1- الحكومه كيان وجوده فقط لادارة شئون الدوله سواء الماليه او غيرها اى انهم موظفين عند الشعب من اول رئيس
وزرائها لاصغر موظف لذا فالحكومه فى حد ذاتها لا تملك شيئا ولا تعطى من جيبها شيئا هى فقط تدير املاك
الشعب الدخل الذى تتحصل عليه من الشعب وما تعطيه ليس هبه او حسنه بل هو ما اعطيناه لها من قبل فى
صورة وضرائب
2- الغنى يدفع الضرائب طبقا لشريحته فى الدخل والفقير ايضا وطبعا هناك فرق بين الشرائح ولذلك عندما تشترى
الحكومه سلعة ما زى البنزين مثلا بقيمة مثلا 100 دولار وتبيعه لنا ب 70 دولار عشان الفقير اللى مش قادر يدفع
والغنى الوحش اللى بيقبض فلوس كتير فتقوم باخذ فرق الضريبه بين الاغنياء والفقراء وتدفع بيهم ال 30 دولار
الفرق احنا اتفقنا ان دخلها هو من الشعب وتعد الحكومه تغنى علينا اد ايه هم بيعانوا عشان يجيبوا لنا العيش
والبنزين و و و انتو بتعملو ايه اصلا ماهو منا والينا . نيجى باه للخدعه الكبرى اللى بتحصل اليومين دول الحكومة
تقول لك ايه هنرفع الدعم عن السلعة الفلانيه او هنقلل الدعم ماشى شيلوا الدعم وغلوا السلعة بس طب الضرائب برضه زى ماهى :majd(4):حد يفهمنى انتوا بتاخدوا ضرايب عشان حاجات كتير ومنها الدعم طب شلتوه طب خفضوا الضرائب بما يوازى الدعم اللى شلتوه او زودوا الرواتب , لا الضرائب هى هى وممكن تزيد
والرواتب هى هى ولما بتزيد طبعا معروف تانى يوم بتكون فى جيب مين الزياده ( التجار طبعا )
3- طب الحكومه ملهاش استثمارات ليها طبعا بس بفلوسنا زى فلوس التامينات الاجتماعيه اللى الحكومه ضاربت
بيها فى البورصه هاهاها حد عارف الحكومه بتعمل الكلام ده من امتا وكسبوا كام وخسروا كام حد عارف المكاسب
دى راحت فين ممكن واحد يقول لى ماهو بيعملوا بيها مشاريع بنيه تحتيه طب هو مش اى حاجه زى دى المفروض
تكون فى النور خاصة انهم بيتاجروا بفلوس الناس مش بفلوسهم او حتى ادنى درجات الاحترام انهم يعرفوا الناس
انهم هيعملوا كده بفلوسهم والناس يا توافق او ترفض ولا محدش له راى من الشعب اللى فلوسه هى فلوس
الحكومه
4- لما كل شركات القطاع العام خسرت وفلست طب هو مين كان بيديرها ومين اللى مفروض يتحمل خسارتها
ويتحاسب على الخسارة دى زى شركة النصر للسيارات دى وغيرها وغيرها طيب انا لما اجيب ناس يديروا لى مالى
ويفشلوا هذا الفشل الذريع وفى الاخر يقولوا لى احنا فشلنا وهنبيع شركاتك الخسرانه بمزاجك او مش بمزاجك (
احسن من مفيش يا استاذ ) لناس تانيه هم هيعرفوا يديروها , طب ما انا اجيب الناس التانيه دى يديروها بدلكم ؟ لا
يا استاذ احنا مبنتغيرش فاشلين او ناجحين على قلبك بيع هدومك واللى وراك واللى قدامك بس انسى اننا
نمشى وكمان كام يوم هنجيلك عشان تبيع باقى اللى تملكه عشان احنا هنفشل فى ادارتهم برضه واقرب حاجه
شركة طنطا للكتان ومصانع غزل المحله عندك اعتراض ؟ طب هتبيعوهم بكام ؟ مش مهم تعرف . طب هتبيعوا
لمين ؟ مش شغلك . طب الفلوس هتدوهانى ازاى ؟ فلوس ايه يا استاذ انت مديون لنا بفلوس دعم كل حاجه (
الغلبان مش عارف انه هو اللى دافعها اصلا ) طب يعنى فشلتوا وكمان هتاخدوا فلوس ومقدرش اغيركم ؟ اه عندك
مانع ؟ طبعا ده سيناريو تخيلى مبسط للوضع الماساوى فى مصر
5- كل بلاد العالم الراسمالى بدات تفهم ان مفيش حاجه اسمها اقتصاد حر بعيد عن رقابة الحكومه بشكل مطلق
ولا فى حاجه اسمها ان الحكومه هى الصانع الاوحد والزارع الاوحد والتاجر الاوحد بشكل مطلق لازم فيه توازن انا
بتكلم عن امريكا وانجلترا اللى بيامموا بنوكهم وشركات السيارات هناك دلوقتى حد كان يجرا انه حتى يتخيل ان
شركه زى جينرال موتورز ممكن فى يوم من الايام تفلس وتتامم وتبقى ملك الشعب فى امريكا رمز الراسماليه فى
العالم ولا اكبر بنوك انجلترا اللى اتاممت هى كمان فى البلد اللى اخترعت كلمة الخصخصه وطبقتها فى عهد
مارجريت تاتشر وكادت ان تكون المؤسسه الروحيه لدين الراسماليه الجديد اللى انهار فوق دماغهم من كام شهر
كل ده وحكومتنا الرشيده عماله تبيع فى بنوك وشركات زى شركة النصر وهتموت وتبيع بنك القاهره ومحدش عارف
الدنيا ماشيه ازاى اصلا احنا راسماليين ؟ طب ماهم بره اتغيروا وبداوا يفهموا ان الاشتراكيه ليها بعض المزايا , ولا
احنا اشتراكيين ؟ طب اشتراكيين ازاى والدوله بقت دولة رجال اعمل وبيع لاصول الشعب الغلبان . اقولكم احنا ايه
احنا ولا حاجه