مساء الخير او صباح الخير حسب ظروفك الشخصية

من كام يوم اتقفشت مخالفة فيميه فى كمين فى اول شارع القصر العينى (عادى واخدين على كدة) المهم باكلم الظباط الى فى الكمين (كانو 3 رائد ومقدم ونقيب يعنى رتب مش صغيرة ماتاخدش على كلامها ومش كبيرة ماتعرفش تكلمها ) طبعا بعد دفع ال 50 جنيه ملصقات واللذى منه قعدت ادردش معاهم باقولهم ان الشمس حامية والتكييف مش قادر عليها ومحتاج مساعدة فلازم حاجة تحجز الشمس شوية والـ Vkool غالى والبديل بتاعه 3m برضه غالى نعمل ايه ؟؟ الرائد الى فيهم بصلى باستغراب شديد وقاللى طيب ماتركب ستاير كبس قلتله بفرحة والنبى هى مش ممنوعة ... قاللى مين الى قاللك كدة مادام بتتشال وتتحط ومادام حاططها بالنهار فى الشمس مش بالليل تبقى مش ممنوعة (هنا انا كنت هازعرد) وبرضه علشان ابقى فى السيف سايد قلتله الكلام ده على مسئوليتك لو لجنة قفشتنى مش هادفع حاجه وهاقولهم ان انت الى قلتلى وهاطلبك للشهادة قاللى ماحدش هايكلمك لان الى باقولهولك ده قانونى !!!

والى بيأكد كلامى رد الاستاذ خطاب :-

اقتباس المشاركة الأصلية كتبت بواسطة khattab_1989 مشاهدة المشاركة
بص يا باشا أنا لسة مركب ستاير كبس من أسبوع بعد فترة حيرة طويلة جدا علشان إخوانا الصهاينة بتوع المرور و تلككهم
بس في الأخر قررت بأني أشتري ستاير كبس و أستخرت ربنا و توكلت على الله و كمان الله أعلم بنيتي في سبب تركيب الستاير و هو التخفيف من الحمل على التكييف وكمان أنا بسافر كتير مع أهلي و الشمس بتكون مميته ورا عليهم طول سكه السفر
تجربتي بقى يا سعادة حضرت الباشا خلال الأسبوع ده هي مشوارين للمطار و سفر لدمياط و إسكندرية و لف في مدينة نصر و مصر الجديدة و وقفت خلال الأسبوع ده في حوالي أربع كماين كلهم بصوا على الرخص و طريق السلامة ياباشا
أرجو أني أكون أفدتك و قدرت أساعدك و تحت أمرك في أي سؤال أو أستفسار
http://www.nilemotors.net/Nile/showthread.php?t=83515

بالمناسبة كمان انا كنت دايخ على ستاير لعربيتى الجولف وكل ما اسأل يقولولى مانزلهاش لكن الحمد لله محل اوبشن فى 6 اكتوبر لما كلمته قاللى انه عنده حد بيفصل الستاير لاى نوع عربيات واى خدمة يا شباب