ياريت ياباشا لو تتكرم وتقولي زي ايه كدة لأني مليش اوي في موضوع العربيات ده ومش عايز ألبس فيها
عرض للطباعة
يا باشا كل الكلام اللي أنت قلته أنا مش معترض عليه ........
أنا أتكلمت في نقطة أتقالت و هي مساواة موتور 1600 بقوة موتور 1300 ...
الموتور له حدود علشان حجمه ....... علشان كدا العربيات الصغيرة في الموتور بتكون أخف في الوزن علشان دي عربيات مُدن في الأساس .
و خفة الوزن هي عامل أيجابي في صالح التسارع في الأول و عامل سلبي في الثبات لو بتسافر كتير .
و ألياربس طلعتها حلوة لغاية 80 و بعد كدا مش بتأكل عيش مع العربيات 1600 و مجربها كذا مرة مع عربية ياريس .
و ده طبيعي جدا جدا علشان فرق قوة الموتور .........
خفة الوزن فرقت في الطلعة .......... و بعدين خلاص ......
أما موضوع العزم ......... العزم بيفرق في المواتير الكبيرة سواء محمل أو لاءة ولكن بيبان في التحميل أكتر .
إنما في النهاية عُمر ما موتور 1300 يتساوى بموتور 1600 .........
مفيش حاجة أسمها موتور ياباني سعران .........لامؤخذة يعني
فيه حاجة أسمها حجم الموتور و القدرة اللي خارجة منه ........
بالنسبة لمقارنتك موتور اللانسر 1500 مع موتور الفيرنا 1600 ...... دي مقارنة قريبة جدا من بعضها
الأهم هنا بعد الحجم ...... هو القوة اللي خارج من المواتير .......
و أي عربية 1300 فوق 100 ......... قصاد عربية 1600 ....... بتكون عربية عادية و مش بتبقى سعرانه خلاص :36_1_61[1]:
مع تحياتي .
بُص يا باشا ....... البدائل في المنطقة كتيرة ... ( منطقة 1300 سي سي )
يعني لو أنت عايز توفير بنزين جامد و رخص قطع غيار عندك الفيات البونتو الكلاسيك ...
و كمان عندك السيريون 1300 سي سي و فيها كماليات كتيرة ..... و ثمنه معقول ....
و فيه الكيا ريو ...... 1400 سي سي ...... و ثمنها معقول برضه قوي .....
دي عربيات توفر في البنزين و تنفع في المدن قوي و برضه تسافر أدام أنت مش بتسافر كتير ........ فأنت مش محتاج عربية سفر بالأساس .....
يبقى تشوف حاجة توفر في البنزين .....
و ربنا يكون في عونك و تختار حاجة حلوة و مناسبة إن شاء الله .
لا يا باشا بقى الكلام ده بقى عايز مراجعه
موتور التويوتا 92 حصان وده لأن الشركة بتحسب قوته وهو خارج العربيه ( يعنى لو عايز تاخده البيت تعملة موتور ميه مثلا )
إنما موضوع انه 84 حصان ده فده بعد ما ركب العربيه
علشان كده يفضل إنك تشترى الموتور لوحده والعربيه لوحدها
وعلى فكره كل مواتير تويوتا كده بتحسب القدره للموتور وهو بره العربية
بصراحة-ودة رايي الشخصى-انا برشح الجين 2 جدااا فعلا عربية محترمة وسيبك من حتة عيوب التقفيل دى لان ببساطة جدا كل شئ وارد الاهم مايكونش فى اى حاجة تحت الكبوت-اقصد الموتور والعفشة وخلافة-ودة مش انحياز للجين 2-رغم انها تستحق على الاقل تمنها-لانى ان شاء الله ناوى اجيب فيات جراند بونتو
طبعا الإخوة الكرام أفاضوا في الشرح والتوضيح.
وأنا حابب بس أوضح لكم وجهة نظري.
أنا طبيب أسنان. وبسبب مهنتي بهتم بكل التفاصيل الدقيقة والكبيرة والمهمة والغير مهمة.
ولإني لسه ما جبتش عربية (يا رب إرزقنا) فأنا بأجر عربيات كتير جدا. وركبت الياريس والجين2 كتير جدا وححاول أشرح الفرق بينهم.
على فكرة أنا بركب العربية وهي زيرو لسه ما إتهانتشي يعني، صاحب المعرض بيخاف على عربياته فبيأجرهم في الأول لناس معينة عشان يحافظوا عليها شوية في الأول. وعلى طول بيعمل صيانة في ميعادها.
