تسقيط الغيار ممكن اما يفرمل العربية او يخلليها تتسارع جامد حسب سرعة الموتور اول ما تشيل رجلك من على الدبرياج
يعنى حنفرض جدلا ان فية عربية ماشية على التالت بسرعة 60 كيلو على 2500 RPM علما بان العربية ممكن تمشى على 60 كيلو على التانى لما الRPM يبقى 4500 لفة فى الدقيقة
لو السواق نزل من التالت للتانى بدون ما يعللى لفات الموتور الى 4500 لفة العربية حتفرمل لان لفات العجل اسرع من لفات الموتور... و القصور الذاتى للموتور حيجبر العجل انة يقلل لفاتة فا العربية حتفرمل و انت تحس ان العربية بتتشفط لورا
لو السواق نزل من التالت للتانى و عللى لفات الموتور الى 4500 لفة العربية مش حتغير سرعتها خالص و مش حتحس باى تغير فى السرعة نهائى... كل الفرق انك حتسمع صوت الموتور عالى نتيجة اللفات الاعلى
لو السواق نزل من التالت للتانى و عللى لفات الموتور الى اكتر من 4500 لفة العربية حتنط للامام و تتسارع بقوة لان لفات الموتور اكبر من لفات العجل و عزم المكنة حيخللى العربية تتسارع
اذا الموضوع مرتبط بتوافق سرعة المكنة مع سرعة العربية... و حسب التوافق دة ممكن العربية تفرمل او تتسارع او متعملش اى حاجة
MMamdouh
المفضلات