ثرموستات الموتور مالوش لازمة؟

**SADAWY** · 22-07-2009 09:24 AM

انا سعداوى بتاع البيكانتو فاكرينى؟ امبارح كنت ماشية فى الشارع على الغيار الأول فترة طويلة لآن الشارع كان واقف بشكل خانق وحاولت اشغل التكيف لم يعمل والعربية بدأت تكركر وتقف كل ما أهدى وفى الآخر شميت ريحة حاجة بتتحرق والعربية وقفت .
المهم واحد تطوع وأحضر لى ميكانيكى قالى ان العبربية سخنة جدا وما فيهاش مية , وبعد الكشف قالى ان ثرموستات الموتور أتحرق ولازم نشيله وان العربيات الجديدة ليها 2 ثيرموستات وثرموستات الموتور مالوش لازمة لأنه مصمم لدول الخارج لكن الجو عندنا سخن أصلا . وفعلا شاله والعربية أشتغلت.

**Mohamed.Fawzy** · 22-07-2009 09:46 AM

المشاركة الأصلية كتبت بواسطة sadawy

انا سعداوى بتاع البيكانتو فاكرينى؟ امبارح كنت ماشية فى الشارع على الغيار الأول فترة طويلة لآن الشارع كان واقف بشكل خانق وحاولت اشغل التكيف لم يعمل والعربية بدأت تكركر وتقف كل ما أهدى وفى الآخر شميت ريحة حاجة بتتحرق والعربية وقفت .
المهم واحد تطوع وأحضر لى ميكانيكى قالى ان العبربية سخنة جدا وما فيهاش مية , وبعد الكشف قالى ان ثرموستات الموتور أتحرق ولازم نشيله وان العربيات الجديدة ليها 2 ثيرموستات وثرموستات الموتور مالوش لازمة لأنه مصمم لدول الخارج لكن الجو عندنا سخن أصلا . وفعلا شاله والعربية أشتغلت.

اللى انتا عملته ده حل مؤقت لغايه متشترى الترموثتات و تركبه .... مفيش حاجه راكبه فى العربيه ملهاش لازمه

**SADAWY** · 22-07-2009 10:14 AM

طب يا جماعة حد يفهمنى لزمته ايييييه

**Mohamed.Fawzy** · 22-07-2009 10:24 AM

المشاركة الأصلية كتبت بواسطة sadawy

طب يا جماعة حد يفهمنى لزمته ايييييه

الترموثتات ده هوا اللى بيوصل درجه حراره الموتور للكنترول و بالتالى بتحكم فى دخول المياه لتبريد الماتور وده مهم جدا لآن درجه حراره الموتور مثلا فى بدأ الدواره تختلف عن لو انت سايق مثلا ساعه متواصله

و برضه بتختلف فى الصيف عن الشتاء

المضحك فى الموضوع كلمه مالوش لازمه دى ... حسستنى انهم عاملينه عياقه ... او ان اللى قالك كده بيفهم عن مهندسى كيا موتورز وتلاقيه اصلا معهوش ابتدائيه حتى .... لكن هقول ايه كل واحد بيفتى زى ما هوا عايز

و اللى حضرتك عملته ده انك خليت الكنترول جيله ان درجه حراره الموتور عاليه طول الوقت و ده مش صح

**Mohamed.Fawzy** · 22-07-2009 10:31 AM

المشاركة الأصلية كتبت بواسطة sadawy

طب يا جماعة حد يفهمنى لزمته ايييييه

الأهم من انك تفهم لزمته ايه انك تكون فاهم ان مفيش حاجه راكبه ملهاش لازمه و متصدقش كلام الصنايعيه

**aYaBooY** · 22-07-2009 11:19 AM

عد فيه كام عربية نزلت مصر من الموديل ده و اعرف انه لو ملهوش لازمة كانت الشركة من البداية شالتة و وفرت فلوسة
الحساس ده وظيفتة اتشرحت لحضرتك من محمد فوزي و اضيف على

كلامة انت من غير الثرموثتات ده هاتلاقي العربية عالية على طول
و لو طالع مشوار في الصبح بدري على طريق سريع مش هاتلاقي سحب علشان درجة حرارة الموتور هاتنزل اكتر من المفروض و طبعا حاجة زي ديه هاتاثر على عمر الموتور
سيبك من اي صنايعي مش فاهم حاجة و عامل فيها شيخ صنيعية مفيش حاجة اسمها ملهاش لازمة

**SADAWY** · 22-07-2009 12:03 PM

شكرا يا جماعة والحمد لله انى لم آخد بالنصيحة المهببة ديه

**mohamedadelemam** · 31-07-2009 04:36 PM

السلام عليكم...فى البداية أحب أحييكم على التحليل الوافى...لكن أنا عربيتى بيجو 405 وبالفعل كانت بتسخن...وبما إنى أنا اللى بأقوم بصيانتها فقمت بمراسلة ورشة فى إنجلترا وفهمت إن ترموستات الموتور موجودة للدول التى درجة حرارتها أقل من 10 درجات مع إنه ميمنعش إنها تكون موجودة فى دولنا الحارة...بس أنا قمت بإزالتها وتغييرها بواحدة جديدة...بس بعد كده جربت إنى أتخلص منها تماما وبالفعل أصبح أداء السيارة أحسن كثيرا...وبالرغم إن عداد الحرارة لا يتجاوز السبعين إلا إنه دوران الماء البارد بإستمرار يعطى نعومة فى أداء السيارة...ويا رب أكون عرفت أشرح وجهة نظرى

**ahmedsrs** · 31-07-2009 06:38 PM

عدم وجود ثرموستات الكوعة بيؤدى الى اجهاد حرارى لسبيكة الموتور ومع الوقت تلف لسبيكة الموتور ده بالأضافة لزيادة استهلاك البنزين
وكلنا عارفين الحركة المشهورة الى بيعملها بتوع البيجو الى شغالين بين المحافظات انهم بيحطوا كرتونة او قطعت بلاستك قدام شبكة العربية عشان يقلل من برودة العربية اثناء السفر صباحا والجرى على الطرق المفتوحة

**aid904** · 02-08-2009 11:18 AM

انا جربت الموضوع دة بس مش بمزاجي الميكانيكي شاله من غير ما يقولي ولما قولتله شيلته ليه قال ما لوش لازمه في الصيف
المهم دلوقتي العربيه بتأخد وقت أكبر بكتير علشان تسخن وده بيهدر بنزين ولو مستعجل وطلعت بالعربيه على طول من غير تسخين كافي يبقى بتقصف عمر الموتور الاخطر بقى تعرف قد ايه بتفرق في استهلاك البنزين انا سافرت اسكندريه ومركب الترموستات ب 11 لتر ولما اتشال بقى 16 لتر تصدق .. انا ان شاء الله هأرجعه انا مش بلاقى فلوسي في الارض