الموضوع: اسوأ جهاز موبايل واسوأ شركة موبايلات

المشاركة الأصلية كتبت بواسطة mohamedfawzyhassan

بصفتى شغال فى الشركه اسمحيلى ارد عليكي بحياديه تامه و اوضحلك بعض الأمور

اولا : مفيش حاجه اسمها عده فودافون ... احنا مش ينصنع عدد لكن بنتفق مع شركات تانيه مشهوره بتعمل لنا براندد موبايلز واحنا فى فودافون مصر كنا بنزل عدد سونى ايركسون براندد فودافون و عدد من شركه تانيه مشهوره بس مش فى مصر اسمها هيواوى ودى الشركه اللى كانت عامله التليفون اللى حضرتك بتشتكى منه

حضرتك بتقولى حاولنا نصلحه ممكن تقوليلى حاولتى تصلحيه فين لآن الموبايل ده بضمان فودافون او دلتا و محدش غيرهم عنده قطع الغيار بتاعته !!!

ثانيا : مش معنى ان حظ حضرتك فى العدتين دول وحش ان كل الناس اللى اشترتهم بيعانوا نفس المشكله دى بتبقى حظوظ وبتختلف من واحد للتانى و بترجع برضه لطريق الأستعمال مثلا فى واحد هنا رادد قبلى و بيقول على النوكيا n73 اسواء موبايل مع ان فيه ناس كتير ممكن تختلف معاه و انا اولهم لآن التليفون ده معايا بقالوا اكتر من سنتين و شغال زى الفل

ثالثا موضوع الدقائق ده انا فعلا معرفش عنه حاجه بس مصدقك طبعا ومختلف معاكى فى عدم المطالبه بحقك فى العرض ده .... كان لازم تفضلى وراهم و تعملى مشكله لو لزم الأمر

* صدقينى بدون تحيز والله العظيم احنا عندنا فى ناس مبتنمش باليومين و التلاته علشان خاطر العملاء

* ده غير اننا افضل خدمه عملاء موجوده فى مصر بشهاده الناس كلها ولو فى مشكله لازم تتحل و نوضح للعميل اسبابها بكل وضوح

* حضرتك عارفه الهدف و الشعار الرئيسى بتاع الموظفين السنه دى ايه ... هوا delight our customer يعنى ازاى ندلع العملاء بتوعنا لآن العميل عندنا هوا رقم 1

و فى الأخير لو حضرتك او اى عضوا هنا فى المنتدى عنده مشكله و محتاج حاجه انا تحت امره

بس والنبى بلاش حكايه النمر الحلوه دى لآنى مش عارف اجيب لنفسى

اولا اشكر حضرتك على الرد وعلى سعة الصدر وعلى ابداء تقديم المساعدة للاعضاء
انا كنت عايزة اوضح نقطة اننا لما بنتكلم على مساويء شركة معينة او نتهمهم بالنصب مش معنى كدة اننا نقصد باتهامتنا موظفين الشركة لكن نقصد الشركة كسياسة عامة متبعه فيها
لان ميش موظف هياخد رصيد او دقايق مجانية يحطها في جيبه
انما المستفيد الوحيد هم ملاك الشركة

بالنسبة لعدد الموبايل اللي هي اساسا من شركة هواوي اولا دي مش شركة مشهورة زي نوكيا او الكاتيل او اريسكون ... الخ
انا معايا 2عدة الكاتل بقالها يجي 10 سنين زي الفل عيبها ان ملهاش بطاريات في السوق دلوقت
ومعايا عدة نوكيا 7250 من 6 سنين زي الفل لغاية دلوقت مغيرتش فيها غير البطارية ماشاء الله عليهم
والعدة دي فعلا بتستخدم اقسى استخدام تتصوره لانها مع اولادي

نرجع بقه للعدة الفودافون بفرض انها مشهورة وظهر نفس العيوب في العدتين وفي نفس التوقيت فدي مش مجرد صدفة او سوء حظ اوسوء استخدام انما بدون شك رداءة صناعة

دي غير انهم كان لازم يوضحوا للعملاء ان العدد دي مش هاتنفع مع خطوط غير الفوادفون علشان يكون عندنا حرية اتخاذ القرار
وانا واثقه ان لو المعلومة دي معروفة للعملاء مكنوش هايشتروا العدة دي
وكان افضلي في وقتها اشتري عرض اتصالات بعدة lg
وبالنسبة انه في احتمال يكون في سوء استخدام فأأكدلك ان بالنسبة للعدتين كان استخدامهم نادر جدا لدرجة ان واحدة منهم مكنتش بتستخدم لغاية ما صلاحية الخط انتهت بدون ما نشعر

وانا لم حبيت اصلح عدة منهم بعتها لمحل صيانة موبايلات عادي زي ما بنعمل مع اي موبايل تاني

انا حاليا معرفش ضمانهم كام سنة ومعرفش المفروض اصلحهم فين وياترى مجرد وجود عقد الخط كافي كضمان
وبالنسبة للعدة اللي صلاحية خطها انتهى من زمان وشغال بخط تاني هل لسه في الضمان

والف شكر لك