هاني أدم "AlmAhAtmA"قائد سيارة نايل موتورز للأعضاء

**Hassan Khalil** · 07-04-2008 02:44 AM

يااااااا الله ...
اول مرة اقرأ الموضوع ده .. جبته من أوله لاخره ....
اااااااااه
الله يسامحك يا هاني .. رجعتني لايام ما كان الواحد بيعيش الدنيا بقلبه بس ..
بيحب كل الناس
بيضحك لكل الناس ...
بيساعد كل الناس ..
و بيصدق كل الناس ........

فين الايام دي .. و العيب بأي فيا انا و اللا في الناس ...
الله اعلم ...
*********
انا قابلتك هنا بس ..
و مشفتكش قبل كده ...و لكن
سبحان الله ..
رب اخ لك لم تلده امك ..
و عمرها ما كانت الاخوة اخوة الدم بس ..
تسمح لي اكون اخوك ؟؟؟
*********
فرحك ..
زي ما فرحتك لا تكتمل الا بوجود احبابك
احبابك لن تكتمل فرحتهم الا بوجودك معهم في موضوعك ..
موضوعك... موضوع زفافك ..
ليه واقف بعيد و الناس بتدور عليك .. دا انا اللي معرفتكش قبل كده مشتاق اباركلك.. تخيل بقية حبايبك بقي ...!!!
********
بارك الله لكما .. و بارك عليكما .. و جمع بينكما في خير
ربنا يقرعينك بزوجتك .. و يقر عين زوجتك بك .. و يرزقكما الذرية الصالحة .. و تعيشان في رضا الله عز وجل.

**Karim_Monir** · 07-04-2008 04:49 PM

المشاركة الأصلية كتبت بواسطة AlmAhAtmA

ما قولتوليش مين اللي حيسوق عربيتي و انا فيها يوم الفرح

اللي اقدر اقوله ان بجد فرحتي مش حتكمل الا بيكم

هو في حد ممكن يسوقلك عربيتك يوم فرحك غيري
!!!!!!!!!!!!!!!!!!!!!!!!!!!!!!!!!!!!!!!!!!!!!!!!
امال انا جاي من يوم الاربع ليه;)

**SuMo** · 08-04-2008 03:16 AM

wlahy b7bk ya hany

**Mzeid** · 08-04-2008 03:26 AM

المشاركة الأصلية كتبت بواسطة AlmAhAtmA

المكان: شط الاسكندريه
الزمان: بعد صلاه العشاء في الليله 27 من شهر رمضان
الحدث: بدء الرحله الاولي لمركبه نايل موتورز
نوع المركبه: هوندا سيتي 1500 سي سي 2006 (مع احترامي لاختياراتك يا هن)
عدد الاعضاء: 1 (ايوه انت و بس انت مين ؟ انت كل واحد هنا)

اتفضل يا سيد الكل
اربط الحزام و رجع الكرسي و اسمع ست الكل فيروز و افتح لي قلبك :D

انا اسمي هاني ادم و ممكن من اللحظه دي تعتبرني اخوك
شكلي مش مهم شكلي اللي بره المهم شكلي اللي جوه
تقدر تقول اني واحد من اللي متشعلقين بربنا و مش مهم قوي رجلهم فين
بالحظ و بالصدف مش مؤمن بيها قوي لكن مؤمن بان الله كبير و رحمته وسعت كل شيئ

عاجبك العلم اللي علي الكنبه
ده علم نايل موتورز
مكان جميل
تحس انه واحه في قلب الصحراء
يعني تروح عندهم ولا فيه كدب ولا نفاق و لا الكلام اللي بيعكر الدنيا ده
انا عرفتهم عن طريق احمد جنيدي جندي مجند اكيد حيكلمنا دلوقتي علشان هوه رايح نفس مشوارنا
بيعجبني فيهم ممارستهم للحياه الجميله مع بعض
حياه كتير مننا مفتقيدنها و انا اولهم

ايه يا سيد الكل ما تعبتش من الرغي بتاعي
تعالي نريح شويه
ايوه هيه القلعه
عايز تعد هنا
لا حاعدك اعده ملوكي
تعالي بس خلي بالك
ايوه هنا
شباك في ظهر القلعه منك للبحر
و ندندن مع بعض امانه يا بحر تستلم الامانه احبابنا يا بحر في عيونك امانه
كبايه حمص الشام تعدل الدماغ و تعمر الطاسه
اصحي لسه سهرتنا طويله

