انا موش شايف اى مناسبه لمهاجمة البولونيز
السياره بدأ انتاجها من 1978 كتطوير فى الشكل فقط للسياره فيات 125 يعن كان نفس الموتور و العفشه
توقف انتاجها فى 2003 و كانت ساعتها شركة FSO اتباعت لـDaewoo
السيارة نزلت مصر بشكلين (تعديل بسيط) فقط فى الشراعه الخلفيه زجاج او مولده بلاستيك بدل الزجاج
ليها فى مصر 3 مواتير 1300 و 1500 و 1600 بأنواعهم
افضلهم الـ 1500 AB و الهورس باور بتاعه 82 حصان و لكنه ناعم عن الـ 1600 86 حصان لأن الكاتينه كاوتش موش حديد زى ال1600 السياره كانت تعتبر ابداع فى زمانها (الثمانينات) و تم تقليد الشكل الخارجى لها فى اكثر من موديل لشركات كبيره (حقيقه)
السياره لا تخدم طالب الرفاهيه و لكن تخدم المتطلبات العمليه مثلا
- صالون واسع
- كراسى مريحه
- قطع غيار رخيصه و ممكن تستغلى و تجيب الأفضل (مثلا بدل وش الإسبراتير 25 تيوانى اجيبه ب 35 جنيه المانى)
- قليلة الأعطال (و اتحدى)
- نظام التعليق مخصص للسيارات النقل يعنى حمل و انتا مرتاح مافيش مشكله و سافر كمان و انت محمل
- استهلاك بنزين طبيعى 10كم / لتر
- تهرج بيها فى الطريق مع اى حد
تصرف عليها هتليقها زى الفل معاك
افضل موديل فيها الـ 89 شراعه زجاج موتور 1500 AB
على فكره انا جريت مع عربيات كتير من الشاهين لغاية الـ BMW الشارك موديل 77 و ظبطهم
مشاكهلها تقدر تستحملها زى عزل حرارة المحرك و صوته ضعيفه ، فراملها محتاجه مجهود شويه ، دركسيون تقيل شويه برضه و مافيهاش مشكلة سخونه بالمنظر اللى الناس بتتكلم فيه ، كل داخلة صيف بنظف ريداتير ب Fast flush و احط super coolant و بامشى طول الصيف زى الفل (الحمد لله)
انا دلوقتى حطيت الموتور 1600 لأن ال1500 بدأ يخف و مانزلتش منها علشان اركب دايو و لا هيونداى لأ ركبت صنى و الحمد لله و دى السياره الوحيده اللى كان ممكن اتنازل و اسيب البولونيز و اركبها
اسعارها من 12.500 لغاية 22.000 و عاين الحاله كويس جدا قبل ما تشترى اهم اهم حاجه ما يكونش فيها شغل فى الصاج الا اذا كانت بارومه و اتعالجت
لو فيه اى استفسار تانى ما تترددتش فى السؤال
المفضلات