الموضوع: عن عبد الله اوبل اتحدث...

من فترة كده لاحظت ان العربية بتطول اوي على ما تنقل -اوتوماتيك- وكنت لازم اضغط بنزين جامد جدا عشان تاخد الغيار,ومفيش تسارع اصلا...
انا حطيت ايدي على قلبي وقلت عوضي على الله في الفتيس خاصة ان انا كانت عندي خلفيةمسبقة عن كثرة اعطال الفتيس الأتوماتيك.

المهم وانا في الشغل ربنا هداني اني اكشف على زيت الفتيس...عملت زي ماشفت بتاع الزيت بيعمل وجبت الفتيس على ال R وكشفت على الزيت لقيت مفيش ولا نقطة في الخزنة والحديدة طالعة ناشفة ونضيييييييييفة...

والله انا انزعجت جدا بس حمدت ربنا اني اكتشفت العيب وقلت ان شاء الله تكون حاجة بسيطة وطلعت على بنزينة شل قريبة من شغلي كانت الساعة حوالي 11 بالليل...حطيت في العربية حوالي 4 علب زيت فتيس احمر اسمه تراست.وبعد كده حطيت العربية على المجري والفني كشف عليها وقاللي ان في خرطوم بيسرب زيت ولازم يتغير...

المهم انا رجعت الشغل تاني وقلت اطلع بيها بكرة على عبد الله اوبل اللي في المريوطيه.اهو قريب مني وفي نفس الوقت اجرب شغله-مجتش عليه يعني مهو ياما صنايعية ومهندزين حطوا بصماتهم الكريمة على العربية ومنهم صابر بتاع رابعة والعربية بتتنيل من سيء لأسوأ-

تاني يوم الصبح كلمت زميلنا الأخ الغالي جدا م/AMRALFY على الموبايل وكانت أول مرة اتشرف بالاتصال بيه,وعرفني ازاي اوصل لعبد الله وقاللي انه ممكن يروحله النهارده وفرصة نتقابل هناك.

طلعت من الشغل على عبد الله اوبل ومن هنا نبدا الحكاية.......

اول ما وصلت استقبلوني بجد بكل ترحاب وابتسامة "نورت الدنيا يا باشا"
وجه واحد باستمارة خد اسمي ورقم تليفوني وجهزلي مكان اركن فيه العربية وبدا يسألني ايه شكوتي من العربية...
قلتله...
تسريب زيت باور وفتيس
تسريب مياه من دورة التبريد
المكنة صوتها عالي جدا

سجل ده كله في استمارته

و5 دقايق بالظبط والعربية اترفعت واتجند صنايعي للعربية ومساعد ليه,وكلمة اتجند دي معناها انه مالوش اي دعوة بأي عربية تانية غير لما تخلص وتمشي.والصنايعي اللي كان معايا "بهلول" محطش في بقه لقمه غير الساعة 10 بالليل وانا بحاسب

المهم بهلول فك المصفحة وجه عبد الله نزل تحت العربية وقاللي العربية محتاجة يتغيرلها خراطيم الزيت بتاع الفتيس وبعد كده كبس دورة التبريد لقي تسريب في علبة الردياتير بس جامد جدا شفته بعيني...

بالنسبة لصوت الوتور قاللي ان الفرن فيه حاجة اسمها المحفز او الشجرة انا مش فاكر بالظبط ودي غالية اوي..انا قلتله خليها لبعدين

5 دقايق والخرطومين كانوا موجودين لأن عندهم محل قطع غيار بتاع سامح اخو عبدالله وبرضه هو انسان مهذب وذوق ولو سألته على اسعار كل حاجة في المحل هيقوللك عليها ومعندوش اي مانع يفتحللك كرتونة متبرشمة عشان يفرجك على اللي عايز تشوفه


بدأ بهلول الشغل في العربية نزل الاكصدام -للمرة الخامسة للأسف خلال شهرين لما كنت حاسس انه بخلعلى ضرس من ضروسي معاه- وفك الردياتير واخده صبي لبتاع الردياتير وكان امامنا اختيارين لو نفع يتصلح والعلبة اتغيرت ومفيش تسريب يبقي تمام لو ماكنش يبقى هنجيب واحد جديد...

بصراحة انا كان في جيبي بتاع الف جنيه,قلت عوضي على الله فيهم,العربية عاملة زي البلاعة في الفلوس دانا لو متجوز مش هصرف على بيتي زيها

الواد خد الريداتير واتاخر اوي,وكنت كل ما اقول لسامح يشوفهولي كان يكلم بتاع الردياتير على الموبايل عشان يعرفني التطورات ييجي 3 او 4 مرات

المهم الردياتير جه واتركب,وانا بصراحة شربت اليوم ده 3 حاجة ساقعة وواحد عصير لمون كله على حساب عبدالله-ما عدا واحد عزمني عليه م/عمرو

وفيه موقف حلو جدا من عبد الله...واحد مهندس كبير في السن شوية كان بيعمل شغل في عربيته ومعاه السواق بتاعه,والعربية خدت وقت جامد والراجل تعب وعايز يروح وهو ساكن في الدقي ومش هايعرف يروح لوحده,بكل بساطة عبد الله راح وصلة بنفسه في عربيته لغاية باب البيت وبكل ترحاب...

على الساعة 10 كده عربيتي خلصت وكبس والحمد لله مفيش تسريب لا ميه ولا زيت-طبعا لسه العربية تحت التجربة لما نشوف- طلب من بهلول ينفخ فلتر الهوا والتكييف والموتور بالهوا ويكشف على فلتر البنزين وبعد كده حطلي cover شيك للبطارية


نييجي بقه لساعة الحساب وانا حاطط ايدي على قلبي.عمال اقول لنفسي اذا كان صابر -باشا- اللي بيتكلم من مناخيره- وبيقول انا اصلا مابحبش العيال الهيايفة بتاعت النت دي- خد 200 جنية في تغيير طقم السرفيس ومعجبنيش شغله وشاكك ان الصنايعية بتوعه هما اللي بوظولي الخراطيم,اكيد عبد الله هايلهفله زيهم مستريح...

و اليكم الفاتورة...

160 جنيه ------ خرطوم تبريد زيت فتيس
75 جنيه -------- عدد 5 علب زيت فتيس
150 جنيه ------ علبة ردياتير

المصنعية...
60 جنيه

الإجمالي 445 جنيه فقط لا غير



يعيب مركز عبدالله عدم وجود جهاز كشف اعطال..بس هوه لو استمر بطريقته دي مع الناس ربنا هيكرمه ان شاء الله و يجيبه ويعمل بيه شغل كويس...

تليفونات المركز
0106060149
0106075877
0237458718

سامح 0103090205

اتمنى اكون ما نسيتش حاجة وانا بحكي
و أي سؤال انا في الخدمة...

تحية خاصة ل م/عمرو الألفي وانا سعيد جدا بالتعرف عليك