الموضوع: الغيار الخامس

اللي يحدد ميعاد الغيار هو نوع العربية ...... يعني نوع صندوق التروس اللي راكب .

فيه عربيات معمول صندوق التروس فيها بنسب معينة لأخراج العزم بدري ...... وبالتالي الغيارات بتكون قريبة

يعني مثلا
عربية عزمها بيطلع على 3000 ....... هاتلاقي مدى الغيارات صغير .......
يبقى هنا تنقل بدري علشان تريح الموتور بتاعك

و فيه عربيات تانية مدى الغيارات طويل شوية
يعني مثلا العربية عزمها بيطلع على 4000 لفة
هنا هاتلاقي الغيار الخامس ميعاده مختلف عن ميعاد الغيار الخامس في العربية الأولى .

في العموم
الغيار الخامس ممكن تسوق عليه لما يكون عدد لفات المحرك فوق 2500 لفة - دقيقة
أقل من كدا يبقى أنت عامل حمل على الموتور علشان بتحاول تتطلع عزم معين على ترس صغير ....... و بالتالي بتحمل على الموتور

لو مجرب العجل أبو سرعات هاتعرف أنا بتكلم على أيه :

هات العجلة و حط الغيار على أسرع ترس ....... و حاول تطلع بالعجلة مطلع مثلا
هاتلاقي رجليك أتخشبت من كتر العزم اللي أنت مش قادر تطلعه
و أعكس و حط العربية على الغيار الملائم ........ هاتلاقي العملية بقت زي السكينة في الحلاوة على رأي اللمبي .

عموما 80 متهيألي بدري شوية لو العربية 1600 سي سي .
لو العربية أصغر من كدا ........ ممكن الخامس على السرعة دي مش مشكلة .

العربيات الكبيرة صناديق تروسها مختلفة ..... و بالتالي نسب مختلفة علشان تدي سرعات أعلى أو عزم معين و قوة حصانية معينة .

مثلا في البونتو
الخامس كان بيريح الموتور ......... على سرعة 85 كم - س ...... و العربية كانت بتشد عادي .
أما الجين 2 مثلا
الخامس على الأقل لازم تكون سرعتك 90 كم - س علشان متخليش سرعة الموتور تقل عن 2500 لفة - دقيقة .

شوف عربيتك بتكون على كام ساعة التغيير و شوف هل العربية مرتاحة و أنت بتنقل و لا فيه حمل على الموتور .