الموضوع: كلام مش بطال ( إزاي تخلي عربيتك تحبك )

يابنت الأيه ..... إنتي تاني .... كل شويه عطلانه وقارفاني في عيشتي وخاربه بيتي .... معلش ماهو كله من الشوارع الزفت بتاعتنا دي ومطباتها وبلاعتها ( يا إما البلاعه تبقى فوق وعمله مطب ياإما تبقى واطيه وعامله حفره تبهدل العربيه ) وأدي أخرة التجميع المصري رايحه جايه ع الميكانيكي .... طب أعمل أيه بس ياربي ...أووووووووووف .

كل ده كلام كلنا سمعناه وسمعنا أكتر منه كمان من قرايبنا وأصحابنا وإحنا كمان ساعات بنقوله من غير مانسأل نفسنا عن الأسباب الحقيقيه ( واللي طبعا اللي ذكرته فوق ده جزء منها ) لسرعة إهلاك العربيه وكيفية المحافظه عليها لأطول وقت ممكن .

لو فكرت شويه هتعرف إزاي تخلي عربيتك تحبك , إزاي تخليها تعيش معاك وتمتعك أطول وقت ممكن ..... طب إزاي .

قولتولي إزاي ( مين اللي قال بالضبط ) ماعلينا ... المهم أول حاجه طريقة سواقتك للعربيه لازم تكون هاديه وناعمه من غير إفترى ولازم كمان تقدر ظروف عربيتك يعني ماتبقاش محمل فيها 5 ركاب وشنط و.... إلخ وعايز سحبها كأنها فاضيه أو عمال تقرس عليها وتحملها أكتر من طاقتها وبعدين تيجي تشتكي منها .
كمان لازم نعرف أن العربيه دي جهاز مصمم لغرض معين وهو أنها تكون وسيلة مواصلات مش وسيله للإستعراض وتعريض حياتك وحياة غيرك للخطر زي الخمسات والأمركه والحركات دي كلها اللي برضه بتأثر بالسلب على عفشة ومقصات العربيه وموتورها وبعدين برضه تيجي تشتكي منها ... طب مأنت اللي بتبهدلها وعامل فيها كده .الله ماتوحد الله ياعم أمال .
الصيانه الدوريه ... إوعى تفتكر أنك بتخسر فيها لا بالعكس دي بتحميك من مشاكل كتير ممكن تجنبها في المستقبل لو بتشيك على عربيتك بإستمرا ر ومش بتهملها وشغال معاها بحواسك كل لما تبقى تسمع صوت تحت توديها للعفشجي ولما تشم ريحه كده ولا كده توديها للميكانيكي .... دي مش طبيخ ياعم الحج الله يكرمك .. دي عربيه ... وبرضه ترجع تشتكي منها بعد كده ... طب ما أنت اللي أهملتها وإهمالك لها هو اللي وصلها لكده ( البنت أنحرفت يارجاله ) .
قطعة الغيار ... مهما كانت قطعة الغيار الأصلي غاليه برضه جيبها لإنها هيا اللي هتحافظ على إستمرا عربيتك لإطول وقت ممكن على حالتها مافيش حاجه إسمها تقليد بس نظيف ( يعني أيه نظيف المساعد مثلا مغسول مرتين ..حاجه غريبه ) الأصلي أصلي وما تعتمدش على غيره ومن البدايه كلنا بنسأل على أسعار قطع غيار العربيات قبل مانشتري ... يعني بتبقى عارف ان العربيه ماركة كذا دي قطع غيارها غاليه يبقى من الأول ياتشتريها وتجيبلها قطع أصليه ياتدور على غيرها تكون مناسباك أكتر .
وأخيرا ... إحساسك بعربيتك نقطه نحول مهمه في خلال الفتره اللي هتقعدها عربيتك معاك ... يعني لو أشتريت عربيتك دي وأنت حاببها ومقتنع بيها تماما مش علشان على قد فلوسك أو علشان بابا كان رأيه أن هيا دي الأحسن وخلافه من الأسباب لأ ... لأ أنا أشتريت العربيه دي علشان انا مقتنع بيها وحاببها وعايزه هتلاقي نفسك مش ممكن تقدر تستحمل تسمع فيها صوت ... تجنن لو أتحكت بس حكه بسيطه ... تزعل أوي لو راحت للميكانيكي وهتقعد عنده يومين وهيا بعيد عنك ... وده شيء طبيعي في كل أمور حياتنا لو بتحب عملك هتخلص فيه وهتجتهد ولو مش بتحبه هتهمل فيه وتتكاسل ده وضع طبيعي في عدة أمور في حياتنا وليس في العربيات بس .

تفتكر بقى لو أنت بتعامل عربيتك معامله أدميه مش بتهينها ... وبتحرص على الصيانه الدوريه بتاعتها ... وبتجيبلها قطع الغيار الأصليه ... وقلبك حاسس بيها وواكلك عليها ( الحفره اللي مابخدش بالي منها بحس بيها بتوجعني في قلبي ) ممكن العربيه تعمل معاك بقى دقة نقص ولا تعطل على غفله وتخليك تقول الكلام اللي مكتوب في الأول فوق ده وأكتر منه كمان؟؟؟
بنسبة 99 % مش ممكن يحصل ( إلا ماشاء الله ) بالعكس هتتحول عربيتك من مصيبه واكله دماغك كل شويه وعمال تفكر تبيعها أو تجيب غيرها أو .. أو .. أو إلى سبب يجعل البسمه مرسومه على شفايفك بإستمرار ... سلام .
وعلى لقاء في الجزء الثالث إن شاء الله من ( كلام مش بطال ) (عربيتي ... مش زي أي عربيه تانيه ) .