الموضوع: حكايتى مع التيدا وتوكيل السبع ( للإفاده )

بداية القصة :- بفكر أجيب ايه اجيب ايه مقارنات بلا حدود لانسر ولا سيراتو ولاتيوتا ولا هوندا ولاتيدا معاناة الى ان استقريت على الاخت تيدا للميزات عدة بالنسبالى واكثرهم الوسع الداخلى للسيارة وعلوها عن الارض المهم روحت لتوكيل السبع طلبت العربية اللون اسود فرش اسود موجود يافندم تمام استلمت العربية تحفة ماشاء الله الكلام ده كان فى شهر يناير 2009 طبعاً ركوبة التيدا مالهاش حل بالنسبالى بس مرة فى مرة فكرت انى اشد بالعربية اجرى بيها شوية فوجئت بأول صدمة وانا بفرمل لقيت الدركسيون بيترعش اكنو جالو صرع انا لسه معنديش خبره فى العربية دى قولت يمكن عشان العربية لسه جديدة واى حاجة هاتتظبط فى صيانة الالف المهم روحت صيانة الالف تغيير زيت وتربيط واللذى منو قالولى احنا ربطنالك على كل حاجه وجربنا العربية زى الفل جيت اجرب انا لقيت نفس الموضوع موجود روحتلهم فى يوم تانى عملو نفس الكلام ومفيش جديد وكالعادة استلمت العربية ومشيت ولكن للأسف نفس المشكلة موجودة قلت مابدهاش بأه لازم يكون فى حل روحتلهم تانى وأخيراً ظهرلى مهندس مكنش موجود قبل كده جرب العربية وظهر العيب واكتشف ان الطنابير بايظه وغيروها على حسابهم والحمد لله وفترة كده اكتشفت ان فى مشكلة فى الدركسيون بيرزع منى فى المطبات ومش مظبوط جه معاد صيانة الخمسة اللاف الصيانة العادية وحكتلهم على العيب ده طلعو جربو قالولى زى الفل العربية مافهاش حاجه ربطو وظبطو العفشة وكلو تمام طبعا جريت بعد كده المشكله موجوده ولازال همه مش مقتنعين قالولى صدقنا لو العربية فيها حاجه هانعملهالك لكن العربية سليمة ضحكت على نفسى وصدقتهم انا عامل دلوقتى ستة اللاف كيلو إلا حاجه بسيطة والمشكلة انا حاسس بيها ومجننانى روحتلهم النهاردة يمكن تلاته طلعو يجربو واحد بس قال ان فى شوية تخبيط بسيط فى الدركسيون وهانظبطهولك دخلت الورشة وطلع بيها الصنايعى يجربها قالى كده تمام زى الفل انا ظبطلك رجلاش الدركسيون وكلو تمام طلع جرب مهندس تانى وشاف العربية بعد مانا جربتها طبعاً واما رجع قولتلو لسه المشكلة موجوده ولازم يكون فى حل قالى طيب احنا ممكن نغيرلك علبة الدركسيون بصراحة انا فرحت بس قالى ادينى اسبوع واتصل عليا تكون موجودة ................ لسه بقيت القصة اما اغير علبة الدركسيون

انا عارف انى رغيت كتير سامحونى بس اعرفكو مدى معاناتى مع التيدا اللى لازلت بحبها والحمد لله