الموضوع: لسه فى ناس بتقول السلام عليكم؟؟؟؟؟؟

انت قول السلام عليكم
لأنها تحيه الإسلام ...ولأنك تأجر عليها وده الأهم
وانصح الناس التانيه بينك وبينهم انهم يعملوا كده والدال على الخير كفاعله

الموضوع بسيط اوى
انا بقول للناس "سلام عليكم" واللى يجودوا بيه كرد كتر خيرهم عليه
واللى بيقول لى "سلام عليكم" بقول له "عليكم السلام" واللى بيقول لى "هاى" بقول له "اهلا" لأنى مش بعرف اقول "هاى" دى فبقول له ترجمتها العربى وخلاص
لكن انا مش شايف ان فيه داعى ان واحد يقول لى "هاى" فاقول له"وعليكم السلام" لانى ببساطة باحرجه وبدون داعى، هو اصلا اللى بيقول هاى كلها كام سنة وهيقول سلام عليكم من نفسه

الموضوع ده بيضايقنى جدا

كنت فى فتره فى رحله عمل فى شرم اللى اساسا مبحبهاش لأسباب كتير تتعلق بنفس الموضوع ده لان دايما فكره الغرب هو اللى سايد فيها وتحس انك مش فى بلدك

موظف الاستقبال فى الفندق من يوم ما رحت وانا داخل او خارج وبطلب منه حاجه اقوله السلام عليكم يقولى هالو

اول مره قولت يمكن مش سامع تانى مره اقوله سلام عليكم يقولى هالو

جيت فى مره بقا قولت لا ده بيستهبل فبقوله هو انت منين ؟ قالى خير يا فندم قولتله مش معنى انك شغال فى فندق وفيه سياحه وكدا انك تنسى ان لغتك فى الاساس عربى بعد أذنك لما حد يقولك سلام ربنا رد عليه سلام ربنا برده بلاش هالو ده لحسن بتجيب لى مغص

وللأسف كان رد فعله انى بعد كدا اقوله سلام عليكم ميردش على اصلا مجرد الابتسامه الصفراء بتاعت الخدمه

زى ما بشمهندس / سباعى قال " لما ارد اقول وعليكم السلام كدة انا بحرجه"

وبالتالى لما حد انا مبطقوش يقولى هاى اقوله انا وعليكم السلام

انما لو شخص كويس بقوله أهلا عشان مبعرفش اقول هااااى تقيله على قلبى شوية.

ولما انا اقول هاى بقصد بيها "امشى من قدامى".

فعلاً الموضوع ده انتشر اليومين دول
لما حد يجي يقول "هاي" و أنا أرد عليه و أقوله "وعليكم السلام"
أنا كده بفكره إن في حاجة اسمها "السلام عليكم " و ردها "و عليكم السلام"
و مفيش حد مش عارف إن "السلام عليكم" هي صيغة التحية بين المسلمين ...على الأقل بيفتكرها في الصلوات الخمس
و أنا مش شايف إن فيها إحراج ، لأن ببساطة هو اللي أحرج نفسه في الأول و لم يقل "السلام عليكم"
ده انا بقالي أربع سنوات في كلية الحقوق جامعة عين شمس
مفيش غير أستاذين - من كل اللي درسوا لنا - هما هما اللي كانوا بيقولوا "السلام عليكم"

مين دول اللى بيقولوا هاى ؟
مفيش حد اعرفه بيقول كدة"""