الموضوع: كلام مش بطال

ماذا تريد من السياره ؟

سؤال لو كل واحد نجح في الإجابه عليه بصراحه كلنا هنشتري العربيه اللي تناسبنا ومن غير مانحتار أو ندبس نفسنا في أقساط مثلا وخلافه بدل مانستغل الفلوس دي الأستغلال السليم بنحطها في عربيه ماهياش مناسبه لإحتياجنا وتبقى الفلوس دي ضاعت ع الفاضي .
المهم نبتدي بقى نسأل الأسئله المهمه :
1) عايز تشتري عربيه ليه ؟
لتنقلاتك جوه البلد , ولا أنت بتسافر كتير , ولا عينك على الموزز ولزوم الفشخره قدام أصحابك, ولا لإستعمال عيله,ولا أنت شاب لسه ماكونتش أسره أو عندك أسره صغيره . إختار حاله من دول.
2) فلوسك أد أيه؟
كام المبلغ اللي معاك , وهل عندك إمكانيه تقسط . إختار حاله من دول.
3) عايز جديد ولا مستعمل؟
عايز جديد , ولا مستعمل لغاية سنة كام, ولا كسر زيرو . إختار حاله من دول .
4) بتفضل تكون العربيه صناعتها أيه؟
ألماني,ولا ياباني,ولا كوري ,ولا ماليزي,ولا أمريكي,ولا هندي, ولا صيني , ولا إيراني , ولا ماتفرقش , إختار حاله من دول.
5) السعه اللتريه قد أيه؟
800 , ولا 1000, ولا 1100, ولا 1300 , ولا 1600 , ولا فوق , إختار حاله من دول.
6) كمالياتك اللي محتاجها أيه؟
تكييف بس كفايه , ولا كمان زجاج كهربائي, وباور, وجنوط والازي منه ,ولا بدون كماليات ماتفرقش, إختار حاله من دول.
7) الشكل له عندك إعتبار؟

لو قلنا أنا مثلا عايز عربيه لتنقلاتي جوه البلد لإني شاب لسه ماكونتش أسره وفلوسي حوالي 50000 جنيه وماعنديش إمكانيه للتقسيط وعايز اجيب جديد مش مستعمل وأفضل عربيه تكون صناعتها ياباني أو كوري وسعه لتريه قليله 1000 سي سي أو أقل لإستهلاك البنزين ويكفيني من الكماليات التكييف بس ويكون شكلها معقول
يبقى قدامي يا إما سوزوكي ألتو , أو هيونداي أتوس , أو شيفروليه سبارك , وطبعا تبقى نقطه مهمه لايمكن حسابها وهي نصيبك ومدى إرتياحكللعربيه يعني هروح وأتفرج على الثلاثه وبعدين أقيمهم من وجهة نظري أو أراء الأخرين وأشوف أنهي فيهم اللي أنا مرتاحلها أكتر وفي النهايه هيا نصيب .
أرجو إني أكون أفدتكم ....... وشكرا .

أرجو أن يوضح لي أحد من الإداره كيف تم نقل موضوعي إلى قسم بيع وشراء كل ملا يخص السيارات أنا لا ببيع ولابشتري ولاى بتكلم في حاجه لاتخص السيارات