ساعات كان بيبقى فى ناس واقفه كمان من قبل كده " و كان مهندس استقبال واحد هو الى بيجى و يستلم العربيات و مكانش فى استراحه اساسيه لبروتون , و النقص فى قطع الغيار " الى موجود لحد انهارده " كل ديه مشاكل كانت موجوده بعضها اتحل جزئيا و لكن ده مش كفايه لان لسه فى عدم توافر لبعض قطع الغيار و لسه اسعارها مرتفعه جدا بالمقارنه بباقى التوكيلات و لسه المركز الجديد ماشتغلش و لسه مافيش شو روم محترم ل ماركه بروتون و مشاكل تانيه .

بس دلوقتى بالمقارنه ب 4 سنين فاتو احسن بكتير ديه حقيقه فعلا , لكن للاسف لسه بعيد عن المستوى المطلوب خصوصا مع زياده مبيعات الجين 2 .

*نقطه تانيه مهمه ماينفعش يبقى كل الحلول للمشاكل تبقى متوقفه على المهندس امر او على افراد بعينهم ... هم فعلا ناس محترمين و ومش بيتأخرو عن حل مشكله لحد ... بس بالتأكيد ماينفعش يبقى فرد واحد عليه كل الحمل ...لانه حتى لو عرف يرضى 100 مش حيعرف يرضى 1000 بطبيعه الحال لازم من الاساس يبقى فى نظام ادارى و استعداد من صاحب التوكيل لتحسين مستوى الخدمه علاشان من الاساس الناس متروحش عند م- امر الى فى المواضيع الى فيها مشاكل كبيره ....

فى الاخر النقد الى احنا بنقوله عباره عن Feedback للتوكيل و الغرض من النقد ان الناس هناك تاخد بيه و يحسنو خدماتهم .... مافيش حد عاوز التوكيل يقفل بالعكس احنا عاوزينه ينجح و يكبر و يهتم بالعملاء اكتر لان المصلحه واحده .

تحياتى ليك اخى العزيز مؤمن و ان شاء الله نشوفك فى مقابله البروتوناويه قريبا .

المشاركة الأصلية كتبت بواسطة momenhamdy

بس الفكره ممكن اعرف هما مستنين ايه و ايه التباطئ ده ........
نفسي في مبرر واحد ممكن يخلي الناس دي متأخره في التطوير من اجل مصلحه العميل

طيب و ليه احنا متأخرين فى السياحه على مستوى العالم بالرغم من امتلاكنا ل تلت اثار العالم و نص حدودنا شواطى من اجمل شواطى الدنيا .

ليه احنا مش متقدمين لا على المستوى الانسانى او العلمى , بالرغم من اننا فى فترات كتير كنا من اكتر الامم المتقدمه على مستوى العالم .

ليه لما تروح فى جهة حكوميه تلاقى تعقيدات الدنيا

ليه التعليم سئ

ليه فى حاجات كتير عندنا سيئه ؟

ديه مش دعوه للفشل , ديه ديه دعوه للتفكير يمكن نوصل لنتيجه .

لو كنت طلعت بره مسار الموضوع .

السؤال الى انتا سألته ده كان نفسى اسأله لصاحب التوكيل من فتره , بس احنا كاعدتنا لما تيجى تسأل حد انتا ليه ماشى غلط , او ليه ماتسهلش الدنيا على نفسك و على الاخرين و فى الاخر انتا الى حتكسب و حتنجح .... اكيد حيكون الرد :- احنا عارفين احنا بنعمل ايه - احنا ماسكين زمام الامور - احنا عندنا خطه خمسيه مستقبليه استثنائيه لحل المشكله الاقليميه .

فى مؤسسات و شركات كتير فى مصر ماشيه كده الموضوع مش جديد .