البحر ده هوه كتاب احلامي
يامه كلمته و قلت له عن احلامي
و ياما ضحكنا و ياما بكينا
اه عليك نور
انا بحب اضحك لدرجه اني لما بكون زعلان وشي بيضحك
انت عارف انا ايه
انا الاراجوز

سيبك يا سيدي
اه انا بحب السفر و كنت بكتب زمان لكتاب اسمه لونلي بلانت
اكتر مكان بحبه
و ليه فيه اهل و ناس و عزوه
اسوان :arrow:
يااااه يا بلاد الدهب
تعالا نكمل كلامنا في العربيه
تسمع منيب

مشتاقين يا ناس لبلاد الدهب

اه تخيل 21 مره اروح اسوان لوحدي و منزلشي في الاقصر ولا مره
انا بحب البلد دي و ناسها و كل حته فيها
مسير الحي يتلاقي يا بلد الوعد و المكتوب و البلح الابريم

انا بحب اللي يقول عليه طيب :lol:
لكن بكره قوي اللي يقول عليه عبيط

في الشغل
هيه معادله عجيبه شويه :roll:
يعني ممكن الصبح اضرب جبنه قديمه مع الدكتور صبحي احسن واحد بيعمل شاي في العاشر من رمضان سنه 1967
و ممكن تلاقيني بتعارك مع عضو مجلس اداره بعد الظهر و تلاقيني بفسح مديرتي بليل و نرقص مع بعض
علشان تستمتع بالكلام ده و تكون انت نفسك في كل موقف
كلمتين و بس ما تحطش صبعك تحت ضرس حد ولا صلعتك تحت مشط حد
انا اشتغلت مع الشعب الياباني و الانجليزي و الاميركي و الهندي

اشمعني سالت عن التجربه اليابانيه :?:
علشان الصوره اللي في قلبي :?:
اه
دي صوره مديري ياماتو في اول شركه اشتغلت فيها
الراجل ده عمل معايا اللي يخليني حتي الان بعد مرور 8 سنين من شغلنا مع بعض
لما اشوفه لازم انزل ابوس ايديه
تخيل بقي عمل ايه
الشكر لك يا الله انت تسبب الاسباب و كل شيء بقدرك و قدرتك

بس قول يارب
اقولك علي احلي علاج لامراض النفس
سيب البلف بتاع قلبك
ايوه يا سيدي ركعتين في نص الليل و اكلم و افتح و فضفض و استني و حتنول مرادك

انا بكسف افضفض لانسان علشان ما اشيلوش الهم
بفضفض للي رحمته وسعت كل شئ

ما تيجي ننزل نتمشي شويه
انا حركن العربيه هنا
نشرب اتنين مانجه عند ملك المانجه و نتمشي لحد المكان اللي احنا رايحينه

عجبتك الهوندا سيتي
ظريفه قوي

حقولك علي سر
تخيل اني استلمت العربيه دي تاني يوم وفاه والدي
لكن حسيت زي ما تكون بطبطب عليه

العربيه دي علي الرغم من انها بقالها معايا 8 شهور و 34 الف كم
الا انها شافت معايا ذكريات كتير

يعني شافتني و انا بعيط و رايح العاشر من رمضان و سايب امي و والدي لسه متوفي
و شافت فرحتي و انا بودي خطيبتي كورسات الكليه
و شافت شوقي و انا رايح لحبايبي في المنتدي
و لسه ياما ان شاء الله حتشوف
بعد الياباني يا باشا بعون الله نركب الماني
مش كده ولا ايه

انا سواقتي علي ادي يا عم :shock:
احنا ولا بتوع شد ولا جري

بس انا مبدئي لكل مقام مقال
يعني سالك اديها
يعني مش سالك مش اديها
يعني الجري مش السرعه
الجري الصح هوه القدره علي التحكم في السرعه

مساء الخير :D

ايه مش قادر تمشي بعد المانجه تعالي ناخد العربيه
اسمعك حاجه عجب
انا بحب المزيكا
لا محمد منير مش في القائمه
ده موضوع تاني و ياريت منفتحوش

يعني يا سيد الكل
منيب
روجر واتر
شاب خالد

و من انواع المزيكا
جاز و بلوز
كلاسيك روك
و الموسيقي الصوفيه و ده موضوع كبير قوي

و بيني و بين عمي ياسين التهامي حكايات كتير

اسمعك السي دي ده و ادعيلي
اسمه الحضره
و انا حضرتها في المغرب فعلا

و السي دي ده هديه مني اسمه موتزارت المصري
اغنيلك حته :shock:

