مافيش حاجة اسمها كورس لغة ممكن يساوي 14 سنة تعليم في مدرسة لغات.. انتوا بتتكلموا ازاي بس ياخوانا؟ ما تيجوا نتكلم بالعقل و المنطق و على أرض الواقع أحسن عشان نعرف نكمل نقاش.

أنا عن نفسي تعليم حكومي.. و أيام ما كان التعليم الحكومي بالمنافيللة.. يعني أخدت a b c و انا في أولى إعدادي، يعني شحطة، و بالرغم من إني خريجة آداب انجليزي جامعة عين شمس و بقالي 11 سنة باشتغل مع أجانب (إنجليز كمان)، إلا ان مستوى اللغة الانجليزي عندي لا يزال فيه فرق بينه و بين اللي متعلمين في مدارس لغات، و دي بتبان أوي مع أصحابي اللي متخرجين في مدارس لغات، و ده مش تقصير مني، إنما هي كده. التعليم في الصغر كالنقش ع الحجر و عمر اللي بيدرس رويات بالانجليزي و مسرحيات شكسبير و هو في ابتدائي هايتساوى باللي لسه بياخد الأبجدية و الضمائر الشخصية و لا هايتساوى باللي عنده 20 سنة و يادوب بادئ ياخد كورسات انجليزي، حتى و لو أتم جميع المستويات و برضه للعلم أي كورسات انجليزي في ال cv لا تؤخذ في الاعتبار مادام صاحب السي في دي مش خريج مدرسة لغات أو جامعة أجنبية أو على الأقل يكون خريج تجارة إنجليش أو أي كلية درس موادها بلغة أجنبية.