السلام عليكم
الحكاية دي حقيقية وانا عشتها لحظة بلحظة وسأتكلم بلسان الشخص ذاته !
المهم انا قعدت 5 سنين اذاكر واطحن في نفسي واطلع من ال 10 الاوائل على القسم بتاعي وغالبا الاول او التاني كل سنة والحمد لله خلصت الجامعة وخدت تقدير تراكمي امتياز 86% هندسة ميكانيكية ! والحمد لله المشروع بتاعي أخد تقدير امتياز 198/200 والحمد لله عندي خبرة بجميع المجالات التي تخص مجالي وواخد كورسات محترمة .
خلصت وانا كلي امل الاقي وظيفة محترمة طبعا انا كنت متخيل الحياة وردية وقلت ان شاء الله ربنا مش هيضيع مجهودي على الفاضي وهلاقي شغلانة بمرتب كويس ومن هنا بدأت رحلة البحث عن الوظيفة .
دورت في كل حتة ومافيش شركة الا ورحتها .. بترول - سيارات - تكييف وتبريد - مصانع رحت كل مايخطر على البال وكنت عامل CV محترم والله لو أي حد شافه يقول ده مرجع وطبعا حاطط فيه كل اللي ماله علاقة برحلة تعليمي من شهادات وكورسات وتكريمات واللذي منه
المهم بدأت في شركات البترول وطبعا ما عجبنيش النظام فيها لانه بيقول لك انك هتشتغل casual يعني لو فيه شغل النهاردة تاخد فلوس مافيش يبقى تروح !! يعني من الاخر ممكن تمشي في اي وقت بدون اي مقابل . المهم اتجهت الى أحد أكبر شركات ال Petroleum services في مصر بعد قراءة اعلان عن وظيفة ولقيت نفسي مناسب لها وكان الناس سعداء جدا جدا لما شافوا ال CV وطبعا دخلت ال interview والمهندس قاللي هنتصل بيك بس انت ناجح صدقني !! فرحت جدا وفعلا اتصل بيا وقاللي تعال عشان عندك أختبار ومقابلة كمان
رحت وانا مستعد ومذاكر ودخلت الاختبار ونجحــــــــــت الحمد لله ودخلت المقابلة وبعدها قالولي هنتصل بيك قريب .... شهر و نص فاتوا ومافيش ولا حس ولا خبر !! المهم اتصلت بالمهندس وقاللي هتصل بيك كمان اسبوع !! فات الاسبوع وانا كلي امل وعمال اجهز نفسي وادعي واقول يارب ومن الناحية التانية برضه بدور على شغل المهم فات الاسبوع والراجل اتصل بيا واول لما شفت رقمه على التليفون حسيت برهبة شديدة جدا جدا زي اللي كنا بنحس بيها واحنا داخلين الامتحان في الاعدادي !! (اصل الاحساس ده اندثر عندي في الثانوي ) المهم الراجل ابلغني اني لم يتم قبولي !! وطبعا انا قلت الحمد لله على كل شئ ويمكن ربنا كاتب لي حاجة أحسن
المهم فضلت اتكلم مع الراجل شوية عشان كنت مصر اني اعرف سبب الرفض وهو كان مصر مايقوليش لحد لما في الاخر قاللي وهنا الخبر نزل علي كالصاعقـــــــــة بجد والله..... لكم ان تتخيلوا ايه السبب
قاللي انت " Over Qualified " اه والله !!
بصراحـــــة انتابتني هيستريا بعدها مش عارف اعمل ايه ؟؟ وحسيت بصداع رهيب كانك ضربتني على راسي بحديدة !! وفي اللحظة دي فعلا انا نسيت كل الانجليزي اللي انا عارفه لدرجة اني ماكنتش عارف معنى الكلمة !!
طيب يعني انا لو كنت زي بقيت الناس اللي ماكنتش بتذاكر وبتشيل مواد وكنت ريحت دماغي وعشت حياة الكلية عادي - خروج وسهر و.... واللذي منه كنت بقيت qualified ؟؟
بصراحة انا أكن كل احترام للناس بتوع الشركة لانه بالفعل ردوا عليا وقالولي ايه موقفي من الوظيفة على عكس شركات تانيةو كتير ولا ردوا ولا قالوا حاجة وفي نفس الوقت نفسي اعرف ليه اترفضت ... طيب ما هو انا كنت عارف ايه طبيعة الوظيفة وكنت قابل بكل مصاعبها عشان كده اتقدمت لها .
عامة الحمد لله على كل شئ ((وَعَسَى أَنْ تَكْرَهُوا شَيْئاً وَهُوَ خَيْرٌ لَكُمْ))
هي دي قصتي في بداية مشوار حياتي !!
اتحطمت في البداية ولكن على رأي المثل (الضربه اللي ماتموتك تقويك)
واديني منتظر تاني شركة عشان اتصلوا بيا قريب وربنا يسهل !
المفضلات