[overline] [/overline][overline][/overline][overline]
اولا احب اذكر انى عامل الموضوع ده بناءاً على وجهة نظر وراى شخصى و ده طبعا مختلف من شخص لشخص مش حاجه عامة .
الحمد لله اشتريت عربية دايهاتسو شاريد 1300 سى سى مش متعدلة نازلة كده فابريقة هاتشباك 4سلندر- 16 صمام ..الحالة العامة ممتازة
بعيدا عن الحالة و الموديل القديم و الكلام ده الا انى حتكلم و كأنها عربية جديدة بجربها

اولا الشكل الخارجى طبعا مش ظريف اوى يعنى شغال و باين عليه طبعا الموديل القديم

ثانيا الصالون: ميفرقش كتير عن الشكل الخارجى بس يمتاز بحاجه جودة التقفيل و الخامات(الحمد لله عربيتى مفهاش خدش جوه)
واسع و كراسيه مريحة ..الركاب ورا مش مضايقين خالص بالرغم من انى برجع الكرسى تقريبا على اخره
و طبعا الكنبة تكفى اتنين مستريحين خالص و تلاتة مزنوقين
الشنطة طبعا صغيرة بس مش اوى يعنى قد البيكانتو اللى كانت معايا مرتين مستريح
العربية فيها 4 سماعات بايونير نازلين معاها و كاسيت اصلى

ثالثا: المحرك والفتيس و الاداء: المحرك ناعم و صوته مش عالى بس مسموع و ده نظرا لان عزل العربية مش قد كده
أداؤه كويس اوى على السرعات البطيئة بحس انها عاملة زى الاكسنت عاوزه تطير فى الاول و التانى و بعد كده بتبقى عادية على الرابع و الخامس التسارع طبعا بيقل...اقصى سرعه كانت 140كم على طريق الدائرى و حسيت انها فيها لسه بس انا قلقت خصوصا ان الثبات بقى مش كويس
العربية لحد 120 زى الفل بعد كده الثبات بيقل و طبعا صوت الموتور بيعلى و هى حلو اوى عليها 120-140 عشان نبقى فى السليم
دورة التبريد هايلة زى اى محرك يابانى الحرارة مش بتعلى عن علامة معينة نهائى
استهلاك البنزين و الله لحد دلوقت حسبتلها لقتها بتعمل حوالى 220-240 فى الصفيحة بس التكييف مشتغلش كتير و اعتقد انه كده مش وحش و ممكن تعمل ازيد لو اتظبطت
الفتيس جيدا جدا..حاراته ضيقة و سريعه

رابعا: التكييف: ممتاز جدا و لكن يعيبه حاجه سرعات المروحة 3 سرعات فقط و طبعا ده بيخلى توزيع الهواء على الركاب اللى فى الخلف مش كويس اوى و لكن معقول ....طبعا بيأثر كمان على آداء المحرك و لكن تأثير عادى مش مكتف المحرك

خامسا : العفشة: ماشاء الله بجد عفشتها ممتازة ناعمة جدا و استقبالها للمطبات هايل متحسسكش بأى حاجه فى الارض و طبعا الكلام ده كله لو سليمة 100%

المميزات: تكييف جيد جدا..صالون واسع و مريح..عفشة ممتازة...محرك بأداء جيد جدا ..ثبات مقبول

العيوب: طبعا الشكل الخارجى مش قد كده..عدم وجود باور ستيرنج..التكييف 2 سرعات فقط...الفرامل مش بقوة اليابانى الانسر و التويوتا بس تعتبر قوية عالاقل اقوى من اللانوس و الاكسنت...ممكن تكون واطية على الارض بس انا مركب عجل 165-70-13 فمش حاسس بالموضوع ده خالص..الصاج ورق زى اليابانى كله

ده اللى قدرت اسرده من خلال ال10 ايام اللى استخدمت فيهم العربية و ان شاء الله لو فى جديد حبقى اكتبه فى نفس الموضوع
انا عارف ان الموضوع على عربية قديمة بس انا واحد من الناس كنت داخل اجيب عنها معلومات صحيح لقيت بس ملقتش الكم الكافى فقلت اقول اللى عندى عشان لو حد محتاج عنها اى حاجه


[/overline]