من يضمن كيا سيراتو الجديده 2010 الخليجي؟

**wolverine1987** · 26-06-2009 08:32 AM

يا جماعه والله انا بفكر في شراء كيا سيراتو الجديده لكني محتار بصراحه اجيبها من الوكيل المعتمد في مصر ولا اجيب الخليجي.
مشكله الخليجي مبدأيا هتكون انها مش هتتصلح في التوكيل, طيب و في الحاله دي السياره لو اشترتها هتتصلح فيين؟ و مين يضمنلي تصليحها او تغيرها في حاله اذا اشتريتها و فيها عيب صناعه (مين يضمنها)؟ و هل معقوول كل الناس اللي اشترت الخليجي فاتتها النقاط دي!
ياريت يا جماعه حد يفيدنا و يفيد الاخوه في الموضوع ده لأن موضع استيراد سيارت بمواصفات خليجي بعيدا عن التوكيل اصبح موضوع منتشر و مش في الكيا الجديده بس انما في الهيونداي برده.

**Corolla2010** · 26-06-2009 11:39 AM

انا كنت سمعت من حد فى توكيل كيا انه اى عربيه كيا تدخل التوكيل عادى للصيانه لكن الضمان لا مالوش دعوه باى مشاكل تظهر فى العربيه

**Ahmed Samy** · 26-06-2009 11:46 AM

انا شاري سيراتو خليجي ...

العربية بتدخل الصيانات و التصليح في التوكيل عادي جدا زيك زي اي عربية بضمان

و معاملة محترمة جدا ولا هاتحس بفرق لأنك راكب KIA و بتصلح في منشأة وكيل KIA

ودي تجربتي معاهم

EIT الوكيل الأكثر احتراما في مصر ....كلمة حق .

و عملت صيانة الألف و خدت الخصم كمان .بجد توكيل محترم جدا في الصيانة

الضمان ..

جابر عبد الشهيد بيديك ضمان سنتين أو 40 الف كم .

ما اعتقدش ابدا انه بقوة ضمان الوكيل او نزاهته ..بس هو ضمان و بيسلمك دفتر ضمان مختوم .

لأي استفسار انا تحتن أمرك

**wolverine1987** · 26-06-2009 01:20 PM

في الحقيقه حضرتك يا استاذ احمد سامي طمنتني كتير بخصوص موضوع التصليح و الصيانه ان كمان اتصلت بأبو رواش و سالتهم و قالولي ان السياره الخليجي بتتصلح عندنا عادي مفيش مشكله.
طيب انا لاحظت بعض الفروق في الشكل الخارجي زي المقابض النيكل في الخليجي و الفوجلايت اكبر في الخليجي و قطعه من النيكل في واجهة شنطه السيراتو الخليجي و ايضا في الداخل لاحظت زر سالت عنه قالولي ده بيظبط درجه ارتفاع اضاءه الفوانيس الاماميه(انا لاحظت الزار ده مش مجود في السيراتو الوكيل) طيب في الحاله دي اذا حصل لا قدر الله ان مقبض من دول محتاج يتغير او الفوجلايت اتكسرت او الزرار ده حصل فيه مشكله, منين القطع دي تتجاب و تتركب علما ان الوكيل مش منزل السياره فيها الكلام ده. و احب اضيف ايضا ان زجاج لخليجي ملون في درجه لون اما زجاج الكوكيل مش بيجي ملون

**nano1980** · 26-06-2009 01:40 PM

كل الحاجات الي قلتها موجوده في الsx وما فوق الخاصه بالتوكيل وايضا الزجاج ملون والزرار موجود والدواسات نيكل .........الحاجات دي متاكده منها لاني شفتها في عربيه اخويا وهي بضمان الوكيل

**wolverine1987** · 26-06-2009 02:52 PM

متشكر يا نانو على ردك
طيب اذا قلنا نشتري سيراتو بضمان الوكيل ولا نشتري سيراتو الخليجي و نصلح و نعمل صيانه عند الوكيل؟
الاعضاء ينصحوا ب ايه للراغبين في شراء كيا سيراتو:
نشتري خليجي ام من الوكيل؟

