امبارح كنت في مناسبة بالعربيه وللاسف العربيه كانت مشطبه بنزين. والبنزينه مافيهاش بنزين خالص. وعلشان تكمل ماكنش في المخزون غير جركن واحد 4 لتر فضيته في التنك وقلت بظروفها.

المشوار كان حوالي 80 كم ذهاب وإياب.
وفي طريق العوده وقبل مارجع ب 25 كم لاقيت العربيه بتقطع.
الكلام ده الساعه 1 صباحآ. والطريق صعب ومافيش عليه إضاء خالص.


المهم بقي واللي يهمنا في القسم.
1- لمبة البنزين مانورتش مره واحده... لأ دي بدات ترعش وكل شويه إضاءتها تزداد ووقت ما العربيه بدأت تقطع اللمبه كان نورها زاهي زي لمبة حزام الأمان.
ماعرفش ان كان الوضع كده في اللانوس ولا العربيه كانت مسريه وانا بيتهيأ لي ان إضاءتها بتزيد.

2- لما العربيه بدأت تقطع. اتبعت اسلوب الزحلقه. وانا بادعي ربنا ان العربيا توصلنا البيت. يعني توصل ل 80 كم/س وبعدين تنور الفتيس وهكذا.
والغريب ان العربيه ماكانتش بتقبل الغيار الرابع نهائي. اديلها الرابع وآجي ازود بنزين. مافيش استجابه (والحمد لله مابطلتش خالص) كأن اللي داخل هوا بس ومافيش بنزين...
أديها التالت تمشي وتسحب بس تقطع.
والحمد لله وصلت البيت. وركنت العربيه. وهوب. قامت مبطله وقاطعه بنزين خاااااااالص.
قلت في نفسي والله العظيم العربيه دي أصيلة.