أنا سواقتي رياضية جدا وبحب أحس بإمكانيات العربية اللي معايا، ومشاويري خليط ما بين المسافات المفتوحة والقيادة داخل المدن.
على هذا الأساس أعتقد إني أقدر أقدم مقارنة جيدة بين عربيات كتيرة
الصالون الداخلي:-
الياريس أول ما ركبتها ما تخيلتش إن الصالون بتاعها واسع كده، البودي بتاعها من برة يحسسك إنها عربية ضيقة من جوا. بس الحقيقة غير كده خالص. دا غير إني لما بقعد على كرسي السواق وبظبط الوضع بتاعه (وأنا طويل على فكرة حوالي 186 سم) بيفضل في مكان ورا مناسب لواحد برضه طويل يقعد مرتاح.
الجين 2 برضه واسعة من جوا. بس ورا ضيقة عن اليارس
الخامات الداخلية
الإتنين تقريبا زي بعض
الشكل الداخلي
لوحة عدادت الجين 2 يحسسك إنك راكب عربية رياضية، عكس الياريس اللي ما بتحسسكشي بكده
صوت الموتور:
الياريس صوته أنعم، ولكن صوت الجين 2 بيسموه زئير الأسد صوت قوي تحب تسمعه بيحسسك بقوة الموتور وما تزهقشي منه.
قوة الموتور:
بالنسبة للياريس ، بصراحة شديدة أنا ما تخيلتش إني ممكن أركب موتور 1300 بالقوة دي. تخيل إن هو موتور الكورولا الشكل السابق وزودوا عليه تكنولوجيا عالية (cvvt على ما أعتقد) وحطوه في بودي أخف، النتيجة مرعبة، موتور 1300 تحب تسابق بيه لأنك مستمتع بقوته رغم إنه 1300، العربية بتكون على ال 80 وهي على الغيار ال3 وال rpm يادوب معدي ال3 بهمسة، يعني لسه الموتور بيقول يا هادي.
الجين 2 طبعا موتور أقوى. 1600 طبعا وكمان أنا شفت على النت فيديو بيقول إنه يفضل قيادة الجين 2 على rpm عالي عشان تحس بقوة الموتور ودي حقيقة فعلا. العربية مجنونة بعد ال3500 ولا أبالغ لو قلت لك إنها ممكن تطلع من أي عربية 1600 تقريبا.
على العموم إنت مش حتحس بالفرق قوي بينهم غير على سرعات عالية، طبعا سحب الياريس بيقل جامد بعد ال 120 مقارنة بالجين 2.
إستهلاك البنزين:
أنا فاكر إني أول مرة أجرت فيها اليارس كنت في حالة ذهول تام من درجة توفيرها للبنزين, عملت بيها مشوار حوالي 220 كيلوا وسط المدن منهم حوالي 60 كيلوا بس على طريق سريع والتكييف كان شغال ما بطلشي خالص وأنا سواقتي أصلا رياضية والعربية إستهلكت أقل من 15 لتر
الجين 2 طبعا أكتر من الياريس ولكن أقل من الانسر على سبيل المثال.
ثبات العريبة:
كل من قال إن الفرق مش محسوس، فده حاجة من إتنين يا إما هو ما ركبهومشي اصلا أو إن هو ما بيجريش,
طبعا في فرق كبيييييبر في الثبات لصالح الجين 2.
الياريس تخاف منها جدا بعد ال120 وتبقى زي الريشة بعد ال 140 و عايز تأكيد على كلامي إدخل على منتدى تويوتا وشوف الناس الي معاها الياريس بتتكلم إزاي على ثباتها الزبالة. دا حتى في موضوع إسمه (الهوا طير الياريس يا رجالة).
الجين 2 ثابتة جدا على الطريق. ثابتة عن الانسر وعن الإلنترا تقريبا تديك ثبات العربيات الألماني.
العزل الإتنين قد بعض تقريبا ولو إني برتاح لعزل الجين أكتر
التكييف الإتنين ممتازين، يعني عمري ما زودت التكييف عن 2 في عز الحر وإحنا خمسة في العربية. بس طبعا سحب الياريس بيتأثر عن سحب الجين.
العفشة: طبعا الياريس أنعم ولكن ده بيقللك الثبات على عكس الجين اللي عفشة أنشف وبيزودلك الثبات (أقصد أنشف شوية من الياريس ، مش ناشفة قوي يعني، في رأيي أنعم من اللانسر)
الكماليات
طبعا الجين تتفوق عن الياريس في الكماليات مش عايزة كلام
السعر
الكل بيشتكي من سعر الياريس المبالغ فيه. وطبعا الجين 2 سعر جميل بالنسبة لعريبة 1600 وبالكماليات دي
التوكيل
طبعا توكيل تويوتا عن تجربة شخصية مع عريبة واحد صحبي لا يعلى عليه في التعامل.