يا حلو يالي سواد عينك مجانيني
و السحر ساكن ما بين الرمش و النيني
فيه حد وزك عليه لجل تفتني
و جرحتني بسهم عينك و الدوا عندك
و كلمه مني لشفايفك راح تطمني

ايه يا عم حتاكلني بعينك
اه انا واد شيك و سمبتيك (نفسي اعرف يعني ايه)
انا سبورتوير بره الشغل 8)
في الشغل هاي كلاسيك كافلينكس و حاجات كده
ماعدا يوم الخميس سمارت كاجوال :lol:
بحب الازرق و مشتقاته و مش بحب البني و مشتقاته :arrow:

ولااااااااا عبدالمعطييييييييييييي :lol: :lol:
عارف مين ده
ده عبد المعطي جاري و صاحبي من اول يوم مدرسه
عبد المعطي ده حكايه احسن نقاش في الكوكب الارضي و يمكن زحل لو فيه حياه و حيطان عايزه تتبيض
عبد المعطي مقدم في الهجره العشوائيه لامريكا و ماشي بالباسبور و السي دي اللي عليه صورته

انا حوت في البحر دولفين بين الامواج محاره في الرمال :twisted:
ايييييييييييييييييييييييي وووووووووووه يا جدعان ده انا اسكندراني ياواد :twisted:

الخوف
مالوش مكان
اصلي انا علي طول متونس بالناس و اللي يحب الناس عمره ما يكون مداس
احلي خبر سمعته في حياتي
لما واحده من دراسات الجدوي اللي عملتها اخدت جايزه عالميه
و جه البورد اللي بيمنح الجايزه دي القاهره
و عملوا لي حفله كبيره
لا مش ده اللي فرحني لسه
اللي فرحني اني اخدت البورد و رحنا الحسين و روقتهم في خان الخليلي و قهوه نجيب محفوظ
و طبعا الحبايب هناك قاموا بالواجب
و بعد ما سافروا
بعتوا لي جواب اني معروف في الحسين اكتر من توت عنخ امون
المره دي فرحت قوي علشان اللي بيتاجر مع الله عمره ما يخسر ابدا

احنا وصلنا اول مشوار لينا
حنتقابل عند النخله دي بعد ما نخلص
ايوه ده مسجد القائد ابراهيم
نصلي التهجد
و ندعي لكل احبابنا و نتطلع نتسحر و نروح ننام و نتقابل بكره ان شاء الله و كان لينا عمر

يا جماعة أنا قرأت أول 20 سطر بس مكملتش علشان أقسم بالله إني كنت هعيط علشان كدة أنا مكملتش و بحس إن هاني - و على فكرة أنا اسمي محمد هاني - دخل جوة قلبي ...........

**Karim_Monir** · 09-04-2008 10:39 AM

المشاركة الأصلية كتبت بواسطة AlmAhAtmA

كريم منير و اه من كريم منير
مش عارف اقول لك ايه
طيب اعمل فيك ايه
كل يوم انام و دمعتي علي خدي من اللي بتعمله معايا
يا كيمو انا مش قدك يا ابن امي

علي فكره الحاجه بتقول لك السمك و الجمبري جاهزين علشان اخو العريس
سمعتهم النهارده كنزي علي الموبايل
و برضه مش عارف ليه عيطوا
اعمل فيك ايه

يا هاني الله يكرمك انت ابن حلال مصفى وتستاهل كل خير
وبعدين مش انا اللي بعمل دي البت كنزي
شوفتها وهيا بتكلمك في التليفون
اصلك ما شوفتش سمعت بس
الهانم واقفة قدام المراية الطويلة بتاعت دولاب اودة نومي وحاطة ايدها في وسطها وبتتكلم ولا كانها بتكلم البوي فريند بتاعها
وبعد ماخلصت قامت فتحت دولابها وطلعت فستان سوارية والتوكة واهم حاجة عند البنات التوكة وقالتلي انا هاجي معاك بقي
قولتلها هش من هنا يلا ودي راسها والف سيف تيجي
اقولها يا بنتي ده هايتجوز تقوللي لاء انا بحب هاني مهاتما خدني معاك الفرح
مش هاقوللك اكتر من كدة كفاية

بلغ سلامي للحاجة وقولها اخويا الصغير جااااااي ان شاء الله النهاردة بالليل واول مادخل اسكندرية هاكلمك
ولو كنت قافل موبايلك هارشق على البيت

سمك ياقوت مرجان
احمدك يا رب