الموضوع: عايز بتاع تكييفات و شيخ

المشاركة الأصلية كتبت بواسطة tananybasha

لقيت الشيخ و الحمد لله
ماشى مروح من شارع خاتم المرسلين و كان فى عربية عطلانه عند القهوه رحت هربان يمين اخش التلاتينى من ورا لقيت واحد بتاع تكييفات قدامى و عربيات بالهبل واقفة قدامه قلت بجملت انزل ارزل عليه و هو اسمه محمود قلتله معلش ممكن تكشفلى على التكييف من غير ولا كلمه عن اللى حصل او اتغير
جاب العدادات و شغل و اطفى و على السرعة و وطى السرعه يطلع عندى ايه بقى و هو اللى مخلى الكنترول فالف يخرف اكسبانشن بار و ده ب 200 جنيه بس الراجل محترم قاللى بص يا باشا هو التبريد ضعيف عشانه بس هعمل محاوله على حسابى هيعمل فاكيوم للدايره و يسحب الزيت اللى فى الكباس و يغيره و نشوف النتيجة - ماشى
قعدت على الفاكيوم حوالى 45 دقيقه بطلع بلاوى لدرجة ان الموتور اللى شغال بيه بيحط عليه مايه عشان يبرد و راح مغير الزيت من الكباس بالشفط برضو و انا عندى الدايره ماكنش فيها تنفيس و الحمد لله
و ابتدى يشحن يشحن و التبريد ابتدى يزيد راح موقف على غفلة الشحن و فك الشبكة و نضف السربنتينة و راح منادى واد من عنده قاله نضفلى كويل العربية دى فك الفبرة اللى تحت المساحات و فك غطا المروحة و لقينا الكويل تحت خالص عليه بلاوى جاب خرطوم ماية و خرطوم هوا و قعد بتاع 30 دقيقه يغسل فيه لغاية ما شكله بقى فابريكة
قللى اركب و شغل و نكمل شحن و عاديكم على اللى حصل بقى كمية تراب و ورق شجر و طينة و زباله طلعت من الهوايات اتبهدلت بسببها و الغريبة صوت المروحه هدى و دفع الهواء زاد بتاع 25% و ابتدا يكمل شحن لغاية مالقيته وقف مره واحده قاللى الضغط كده مضبوط و لما بزود الضغط بيزيد يعنى كده الشحن مضبوط و هو عنده مقاس بيقول العربية خدت قد ايه فريون عربيتى خدت 1125 جرام فريون بالضبط و التبريد رجع بقى كويس قللى كده الأكسباشن كان فيه سدد و هو ضعيف شغل التكييف كتير على سرعات واطيه عشان يسلك
التكلف الأجمالية 130 جنيه و علبة مارلبورو احمر للرش و 10 جنيه للعيال اللى فى الورشة و خدنت منه غطا البلف اللى مكنتش لقيه
التكييف تحت التجربه و ربنا يسهل و نبلغكوا اخر الأخبار

ألف مبروك وربنا يجعلها آخر مرة تروح لبتاع تكييفات! والله أنا كنت زعلانلك من الدوخة اللى إنت شفتها!

تحياتي.