الموضوع: عندما يصبح التفوق لعنة !!! يعني ابقى فاشل !!

اول مرة اسمع عن حاجة زي كده

طب انا لو عندي شركة اعتقد انه من الافضل اني اشغل واحد بيفهم على اني اشغل واحد يادوب على قد حاله
على الاقل اللى بيفهم ده لو كان فيه مشكلة مستعصية هيعرف يحلها

بص .. مبدأيا أنا عاوز أقولك حاجة ولازم تؤمن بيها وأنا عارف انك مؤمن بيها بس للتذكرة " إن الله لا يضيع اجر من احسن عملا " ، وأكيد ان شاء الله ربنا كاتبلك خير في مكان أفضل .ز بس اصبر برضا ،

نيجي بقه لحكاية Over Qualified ، ودي على فكرة فعلا بتكون سعات سبب رفض في بعض الشركات والسبب أنهم بيكونو شايفين ان امكانياتك تؤهلك لمكان أفضل من شركتهم وبعائد اكبر من اللي هيدهولك ، وعشان كده بيكونو شايفين انك ممكن بسهولة تسيبهم بعد فترة قليلة بمجرد ما تلاقي فرصة في شركة اكبر وبعائد اكبر وهما متوقعين ان ده حيحصل نظرا لمؤهلاتك ، وبالتالي بيرفضوك عشان عنصر الأستقرار اللي هما متوقعين انه مش هيكون عندك نظرا للأسباب السابقة ..، ده التفسير لسبب رفضهم ، وده ميزعلكش ، بالعكس انت تفرح لأنك مؤهل للعمل في شركة اكبر من هذه الشركة ، فأستمر في السعي وان شاء الله هتتعين في شركة أكبر قريب بس متنسانيش في الحلاوة

ان شاء الله ربك شايلك مكان أحسن

دول مش كلمتين باصبرك بيهم

ده بجد بيحصل

لأن ربنا ما بيضعش تعب حد

أبدا

المهم انت كمان ماتضيعش تعبك و تيأس و تبطل تدور على شغل

و نصيحة

انت غلطت لما سيبت الوظيفة الكاجوال

كنت خدها و دور على غيرها

ما تقولش لحاجة لأ

اشتغل و خد خبرة

معرفة زيادة في ذهنك وسطر زيادة في السي في

و اوعى تبطل كورسات و دراسه

واتكل على الله دايما

أخي الكريم
بارك الله فيك و وفقك لكل خير

انا مش هازيد علي اللي قالوهولك الاخوة هنا في المنتدي
غير ان كلمة Over Qualified دي وسااااااااااااااااااااااا ااااااام تحطه علي صدرك لو كانوا صادقين


ولو كانت كلام زفلطة برضو ما تزعلش
الرزق ده بتاع ربنا

و اكيد ربنا مقدرلك رزقك في حاجه تانيه

ياما هاتقابل حاجات خلاص منتهية و واثق من نهايتها ... تكمل علشان ربنا كاتبهالك
و حاجات تانية مستحيا حد يقولك انها مش هاتتم .. و ماتمش علشان ربنا مقدرلك الخير في غيرها


ملحوظة صغيرة بس حابب اقولهالك.... الكلام اللي بقولهولك ده من واقع تجارب شخصية .. ما فهمتهاش غير بعدها بفترة مش قليله

خلي عندك ايمان بقضاء ربنا وبرزقه
وربنا ييسرلك الاحوال .. ونسمع عنك خير قريبا
تحياتي

باشا أولا الحمد لله على كل شىء و خللى بالك إن دى فى الأول و فى الآخر إرادة ربنا و إنك ليك نصيب هتاخده و فى وقته اللى ربنا محددهولك.
أحيانا فعلا الشركات بتقوللك إنك Over qualified لما ما بتبقاش لاقية سبب مناسب أو منطقى تقوللك ليه إنت اترفضت أو حد واسطة اتاخد بدالك مثلا.
بس من ناحية تانية لازم تبقى عارف إن فى الHR فعلا الOver Qualified بالظبط زى الDisqualified الاتنين ما يصلحوش فى الوظيفة و هنبتدى بالتانى تعليمه هيكون أبطأ و تقدمه خلالها و إنجازه للأعمال و هكذا فالشركة تخسر واحد من العمالة مش قد الشغل اللى معروض عليه.
و فى نفس الوقت الحالة الأولى اللى زى حضرتك و مستعدة دلوقتى لأى شغل بدون سؤال هتلاقى نفسها بعد يومين تلاتة بتعمل حاجات هايفة جدا على اللى هى اتعودت عليه و بتنجز بسرعة و ما يبقاش عندها شغل و تبتدى تحس بالملل و دى أول ما بيجيلها فرصة تانية حتى لو فى مكان أقل بس فيه نسبة 1% إن فيها Challange أعلى بتجرى عليها علطول من غير تفكير لأنها بتفتقدها جدا عارف المحروم فدى مشكلة بالنسبة لهم و تكلفة إضافية إنهم يدورا على واحد تانى و وقت و تفاوض جديد و مرتب تانى.
أنا بقوللك ده عن تجربة لأنى جتلى شغلانة فى شركة كبيرة فى يوم من الأيام و الInterviewer قالتلى إنى Over qualified و انماقشت معايا فى الأسباب و أقنعتنى بس برده كنت ما بشتغلش ساعتها و نفسى فى أى شغل و بقول بينى و بين نفسى أنا أدرى بمصلحتى لكن هى ما رضتش و ما حسيتش بجميلها غير لما اشتغلت فعلا شغلانة أقل منى و حسيت باللى هى قالته بالظبط و ما أقدرتش أكمل فيها.
أنا حبيت أشاركك قصتى عشان ما تتضايقش و انت ماتعرفش الخير فين و ربنا أدرى بالخير لينا كلنا