مشاكل في الفيات 128

**Clark_ElMaSrY** · 04-08-2009 10:33 AM

السلام عليكم و رحمة الله و بركاتة

شكرا للمنتدي العظيم دة و شكرا للأعضاء ع المجهود الكبير دة

اتمني الاقي حل للمشاكل دي

السيارة : 128 معدل ( نوفا 2000)

المشكلة الاولي :: صوت تصفير الفرامل الخلفية

تعبت منة جدا و غيرت الطنابير و التيل بتاعهم مرتين و مفيش فايدة و نظفت كتر و رحت لاكتر من ميكانيكي و برضو لازال الصوت موجود

مش عارف اية الحل يعني لو في نوع معين ليهم مبيعملش صوت يبقي يا ريت و مش مهم لو غالي

المشكلة الثانية :: السرانسية عندي بظبطة و بيرجع تاني بعد شوية لما كان علية

كانت مشكلتي ان المتور بيتهز جااامد و يبقي عايز يبطل و قالوا دة سرنسية و عايز يتظبط و فعلا لما ظبطة بقت تمام بس بعديها كل شوية يرجع تاني و ارجع اظبطة

يا تري في حل ؟؟؟

المشكلة الثالثة :: انا كنت شاري العربية دي من فترة مستعملة يعني و حاليا اكتشفت ان مفيش فيها فلتر بنزين

في ميكانيكية قالوا هيا اصلا كدة و ناس تانية قالوا لا

يا تري هيا اصلا بتنزل بفلتر و لا اية ؟؟

المشكلة الرابعة :: نور الصالون يعتبر كانة غير موجود انتوا عارفين انة جنب الباب فية لمبتين كدة و لا ليهم اي لازمة
كنت عايز اركب نور صالون محترم و يكون شكلة كويس
اي اقتراح ؟؟؟

المشكلة الخامسة :: نور التابلوة ضعيف و غيرت لمض لية و برضو مش قووووي

يا تري ممكن اعمل اية ؟؟

المشكلة السادسة :: في نوع لمبات للفوانيس الامامية اللي هو phillips rally ناوي اجيبة ان شاء الله

بس الفوانيس بتاعت العربية فيها زي خطوط كدة فبيتهيالي هتشتت الضوء و تخلية مش واضح

هل في فوانيس تانية تركب و تدي معاة اضاءة كويسة ؟؟؟

اسف للاطالة بس قلت احط كل حاجة في موضوع واحد

**aYaBooY** · 04-08-2009 11:18 AM

اولا الله يعينك العربية 128 بجد عربية متعبة كانت معايا و مازالت عند والدي فعلا مشاكلها مبتخلص و لما يبقي ليها مزاج تعكنن علي الي راكبها بتكرهة اليوم الي اتولد فيه بس عموما كل عربية هاتلاقي فيها حاجة مفيش عربية كاملة
تصفير الفرامل الخلفية ركب تيل امريكي بلاش التركي و اخرط طنابير و ظبط رجلاش و انشاء الله متصفرش تاني
مشكلة السلانسيه واضح ان بك السلانسيه القلاوز بتاعتة مش مظبوطة او مكانة في الكاربوراتير مفوت تخلي الميكاننيكي يلف عليه دبارة علشان تخشنة و تحافظ على وضعة و يفك الاسبراتير و ينظف المشط كويس و يشحم العمود و انشاء الله تظبط بس عموما العربية معايا كانت بتحتاج تظبط كل اسبوعين او تلاتة
موضوع فلتر البنزين انا معرفش يعني ايه هيا كدة اي عربية لازم يكون فيها فلتر بنزين ممكن تبص تحت العربية كويس ممكن يكون متركب في حتة تانية مش في الحوض بتاع الموتور يعني بص حوالين التنك من تحت ممكن يكون متركبلها بتاع عربية تانية و فيه انواع فلاتر بنزين بتكون شبه فلتر الزيت بس ليها بزبوز من ناحيتين
موضوع نور الصالون ممكن تنزل التوفيقية او اي محل كماليات تشتري منه وحدة انارة و تشوف حاجة شكلها حلو و اي كهربائي يركبهالك و فيه ناس بتركب وحدة نيون على الزجاج الخلفي
نور التابلوه برده كهربائي يركبلك ليه لمض اكبر و ممكن يركبلها كتاوت بس انا مش واثق من موضوع الكتاوت ده
موضوع الفوانيس هيا وظيفتها توزعلك النور علشان تشوف كويس مش تشتته

**M.FOUAD** · 04-08-2009 05:30 PM

موضوع الهزة اللي في السلانسية عادي موجودة في كل عربيات النوفا بتحسسك ان الدركسيون هيطلع من مكانة اهم حاجة متكنش بتبطل
و الفلتر على ما اتذكر بتنزل من غير فلتر و مش هتفرق اوي لو ركبتة

**Clark_ElMaSrY** · 05-08-2009 02:21 AM

متشكر يا جماعة ع الردود دي و ان شاء الله اعمل اللي قولتة علية

بس ليا سؤال هيا فية فوانيس اسمها كريستال يا تري دي كويسة و ممكن تركب عندي و لا اية ؟؟؟

اة و يا ريت يا كمان يا ايوبي باشا لو تقولي ع مكان اجيب منة التيل الامريكي دة لحسن انا اساسا مركب صيني

لفيت التوفيقية كلها ع تركي ملقيتش كلهم قالوا مفيش غير صيني

**bassem.naguib** · 05-08-2009 10:20 AM

هي كدة الـ 128 .. طلعت نزلت 128 .. مفيش فايدة . تعايش مع بعض المشاكل اللي متعطلش العربية ولا تضرها .. يعني في مشاكل أحسن لأعصابك أنك تطنشها .. وفي مشاكل متسكتش عليها لحسن تفتح عليك مشاكل تانية .. هي دي الخلاصة ..