توكيل عز العرب بتاع البروتون بيسموه ذل العرب أو توكيل عز البلح، بس ده لأنه مهمل تماما في العربية من ناحية التسويق وأسلوب معاملة العملاء. بس لو دخلت على منتدى البروتون حتلاقي أرقام تليفونات إتنين مهندسين في عز العرب قمة في الإحترام والإلتزام خاصة المهندس آمر. والكل بياخد رأيهم وبيروحوا لهم بالإسم في التوكيل قبل اي حاجة.
سعر إعادة البيع
اليارس أحسن من الجين 2
بس صدقني في خلال سنتين أو تلاتة الجين حتقلب الموازين تماما.
آسف على الإطالة ولكني حبيت اشر ح الفرق
أما إنك تختار إيه فده يرجع ليك إنت، وما تخليش اي حد يقولك إشتري العربية الفلانية أو العلانية. إنت بتاخد معلومات وعلى ضؤها وعلى ضوء ظروفك إنت ، تحدد إنت عايز تشتري إيه بالظبط
ومهما كانت العربية اللي حتشتريها أسأل الله أن يعطيك خيرها وأن يكفيك شرها
والسلام ختام
لا يا باشا
كل شركات العالم في البروشورات بتعلن عن قوة الموتور و مفيش شركة بتعلن عن قوة عربية لأن صعب الموضوع ده يتعمل .
كل الشركات بتعلن عن قوة المحرك فقط ........ و ده للأسباب الآتية :
أولا علشان تحسب قوة العربية على الدينو ..... أنت بتحط العربية على الداينو و العربية مش بتمشي
و لكن العجل هو اللي بيتحرك بس ..
يعني كدا حسبنا صافي القوة اللي خارجة من على العجل بدون حساب العوامل الآتية :
الهواء المعاكس .
احتكاك الأرض بالكاوتش .
أختلاف الظروف المناخية .
و طبعا كل الشركات بتحسب خرج المحرك ......... و بيكون فيه فرق قوة حوالي من 10 إلى 15 % و هو بيجري على الأرض و بيجر العربية .......
هاتلي شركة واحدة بتعلن عن قوة العربية و مش بتقول قوة المحرك ؟؟؟؟؟؟؟
و أدي يا سيدي صورة لمواصفات العربية من على موقع ويكيبيديا :
http://i27.tinypic.com/10pvl10.jpg
و صورة تانية من موقع تويوتا مصر نفسه :
http://i31.tinypic.com/whipfc.jpg
صحيح موقع تويوتا مصر مش حاطط القوة بالحصان ....... حاططها بالكيلوات ؟؟؟؟؟؟؟؟؟
على العموم الكيلوات الواحد بيساوي 1.33 حصان .
بكرر تاني يا باشا ......... كل شركات العالم بتحسب الموتور بس و ده الرقم اللي الكل بيعلن عنه .
مفيش شركة بتعلن عن خرج العربية لأنه صعب يتحسب أصلا .
كل بيعلن عن خرج المحرك فقط ........ من غير بقى ما نحطه علشان يطلع مياه أو يطلع حتى بترول .
و القوة المحسوبة ....... حضرتك بتقلل منها من 10 إلى 15 % ..... هدر طاقة حسب الظروف الآتية :
درجة نعومة الطريق و خشانته .
قوة الهواء المقابل .
الإلتزام بنوعية الوقود الموصى به .
الوزن الكلي و العام للسيارة و الذي في السيارة .
و الأشاعة اللي طلعت من فترة على الكورولا بتاعة 145 حصان ,,,,,,,,, ده كان تأليف من التوكيل و محاولة تسويقية فاشلة لأنها كانت بالكذب .........
و لو الكورولا موتورها فعلا 145 أو حتى 140 حصان .......
يبقى كدا الإلنترا .......... متسدش معاها خالص ....... و ده بعيد تماما عن الواقع لأن العربيتين في قوة واحدة و الوزن متقارب ......... و الكورولا مش بتفرق في السحب خالص و نهائيا ..........
بكرر مرة تانية كل العربيات اللي تم الأعلان عن قوة محركهم ....... كلهم تم قياس المحرك لوحده فقط و الكلام ده من كذا شركة عالمية كبيرة .............
