السلام عليكم
انا عامل الموضوع ده عشان لقيتكوا ظالمين موديل من اجمل واثبت واوسع موديلات هيونداى فى فترة التسعينات
والكلام كله على الاكسيل بالرغم من ان شكل الاكسيل نسخه من الالنترا ال 93
العربيه دى مع واحد اعرفه وركبتها كتير جدا ودى ملاحظاتى
اولا: من ناحية العربيه نفسها يعنى فى الوسع هايله فعلا وفى الصالون ككل جميله جدا وشيك فعلا وقعدتها مريحه وفى الجرى بالرغم من انها بقالها اكتر من 15 سنه بتجرى الا ان موتورها بسم الله ماشاء الله قوى وعلى ال 160 بتبقى ستيبول جدا وبشكل غريب خصوصا مع جنوط اكبر نمره او اتنين بيريح العربيه جدا على الطريق ولما بيركب فيها المكنه ال 2000 بتجيب ال 200 زى اللسعه يعنى تخيل انك راكب اكسيل بدون اقوى عيوبها وهو الخفيه على الطريق وكمان اوسع وبالرغم من انها اقدم بسنتين او 3 من الاكسيل الا ان خامات صالونها احسن
اما التكييف وده اللى تاعب ناس كتير فى الاكسيل فحدث ولا حرج بجد تحفه وعلى الاقل اعطاله تكاد لا تكون
من ناحية قطع الغيار فالزياده اقل بكتير من المميزات الى فارقاها عن الاكسيل وانا شايف ان لا وجه مقارنه وماتنسوش ان الموديل ده هو اساس شهرة الالنترا لجودة سمعته
وبالرغم من كل ده مش لاقى حد بيتكلم فيها ولا جايب سيرتها وده يا اما لانكمو ماتعرفوش عنهاحاجه ودى هاتبقى غلطه لان كان قدام اى حد جاب اكسيل انه يعيد التفكير ويدقق البحث عشان يلاقى اكسيل بلا عيوب وبمميزات اكتر وبنفس السعر تقريبا
والموديلات 93 و 94 كلها خليجى تقريبا حتى شكلها بالرغم من قربه من الاكسيل الا انك تحس انها انضف بكتييييييييييير جدا
العربيه ليها مكنه 1500 ودى اقل حاجه وشفت 1600 و 1800 بس ماكانتش بتاعتها و ال 200 بتاعتها بس اللى يركبها يتشاهد على روحه بالرغم من ان العربيه دى مش خفيفه خالص على الطريق
لو حد عنده اى معلومات تانيه ياريت يقول ولو حد عاوز معلومات اكتر انا ممكن اجيبهاله بسهوله
ونصيحه لكل واحد معاه تمن اكسيل انه يستنى ويتفرج عليها لو ماقررش انه ياخدها فورا بشرط الحاله الجيده يرجع هنا ويقوللى انى كنت غلطان