30 يونيو اخر يوم للاشتراك بنادى التجاريين

بعد رحلة عناء للحصول على كارنيه النقابة الحمدلله وصل الكارنيه بسلامة الله اليوم وتم استلامه بعد 3 شهوروأكثر من تاريخ التقديم عليه

لما سألت على اشتراك النادى واللى انا كنت عاوزة اعمله من 3 شهور وقالولى لسة عالصيف

اتضح انه شغال من الشتاء عادى

وان 30_6 هو اخر يوم للاشتراك ولا يحق لغير الحاصلين على رقم عضوية الاشتراك فى النادى

طبعا هتقولوا ما كل واحد معاه كارنيه معاه رقم عضوية....هقولكم مع الاسف لأ فى ناس اكتشفت عند طلب رقم العضوية من قبل النادى عدم وجود رقم عضوية وكأنهم ماكانوش بيدفعوا حاجة بقالهم سنين

لكن الحمد لله انا لقيت رقم العضوية ورحت اعمل اشتراك النادى واستكملت كل اللى مطلوب لكن كالعادة لازم يطلعوا ورقة ناقصة وتعالى بكرة بقا لما تجيبيها وهى اثبات ان ماما تبقا ماما مش خالتو ولا عمتو ولا حد تانى
يعنى شهادة ميلادى وبطاقة ماما وصورتين لماما عشان اعملها كارنيه عضوية خاص بيها انا فكرت اطنش ومش اعملها واخلص هههههههه بس صعبت عليا وقولت اروح بكرة تانى وخلاص

المهم حبيت انقلكم الخبر لو فى حد من الاعضاء من اعضاء النقابة ولسة معملش اشتراك وعضوية النادى يلحق يعمله

هو صحيح النادى مساحته محدودة ومعظمه مبانى والمساحة اللى عالبحر صغيرة وزحمة ونادى القضاة استولى على الجزء المواجهه مباشرة للبحر امام نادى التجاريين
يعنى احنا نبقا قاعدين وهم عاملين سور كده ومرتفعين شوية عننا وقاعدين قدامنا واخدين الهوا والبحر مننا بس هنعمل ايه دول قضاة مصر برده لازم نستحملهم

بس النادى اللوبى بتاعه حلو ومساحته كبيرة يعنى حلو اكتر فى الشتاء بس هو فى الاول والاخر حق من حقوقنا امال احنا بندفع للنقابة ليه؟؟؟؟؟؟؟؟؟؟؟

اللى يحب يروح يعمل الاشتراك ياخد معاه

1- صورة المؤهل الدراسى والاصل للاطلاع عليه
2 _ 2 صورة شخصية
3- شهادة الميلاد صورة واصل للاطلاع وبطاقة الاب والام+2 صورة شخصية لكل واحد منهم لو يحب يعملهم عضوية
4-لو متجوز او متجوزة بياخد بطاقة الزوج او الزوجة مع 2 صورة شخصية
5-لو فى اولاد بياخد شهادة الميلاد صورة وأصل للاطلاع برده و2 صورة شخصية لكل طفل
6- صورة اخر ايصال لسداد اشتراك النقابة
7-صورة البطاقة الشخصية
8- صورة كارنيه النقابة

12 جنيه عن كل كارنيه هيعمله

هذا وسوف نوافيكم باخر الانباء