الف شكر ياباشا بجد عالاستفاضة الرهيبة الي قدمتهلنا بجد انا مشكور جدا انك لم تبخل علينا بالمعلومات الجميلة ده
بس كنت اتمنى منك انك تقولنا او اي حد من الساده الافاضل يتكرم ويقولنا استهلاك
الجين2 تقريبا للبنزين اد ايه ؟
واسعار قطع الغيار عن تجربة لأني سمعت انها عربية ممتازة بس مش مريحة في المصاريف
بعد الشراء من ناحية اسعار قطع الغيار والصيانات
بجد اتمنى لوحد عمل الصيانات قريب 1000 - 5000 - 10000 - يقولنا ايه الاخبار.
والف شكر ليكم جميعا
أستهلاك الجين 2 للبنزين حسب السواق .....
الموتور بتاع العربية موتور حامي شوية ...... يعني بيطلع عزم عالي على عدد لفات عالي ....
و بالتالي الناس اللي عايزة تشد و تجري و غرز و خلافه ( قلة الادب المعهودة في الشارع المصري ) تلاقي الناس حارقة على الموتور و مش بتغير إلا على 5500 لفة - دقيقة ........ و طبعا ده بيخلي الأستهلاك عالي .
أفضل استهلاك هو ...... 13 أو 15 كم لكل لتر بنزين أوكتان 92 على سرعة 75 أو 80 على الغيار الرابع أو الخامس على سرعة 90 كم - س .
داخل المدن و الزحمة المستمرة ...... من 9 كم إلى 10 كم لكل لتر بنزين .
لما نقارن الياريس أو أي عربية 1300 مع عربية 1600 في استهلاك المدن ...... 1300 أفضل في الأستهلاك لأن الموتور صغير .
على الطرق السريعة الفرق مش كبير ....... و لكن فرق القوة بيبان أكتر ........
صيانات الجين 2 بتكلف الآتي في التوكيل :
صيانة أول 1000 كم بتدفع ثمن الزيت و الفلتر فقط و الكشف العام على السيارة و العمالة مجاناً
صيانة 5000 أنت ممكن تعديها أصلا لو وضعت زيت 10 ألاف كم ......و لكنها بتكلف تقريبا 250 جنيه مصري ثمن الزيت و الفلتر و الكشف العام على السيارة ( شامل كل شئ )
صيانة 10 الاف ...... بتكلف تقريبا برضه من 250 إلى 300 جنيه حسب نوع الزيت اللي أنت عايز تحطه
يعني من الأخر أنت ممكن تعمل صيانة واحدة كل 10 الاف كم ....... و بكدا هاتقلل تواجدك في التوكيل .
و هاتقلل المصاريف برضه ..... لأنك هاتدفع العمالة مرة كل 10 الاف كم مش كل 5000 كم .
أسعار بعض قطع الغيار داخل التوكيل
تيل امامي 230 جنيه بالتركيب تقريبا . خارج التوكيل من 130 إلى 175 جنيه .
تيل خلفي تقريبا سعر مقارب جدا .
فانوس أمامي بالموتور 1200 جنيه ........ خارج التوكيل تقريبا 500 جنيه من غير موتور .
اللي في التوكيل بروتون أصلي ......... اللي خارج التوكيل ...... تايواني و خامته كويسة .
أكصدام أمامي 1100 جنيه في التوكيل
أكصدام خلفي تقريبا نفس السعر .
العربية حاجتها موجودة في الحرفيين أستعمال الخارج بأسعار رخيصة جدا .
في محلات قطع غيار موجودة في الجيزة و شارع دمشق لبيع قطع غيار بروتون و طبعا أسعارهم أرخص من التوكيل بكتير .... بس أنا الحمد لله رب العالمين عُمري ما أحتجت أشتري حاجة لللعربية علشان كدا معرفش أسعارهم قوي .
كل لما تحافظ على أي عربية هاتعيش معاك و تعمر ........ هاتهملها و تسوق بعافية و عند في الناس في الشارع
لازم هاتتخبط و تعمل حوادث و تأخد أختام الشارع المصري .......
فالموضوع برضه متوقف عليك .
علشان برضه تبقى عارف
حاجات الياريس مش رخيصة و تكاد تكون في نفس أسعار الجين 2 و برضه أسعار الصيانات في توكيل تويوتا مش هاتكون أرخص من عز العرب ......
فأنت كدا تبدأ تقارن بين موتورين 1300 و موتور 1600 و شوف أحتياجك أيه ........
و برضه بتقارن بالسعر النهائي .......