**wolverine1987** · 26-06-2009 03:00 PM

يا استاذ احمد سامي ممكن تديني بيانات جابر عبد الشهيد العنوان او رقم تليفون
و هل اقدر اشتري منه السياره و تسليم فوري؟
و ايه طراز سياره حضرتك و كلفك كام الصيانه الاولى عند الوكيل و هل هو اغلى ام نفس السعر اللي يدفعه حد شاري سيارته من الوكيل؟
و تنصح اشتري الخليجي ولا الوكيل؟ و ايه السبب؟
اشكرك لوقتك و تعبك :)

**Ahmed Samy** · 26-06-2009 04:18 PM

تليفونه للأسف مش معايا دلوقتي بس عموما هو ممكن تجيبه من 140

جابر عبد الشهيد للسيارات - ش الأنصاري - مصر الجديدة - من الخليفة المأمون

التسليم مش فوري برضه للأسف ..أنا حجزت تلات أسابيع بس اسأله برضه ممكن تلاقي

السيارة هاي لاين ...الصيانة الأولي (تخيل) كلفتني فقط 105 جنيه (مائة و خمسة) علشان خدت الزيت مجاني :) ايه رأيك ؟؟

و زيك زي بتوع الوكيل بالزبط ونفس المعاملة المحترمة ..

انصحك ..طبعا سيارة الوكيل لسببين:

1 - الضمان 100,000 كم ودي حاجة ممتازة
2 - السعر الخليجي تمنها دلوقتي وصل 135 الف و عند الوكيل 126 الف (9 الاف جنيه بحالهم فرق)

المميزات في الخليجي :

1 -توفر اللون البيض اللي مش عند الوكيل
2 - التسليم أقرب كتير اسبوعين تلاتة يعني مش اربع شهور
3 -في كمالية زيادة و هي المراية ذاتية التعتيم وهي ظريفة جدا الحقيقة و كنت باحب اسافر بالليل بالجيتا بسببها .

أحب اوضحلك حاجة كمان ..
الزجاج مش ملون ...هو مخضر خضار والله ما يبان أبدا لدرجة انهم في المعرض قعدوا يثبتولي انه ملون باختبار الورقة البيضاء و مش حاسس انه ملون (هو مش ملون فعلا) فشيل الحكاية دي من دماغك

كان في اشاعة ان العربية الخليجي باور كهرباء و المصري هيدروليك .....كله هايدروليك مفيش كهربا

الخليجي مافيهاش ولاعة (فيها فيشة بغطاء بس) ولا طفاية كوباية (اشتريتها من التوكيل بـ200 جنيه)

جابر هايقولك ان العربية فيها 6 اسطوانات (CD Changer) ...هي اسطوانة واحدة بس

الفوجات و زرار التعديل موجود في المصري (حسب كلام السادة الأعضاء لأني ماشوفتوش بعيني)

شوف انت بقى الصورة قدامك ...اختار

**hima_33** · 26-06-2009 04:34 PM

عربية حلوه جدا و شدتني اووي اول لما نزلت

الله يكفيكم شرها

**wolverine1987** · 30-06-2009 01:23 PM

انا ذهبت لمعرض جابر عبد الشهيد في روكسي في الحقيقه انا بصيت على السيارات الخليجي اللي هناك ووجت فرق جوهري في لون الطابلوه الخليجي و بين لون الطابلوه في الوكيل.
لون الطابلوه في الخليجي بييجي مزيج بين لونين اما طابلوه الوكيل فبيجي لون واحد فقت لا غير وهو الاسود.
و في الخليجي ياتي الفرش من الداخال ايضا لونين نفس لون الطابلوه
انا متشكر جدا لحضرتك يا استاذ احمد سامي على مساعدتك و حقيقي المكان ناس محترمين مش حلنجيه زي اي حد واقف في معرض سيارات تحس انك بتتعامل مع نصابين كل اللي يهمهم يطلعو اللي في جيبك
و يا ريت يا جماعه برده اللي عنده معلومات عن كيا سيراتو خليجي باربت يفيد الجملع هنا و شكرا